Bisrock Clan Zone

Pit Senyor natong tanan mga Bisrockers. Nagdanga-danga na ang kahulogan sa kapistahan sa Milagrosong Balaang Bata. Unsa'y mga plano ninyo diha mga inumol sa Diyos? Ipa-sinug ko'g apil ha? Ug pasalamatan nato nga wala'y mga dugoong hitabo atol sa pagpahigayon sa 12th ASEAN Summit dinhi sa Sugbo. Ang naka-minus kadto ra gyud tawong packed meal nga gidalit sa mga dancers nga maoy nakaparebolusyon sa ilang mga tiyan. Nahilandig intawon sa tambalanan di oras. May na lang kay wala molamay ang ilang mga kondisyon.

Unya, ipa-sinug sa'g apil ning banda nga nakapa-imbiyerna sa Makadawa. Hee hee naunswa na ko ani, Judith Sue? Nahimo naman ko aning "Bisrock da hu"? Intriga na ni dah mora'g di na ni kaya sa akong powerz ning showbizniz tulisbizniz, Ai-Ai ug Imong! Ahaahhha!

Bitaw, alas dos onse sa kadlawon niadtong Enero 12 (paminaw diha Choydhegz Miñoza!), ni-text nako ang drummer sa Makadawa nga si Jun Abasanta para isugid ang iyang kasinatian aning iyang gihulagway nga feeling sikat nga banda nga kusog na mang-overtake: "Na-bad shot jud mi, gihilasan gyud mi sa (tootototoototot). Nahiubos mi's organizer sa Kabobo album launching kay nisugot ra sad nga sapawan mi ani nga banda. Tinood dili mi sikat parehas nila, pero ang amo lang ba professional lang ta ta. Ang call time namo 7 pm gud. Didto nami. Niabot sila 11:00 pm, wa pa mi katukar. Paghuman sa Phylum, imbis kami na, nisapaw sila maskin nakakita sila na kami pa ang sunod. Mangyatak man ilang tirada, mora'g mga way grado," mao kini ang unod sa text message ni Jun kinsa gitawagan nako pagkahapon na aron matino unsa gyud ang nahitabo.

Niining tungora ni-text na sad nako si Jimvoy Dionson, ang keyboardista: "Bad trip gyud sila, ma'm. Sapaw sila maskin kita sila naa mi naghuwat when mahuman ang Phylum," saysay ni Sir Jimvoy, mentor sa D'Kazins.

Nasayran sad gikan kang Jun nga gani niulbo sad si Davis, ang vocalist sa Makadawa, tungod kay nagbitbit pa siya'g cameraman adto alang sa coverage kay lagi connected man si Davis sa "Oi", isip director, usa ka variety show sa GMA-7 Kapuso Network. Nalangan na sila ug naikog na siya sa iyang gikuyog nga cameraman. Nasuko si Davis sa organizer sa album launch ug sa Kabobo nga wala gyud makabadlong sa maong pag-overtake sa bandang (totototootot) nga ilang gihulagway nga "walay batasan".

Gisaysay usab ni Jun sa phone interview nga giatangan sa gawas sa venue nilang Jun, Jay ug Doomz ang vocalist sa maong bandang "mananapaw" aron kasultihan sa ilang gibating pagkainsulto apan nitubag kuno ang vocalist niini nga "mao ma'y ingon sa organizer nga 11:00 pm mi manukar. Igo ra sad mi nituman sa ilang instruction gihatag."

Pagkahuman, nakadawat si Jay ug text message nga nagkanayon: "Unsa man gubton ta ni?" Wala matino kinsa ang tag-iya sa maong numero kay wala man kini ma-save sa iyang phone book/directory. Apan duda sa magsoong Jun ug Jay nga may kalabotan ang ilang gihimong konprontasyon sa maong pangutana nga ilang giisip nga hulga.

Buweno, ipasinug na lang na ninyo Makadawa ang nangyatak ninyo para makaamgo nga bisan pa og sila maoy nag-una sa listahan sa mga pioneering Bisrock bands, wala silay katungod mag-feeling sikat. Wa man gani na magpataas sa ihi nang ubang nakatunob na og international scene sama ni Billy Joe Crawford nga namayagpag na's US ug Europe. Igo lang miingon si Billy atol sa 21st anniversary sa That's Entertainment sa "Master Showman Walang Tulugan" niadtong Sabado, Enero 13, sa kadlawon nga "we musicians/artists have a big responsibility to the public. We have to be level-headed and professional in our dealings with people and work. It's either we make it or break it. Hindi kasi importante ang biglang sikat. Ang importante kung magtatagal ka sa industriyang ito."

Bisrock Clan Zone

Featured karon sa atong paglusad niining luna alang sa mga fans nga Smashers ug Bisrockers nga mga sakop og clans ang UGEN Bisrock Clan sa Mactan (Sun Chapter headed by Ugen Mata samtang ang Smart Chapter gipangulohan ni Choydhegz Miñoza, kauban ang mga members nga silang Rash Mahusay, Khent Bancale, Jestone Talingting, Flor Mata, Rafy Quijano, Anthony Talingting, Janz Mata, Aladin ug Rafz Talingting, ug daghan pa.

Kini sila usa lang sa mga nagkadaghang pundok sa mga Bisrockista nga naningkamot magtuboy sa ilang matang sa musika. Kuha kining mga hulagway atol sa ilang panagtigom nga diha pagahimo-a sa Lapu-Lapu Shrine sa Mactan.

Tested na ang pagka-astig ug pagka-fayter sa mga Bisrockers sa Mactan. Gani, ang bagang duot sa mga Bisrockista na-a sa maong dapit. Ug panahon sa mga concerts, gigs or events, ang mga Mactan Bisrockers wala pa gyud malupig kon suporta lang ang pagahisgutan tungod kay bisan pa'g hulga-on sa dautang panahon, tua nanagpunsisok ug nanag-abiba ang mga batan-on aron ipalanog ang tingog sa bag-ong panahon.

Tuyo sa Ugen Bisrock Clan nga maundang usab ang piniratahay sa mga CD dinhi sa Sugbo ug ang pag-remix sa mga orihinal nga komposisyong Bisaya. Usab, naningkamot sila nga mahimong mahinungdanon ang ilang presensya sa katilingban. Sa umaabot nga mga buwan, itala ning maong lindog ang mga kalamposan nga makab-ot sa Ugen Bisrock Clan human makigbugno sa katumanan sa ilang mga tingusbawan. Atangi ang ilang pagduso sa mga repormang makapausab sa dagan sa panghuna-huna ug kaugmaon sa mga batan-on. Ipalanog nila ang ilang mga sentimento, panikay-sikay ug pagdegamo pinaagi sa kabungog sa pangalang Ugen Bisrock Clan.

Pit Senyor, sa UBC clan members kini!