Ang tsika mao nga nakit-an sila si KC ug Lino nga didto sa Boracay alang sa hamubo nga bakasyon ning bag-o lang. Dugang taho nga niadtong panahona, didto usab sa nailang "paradise island" si Bianca Gonzales, ang kanhi uyab sa sikat ug guwapo nga direktor nga si Lino.
Gani matud pa sa tinubdan nga samtang ang tulo ka nahisgutan didto sa maong isla, nagpunay pa og text kang Lino si Bianca nga hangtud karon dili pa makadawat nga natapos na ang tanan tali nila ug naglaom nga "love would be sweeter the second time around."
Una niini mibuto sang balita nga niadtong December 22, nakit-an sila si Lino ug KC nga naniudto sa Sonya's restaurant sa Tagaytay apan wala pa matino kun sinabutan ba nila kadto o nag-abot lamang sila didto. Apan gikataho na nga sa ilang pagbiya sa restaurant "magka-holding hands sila."
Sunod nga migawas nga detalye mao nga sa Paris France diin kasamtangang nagtungha si KC, sila nagkakita ni Lino ug sukad niadto, mas nilipang ang ilang panagsuod.
Nan karon, miisa ang kilay sa mga himantayon sanglit matud pa nila, kun walay romantiko nga anggulo tali sa duruha, dili na mahimong ikatarungan nga nag-abot lamang sila didto sa Boracay kun dili giplano nila ang maong bakasyon sanglit pareho sila nga daghan og gimbuhaton isip mga sikat nga personahe sa showbiz.
Sa The Buzz niadtong Domingo walay klaro ang text message ni Lino sa pangutana kun sila na ni KC, sanglit igo lamang kining miingon nga mataghom, utukan ug talented nga binuhat si KC, ang mga himantayon nagkanayon nga niining pagtumaw sa taho nga namakasyon silang duruha sa Boracay, wala nay angay'g daghan pang ipangutana sanglit nabutyag na ang ebidensya.