Kepada: "K, Padayon!"

Nalipay ko'g dako sa taga Meckent (print and designs) sa Tabo sa Banay, likod sa Gaisano Metro-Colon kay ang mga trabahante niining mga Bisrockers nag-chip in og tag P20 sa tuyo nga maka-recording ang ilang kaubang mga sakop sa punk band Kepada. Wow! Dili lang sa tagay mo-chip in. Hangtod sa pursuit sa pag-recording, ana gyud mosuporta ang mga Bisrockers ha? Pagkaligdong nga tumong ug tinguha. Bulahan ang Kepada!

Ang Kepada minubo sa "K, Padayon". Dako ang ilang damgo nga mahimo usab nga kabahin sa nagkalapad nga wanang sa mga Smashers. "K, padayon gyud na. Gi-shorten to Kepada which means ok, go ahead. Padayon sa mga tumong ug tinguha. Padayon sa pag-compose, padayon sa pagpabuhagay sa mga emotions through music," pagpasabot sa drummer nga si Detto "D2" Geromo.

Influence nila ang alternative rock/post-hardcore/screamo/emo band nga The Used, apan gawas niini nakadayeg usab sila og dako sa Silverstein nga ang mga central themes sa kanta may kalabotan ang "self-determination and coping with change".

"We hope we can also mature in terms of the way we sound. Silverstein music man gud has powerful instrumentation plus ang delivery nila sa melody and raw vocals bug-at kaayo. We hope we can perform as close," matud pa ni Jerome Dabon, ang vocalist.

Nasayran usab nga instrumental si Iping Amores sa The Ambassadors (Ulipon, Daw Sama Sa Iro, Smile fame) sa pagkamugna sa Kepada sa Paculob, Dumanjug. "Amigo na kaayo mi ni Iping. Siya gyud ang sige og aghat namo nga mag-compos," pasabot ni D2.

Mag-usa na ka tuig ang Kepada karong Enero puhon. Kauban nilang D2 ug Jerome silang Rodney Dabon sa lead guitar, Joseph Andrew Rivera sa bass ug Patrick Jason Delima sa rhythm guitar. Mga taga-Talisay City ang duhang naawahi.

Sa pagkakaron, duna na'y lima ka kanta ang Kepada. Apan ang "Sekreto" pa lamang ang napalanog sa Smash. "It has already received airplays since the last week of October. Maayo unta mapatukar pud ang among laing kantang Aninipot nga gugma ang tema. Sekreto is about a woman - vain about her looks, but wa siya kabantay unsa kahugaw iyang kuko. Sabtonon kaayo na kay irony man na," panapos sa Kepada.

Kalamposan ni Itchoy, kadaugan sa Bisrock.

Nang-cockroach na ro'g hinay-hinay ang mga kusog kaayo manamay, manaway, mangantalita sa Bisaya rock kay naprobar naman sa inanay nga may talent sad ang mga musikero nga nagpalandong sa maong music genre. Ang mga radio stations nga kaniadto mibuhi sa mga pulong "makaguba sa format" sa dihang ang mga banda mismo ang magpakilo-oy nga mapalanog sa kahanginan ang ilang kompo, karon hinay-hinay nang nakaamgo sa ilang kasaypanan sa pag-ismol sa mga lokal nga talento.

Kun kanhiay ang ilang paghulagway sa Bisrock "baduy", karon nanawagan na sa mga banda nga mo-sumite kay ila nang pun-on ang kahanginan sa mga mugna sa mga lokal nga rockista. Ug bisan gani ang akong mga kaubanan sa lokal nga pamantalaan nga kanhi wala gyud magtagad o mohatag og bili sa paghatag sa gikinahanglang mileage aning mga bandaha, karon nanghatag na'g luna sa ilang pag-feature susama sa akong nasugdan ug gipanghingusgan nga ma-sustain. Usa ka konsepto nga gipanamkon sa pamantalaang Banat ug The FREEMAN tungod kay para asa man diay ang luna - alang lang ba diay sa mga elite nga mga rockista? Alang lang ba sa mga sosyal nga mga sakop sa katilingban? Dili ba mas dako man ang populasyon sa masa? Karon, nangkamas na'g hinay-hinay ang tri-media kay naabog-abogan na matag stagedive sa mga rockers ug nahadlok na siguro nga "sooner, they will all be eating our dust"....ahahahahaha....

Kalamposan ni Jay-r "Itchoy" Siaboc, kadaugan sa Bisrock. Karon nabutang na sa national entertainment scene ang maong paningog. Nagngisi na ro'g dunggan ngadto sa pika's niyang dunggan silang Judith Sue nga fanatic kaayo ug si Ai-Ai nga taga East-West Ayala kay sukad pa's BUGZ sa dyRT, klaro nang nagmahal sa Bisaya sama sa gustong palamboon ni Ka Pedro, ug ni DJ Ram Dizon sa 93.1 Smash FM. Sa kadaghan sa DJs sa Sugbu, kining duha ang nakakulit og lapad nga dalan aron mainila ang mga lokal nga talento. Kanang ubang nagpaka-trying hard magpaka-concerned sa kalamboan sa Bisrock are nothing but second-rate trying hard copycats (swoshh! Sabyag tubig gilayon).

Espoko mo nang sa kadako sa network ug kadaghan og researchers wa gyud makapaminsar kaniadto nga motabang. Karon nga nanglipang na buot nang mosawsaw, mosakay sa popularidad, ug manggamit. Diin kaha ni sila sa dihang si Archie Uy sa Aggressive Audio (Senior Citizen fame) nagbitbit pa's iyang CD ug nanghangyo nga matukar ang ilang kompo? Diin man na sila Judith Sue? Tikang ug pasabta ko!!!

Nahurot ang P150 ni Judith Sue sa text vote alang kang Jay-R apan wala niya igsapayan kay alang kaniya mas maayo nga mouli si Jay-R nga nagmadaugon kay ang kalamposan ni Jay-R, kadaugan sa Bisrock ug kaparotan sa tanang hinawayon, mahilabtanon, wala ra ba'y ikatabang. Sa laing bahin, nagbunga na gyud ang pag-adjust ni Ai-Ai sa iyang antenna matag sibya kaniadto sa BUGZ para pagdakop-dakop sa signal sa dyRT. Taas nga proseso ang tanan. Wala motumaw ang Bisrock nga daw sama sa uhong. Gipanamkon kini, gimatuto. Karon iya na sad ang panahon nga mosidlak.

Unsa naman tong atong victory caravan, Judith Sue? Mo-rampa gyud ta ani para ma-interview sad ta's laing network aron magamit ta's ilang mga agenda? Ahahahhaa....Fah etz!!!

Gusto lang pud nako i-confirm no nga dili si Jay-R ang nisuwat sa "Hilot". Tungod kay siya man ang bag-ong vox sa bandang Scrambled Eggs, maong madunggan siya'g mokanta sa Hilot. Si Clenn "Mano" Sunico sa Mano-Mano (Sony-BMG) mao'y nagtagik sa maong kanta. Manila-based ang Mano-Mano apan si Clenn taga Surigao. Dili unta intrigahon si Clenn ug Jay-R tungod lang sa maong kanta. Usa lamang kita ka bangka, busa timbang kita sa pagbugsay ug paghinubig.

Maayong Pasko ug Bulahang Bag-ong Tuig sa mga fayter ug astig nga Bisrockers, mga listeners namo ni DJ Ram, Bré ug Tonton Mipanarum, lakip sa among Ultimate Bisrocker DJ, sa "BisrocKabataan" 10 am to noon, MWF, sa Smash FM. Salamat sa solid nga suporta sa tanang nagsunod sa band features sa Banat ug The FREEMAN. One year na akong pagsuwat parte'g mga banda sa Enero puhon. Nagdugay kita sa pamrensa tungod sa inyong dakong tabang. Ako kining lantawong dakong kabubut-on labi na nilang bebs_brokenheart ug Ezzen Isugan sa Carcar. Salamat sa inyong padayong pagpakli sa mga panid ug anib ning akong lindog.