CD sa HuNiño Songwriting Contest giapod-apod na

Pit Senyor kanatong tanan! Nagdanga-danga na sad ang tinuig nga pangilin sa Balaang Batang Hesus - usa ka tradisyon nga dugay na natong gihangop. "Mido" ang naandan nakong tawag sa imahen sa Santo Niño. Nahimugso ang mao namong "sangod" sa dihang gipaluhod ko's akong inahan, isip usa ka paagi sa pagkastigo, atubangan sa imahen niadtong gamay pa ko aron mangayo'g pasaylo sa akong mga nabuhat nga salaod. Unya inay "amigo" ang akong itawag niya, dili naman ko makalampos kay tungod sa bul-og sa dangoyngoy ug pagbakho, "mido" ang migawas sa akong baba nga nagkurog.

Hangtod karon nadala na nako ang maong sangod, ug bisan pa man walay literal nga mga pulong mogawas sa baba sa imahen pagtubag sa akong mga pangilaba, hataas na nga panahon usab ang among "bonding" ug sa makadaghang higayon ang iyang HuNiño (ang huni ni Señor Sto. Niño) nga gitagik sa kalig-on sa pagtoo akong permanenteng madunggan nga mobirit sa akong kasingkasing.

Mao man gani nga gikalipay kaayo nako'g dako kining maong kalamboan sa pag-compile sa mga kanta nga halad alang kaniya kay taod-taod na sad nga panahon nga naghulat ako nga mahitabo kini - ang HuNiño (Huni Halad Alang Kang Santo Niño de Cebu) Songwriting Contest.

Ang labing unang HuNiño Songwriting Contest CD giapod-apod na sa eksklusibong distributor - ang Sto. Niño Store sa sulod sa Basilica sa balor nga tag P350 matag kopya. Ang maong CD naglangkob sa usa ka dosenang mga huni nga namahimong finalists sa gipahigayong bangga sa pagsulat og kanta. Ang CD may pakapin usab nga minus-one alang niadtong buot mo-sing along sa 12 ka kanta diha sa ilang mga tagsa-tagsa ka panimalay o sa liturhikong kasaulogan.

Tanang kanta niini matawag og "devotional music dedicated to the Sto. Niño." Kining tanang mga kanta tagaan og usa ka buhing interpretasyon atol sa 1st HuNiño Songwriting Contest Grand Finals karong gabii, mga alas-7 ang takna, diha sa Sto. Niño Pilgrim Center. Ang HuNiño Chamber Orchestra, sa kumpas sa baton ni Prof. Roberto "Obet" del Rosario, maoy moduyog sa mga mohatag og interpretasyon sa maong mga kanta aron kadungagan pa'g bulok, emosyon, bili, kinabuhi, kamahinungdanon ug kabalaan ang maong okasyon. Gilantaw kini nga usa ka "historical event, a convergence of brilliant and promising singers and choral ensembles."

Ang halin sa 1st HuNiño CD adto padulong sa pundo sa Basilica del Sto. Niño Children's Welfare Foundation, Inc. Nasayran kini pinaagi sa usa ka press statement nga giandam ni Gloria Villarojo, ang production coordinator sa 1st HuNiño Songwriting Competition.

Mga dinapit nga maglilingaw ang Sandiego Dance Company ug ang Asia's Crystal Voice - ang usa sa mga garbo sa Sugbo nga si Sheryn Regis - kinsa mihulagway sa kaugalingon nga deboto sa Sto. Niño. Libre ang maong pasundayag atol sa grand finals unyang gabii.

Gi-produce ang maong CD sa Augustinian Community, sa Basilica del Sto. Niño Community ug sa Sto. Niño Store. Ang songwriting contest ning tuiga gihatod kanato sa maayong kabubut-on sa Duracon, Biz Depot, Large Forms Ads, Papicture, ug sa Soundtraxx Production Studio nga maoy modumala sa pagmontar sa entablado sa maong kompetisyon.

Ang sulod sa CD mao kining mga mosunod nga kanta: "Santo Niño Kami Panalipdi" komposisyon ni Emmanuel Labrador Abellana; "Santo Niño, Our Hope For Peace" ni Russel Alegado, lyrics gitagik ni Janice Warnack; "Yukbo-an Ug Pasidunggan" ni Rommel Salazar Ambi ug lyrics gisuwat ni Rev. Fr. Jed Bellones; "Hiyas ni Santo Niño" ni Flordelis Gilig ug lyrics ni Melchor Gilig, "Himayaon Ka Santo Niño" ni Norman Jabonero, "Santo Niño, Tabangi, Panalipdi ang Sugbo" ni Manolito Languido, "O Holy Child" ni Jay-Arr Librando, "To Be A Child Like You" ni Ogie Melgar, "O Santos nga Dios" ni Nida Orio, "O, Senyor Santo Niño" ni Renato Calago Sagayno; "Santo Niño nga Milagroso" ni Roy Tabasa ug lyrics ni Gwendolyn Suico-Crescencio; ug ang "O Miraculous Santo Niño" nga komposo ni Eugene Tan.

Aduna'y 122 ka mga entries ang maong bangga sa pagmugna og awit nga gipangunayan paghashas sa mga tang-ang kompositor dinhi sa Sugbo, hangtod nga naabot na lang og usa ka dosena ang magtigi isip "songwriting festival competitors".

Matag entrante makadawat na og tag P5,000 cash ug plake atol sa grand finals unyang gabii. Apan gawas sa mga tropeyo, ang grand champion mouli nga magbitbit og P50,000 cash. Ang moilog sa ikaduhang ganti makadawat og P30,000 samtang ang mokawhat sa ikatulong ganti makadawat og P20,000. Ang Best Interpreter makadawat og P10,000 cash.