Si Inday Bambina ug ang mga pagtulun-an

Si Inday Bambina tiunay nga simbolo sa usa ka binuhat nga naggikan sa uyamot nga pamilya, probinsyano nga nangandoy, nanimpad ug nakigbisog sa mga pagsulay sa panahon ug nanlimbasog taliwala sa mga pagtamay nga gihampak kaniya sa katilingban nga iyang gipuy-an. Sa pagligid sa mga adlaw, buwan ug katuigan, matawag na siya karon nga haruhay, malipayon ug labaw sa tanan kontento sa kinabuhi tungod kay diha sa iyang kasingkasing iyang gipuy-an ang pagka katoliko, masunuron ug mahadlokon sa Ginoo. Si Bambina nag-alagad kaniadto isip sacristan sa simbahan sa ilang lungsod.

Bayot, mahuyang ug darna. Kining tanan pipila lamang sa mga pagtamay nga iyang nadungog sa mapalabilabihon ug maot nga mga residente sa usa ka katilingban nga tigpala-aron ingnon. Apan wala niya kini igsapayan, hinunua ang tanang pagbiay-biay nga iyang nadawat giumol niya diha sa iyang hunahuna ug pagbati aron sila magsilbi nga instrumento sa iyang paglambo. Kang Inday Bambina ang katapusan nga buhakhak karon sa kalampusan.

Bernardino "Dino" Eliseo ang tinood niyang ngalan, 54-anyos ug lumad nga taga barangay Tan-awan, lungsod sa Oslob, Cebu. Mapasigarbohon si Bambina nga mibutyag nga ang iyang tinood ngalan gikuha sa iyang mga ginikanan gikan sa Catholic Almanac tungod kay ang iyang mga ginikanan tiunay nga mga katoliko. Trese anyos siya sa dihang iyang nasabtan nga usa siya ka Eva nga nabilanggo sulod sa lawas ni Adan.

"I discovered that I am a gay when I was 13 years old, wa ko kahibawo ngano tong buntaga pagmata nako nga ma-attract ko sa lalaki, wa ko kahibawo kung unsay reason", butyag pa ni Bambina sa Banat Hugyaw.

Tinood gikataw-an ug gibugalbugalan siya sa publiko tungod sa iyang pagka mahuyang. Apan walay "pakialam" si Bambina tungod kay ang bililhon alang kaniya mao nga gidawat siya sa iyang mga ginikanan bisan og unsa ug kinsa pa siya. Ang iyang pamilya maoy lig-on nga pader nga iyang gisandigan aron siya mopadayon pagkaplaag unsay nagpaabot kaniya ugma damlag.

Nanimpad taliwala sa giyera

Disi-siyete anyos sa dihang nanimpalad siya sa Manila diin nakatrabaho siya isip katabang sa balay sulod sa tulo ka tuig. Apan tungod sa nahitabong pagpamomba sa Plaza Miranda na uli siya dinhi sa Sugbo. Paghibalik niya dinhi isip construction worker sa San Miguel Corporation ug napabilin siya sa maong trabaho sulod sa unom ka buwan. Gikuha siya sa iyang iyaan nga niadtong panahona mayordoma sa pamilya ni Kongresista Antonio Cuenco. Nahimo siyang katabang sa mga Cuenco.

Gihulagway ni Bambina ang iyang kaugalingon nga dili bisyoso ug barkadista sukwahi sa ubang mga mahuyang. "I only dance with the music, meaning kung unsa karon ang akong situation okay ko, kung unsa nga time, unsa nga place mo go along ra ko," ni Bambina pa.

Dili usab siya moadto og mga disko, sinehan, dili siya mogawas og walay tumong ug dili siya mangita og lalaki tungod kay siya maoy duolon sa mga lalaki, suma pa niya nga mipahiyom. Kanunay siyang moadto sa simbahan ug matag human niya sa taping diretso na siyang mopauli sa balay. Matag weekend tua sa probinsiya ang panahon ni Bambina diin mag-atiman siya sa iyang farm tungod kay mahiligon siya sa panguma.

Gisaysay niya nga bisan og mahuyang siya, gisaligan siya sa iyang ginikanan sa pag-atiman sa 12 nila ka sanggotan kaniadtong 14-anyos pa siya. Gikan sa pagpananggot magdala siya og usa ka galong tuba para ibutang sa tindahan sa ilang kooperatiba dayon molahos siya sa tunghaan.

Naglanog-lanog sa kahanginan

Misuway siya og apply isip radio talent sa dyCB niadtong 1975 diin mipasar siya sa audition. Nakauban niya sa maong estasyonan si kanhi bise-gobernador Nanding Celeste nga mas naila isip "Andoy Pordoy." Sa tuig 1981 napadpad siya sa ganghaan sa dyMF Bombo Radyo isip field reporter ug ang kanhi station manager sa maong estasyonan nga si Amading Abad maoy gabunyag niya og Bambina. Tuig 1983 mibalhin si Bambina sa dyHP diin nagsugod usab siya isip field reporter. Nagpabilin siya sa maong posisyon sulod sa napulo ka tuig, una pa siya nahimong radio talent. Sukad niadtong 2003 hangtud karon nagsentro na sa drama si Bambina sa dyHP.

Gawas sa pagka radio talent mopahigayon usab og mga live show si Bambina sa mga barangay ug mo-host siya og mga Miss Gay pageants. Usahay moapil usab siya sa maong indigay diin kanunay siya nga mogawas nga mananaug. Sa pangutana ngano, mikidhat siya ug miingon nga ganahan lang gyud siya sa maong matang sa pageant.

Mensahi alang sa mga mahuyang

"Dili sila magbuhat og dautan kung mahimo dili sila mag-drugs, dili sila magbarkada og dautan nga mga barkada unya dili gyud sila malimot nga mopasalamat sa mga grasya nga ilang nadawat," nagkanayon siya ngadto sa Banat Hugyaw.

Giangkon ni Bambina nga duna siya'y boyfriend karon apan daghan ang dili motuo niini tungod kay kung magkuyog sila dili man siya magpa-ila nga usa siya ka bayot. Dili ganahan si Bambina nga makigrelasyon sa usa ka lalaki kung wala kini asawa ug uyab nga babaye. Tungod kay alang niya, tapulan ang lalaki nga walay uyab o asawa, ug magsalig lang kini sa bayot.

Sa mga mahuyang nga nakigrelasyon og mga lalaki si Bambina nagkanayon: "ayaw mo og kasuko kung manguyab og babaye ang inyong uyab tungod kay wala tay ikahatag nga butang nga ikahatag sa babaye, kasagaran nga apason sa mga lalaki ngadto sa mga bayot mao ang pinansiyal nga butang."

Kana mao si Bambina, praktikal, sinsero ug prangka. Mahuyang man tuod ang pagbati ang lig-on ug ligdong ang prinsipyo nga gibarugan. Mabuhi ka Inday Bambina!