Sa mga nangagi'ng pagpakighinabi sa mga sakop sa mga banda dinhi sa Sugbu, diha'y mitubag "lahi gyud ang bonding sa banda, lahi ang impluwensya sa pagmugna og mga orihinal nga komposisyon. Lig-on, dulot sa bukog."
Dihay midason pag-ingon "nindot gyud madunggan ang imong mga mugnang kanta sa kahanginan." Diha sa'y niingon nga "humot ang banda sa mga tsiks, sa mga matrona, dagha'g fans, dali maka-koneksyon; daghang mamakpak og maninggit, mo-high five, motawag nimo'g aydoool".
Mitumaw usab ang mga panatikong mga magdadayeg susama ni Judith Sue nga nahurot ang P150 sa text vote aron lang makalusot si Eduardo "Jay-r/Itchoy" Siaboc sa Philippine Dream Academy. Ug asa ang concert sa Bisrock tua usab si Judith Sue, ug kon asa ang sibya sa BisrocKabataan sa Smash ug sa OkRyan sa dyLA tupad niya ang iyang kinakusgang monitor, sige'g hapyod sa antenna hangtod madakpan ang usahay idlas nga signal.
Apan ang labing hugyaw nga pagpakita sa dakong suporta ug pagmahal sa mga bandang Bisaya nahitabo niadtong Bisrock Rakrakan niadtong Septiyembre ug Tingog Bisaya concert niadtong Nobiyembre. Taliwala sa kahugyaw imong makita ang mga batan-on nga buot mogawas sa gahong sa kultural nga depresyon. Bisan ang dili maayong tempo wala makapugong sa mga astig ug payter kaayong mga tigpaminawan sa"BisrocKabataan sa 93.1 Smash FM. Dul-an sa tres mil ang nagpasinguwan aron ipatagamtam ang ilang tumang kasibot sa Bisayang mga kanta. Basi sa akong pag-analisar, nangita ang mga batan-on sa ilang kultural nga kailhanan. Dugay na kining gigawngan sa kolonyal nga mentalidad.
Grabe ang nahitabong represyon sa pagtamod sa atong kultura sa gihulagway ni Eric Goden Lomocso (vocalist, Blood of the Stone) nga pre-Bisrock era. "Kini tungod sa presensya sa mga haring gangis nga kapitalista sa usa ka pangagamhanang kolonyal nga nagkupot sa renda ug direksyon sa ekonomiya. Kasagaran sa maminaw sa Bisayang mga kanta karon naa nahimutang sa estado sa pagka-struggling class. May mga kantang gigamit isip paagi nga maalim ang mga samad sa gitagamtam nga grabeng kapobre, kakulang sa mga oportunidad nga makapanarbaho ug makadawat sa saktong suholan."
Nahimong usa ka outlet alang sa mga nanagdamgo'g nanagdamura ang mga kanta isip paagi nga mapabuhagay ang ilang gimithing kaharuhay, reporma sa edukasyon, oportunidad sa pagpanarbaho, ug kaligdong diha sa pangagamhanan.
Sa tuig 2006, nakadawat usab og mga pagsaway ang di matabas-tabas nga pagpanglipang ug di mapugngang paghumot sa Bisrock. May nagtoo nga usa lamang kini ka fad kon trend sa musika, may nag-ingon puno sa bugal-bugal ug pagbinastos ang mga kanta. Diha usab nag-ingon nga wala'y social ug cultural significance ang kasagaran sa mga kanta. Walay grammar ug poetic license ang pagkagaray-garay sa pipila ka mga liriko. Apan taliwala niini, may mga tigpaniid nga nagkanayon magdugay kini kay niagi kini'g hataas nga proseso sa paghashas. Kon sa panday pa, niagi kini's kainit sa kalayo ug gisubhan sa kabugnaw sa tubig aron susama'g puthaw mahimong mapuslanon sibo sa gilatid nga kapuslanan.
Karong tuiga, painiton pa namo'g samot dinhi sa Banat Hugyaw ang ka-agresibo sa mga rockista, punkista, reggaenista, ug uban pang matang sa musikero. May pangalan o wala, may luna ang Banat Hugyaw alang sa tanang gusto motikang sa natad sa pangmusika. Atangi ang pagbuswak ug paggilaw sa uban pang mga talento human sa makabuyok nga pag-ayag.