Sexy ang tirada sa agadiers

The Agadiers - gilangkoban sa magsoong Alaine (vocals, keyboards), Adrian (bass), Allan John (guitarist), ug Ariel (drums) - ug ilang ig-agaw nga sila'ng Tapeny Chavez (guitarist) ug Pete Cabatingan (percussion, flute) - nakigrock-rakanay niadtong miaging semana sa SSS grounds kauban ang laing 14 ka mga banda sa paningog nga Bisaya rock sama sa Agipo (Sikwati), Assembly Language (Chinita), Gangrene (Wasted), Indephums (Plastik), Makadawa (Sigarilyo), Mantequilla (Bulinaw), Ossified (Deep Pressed), Phylum (Palagot sa Kontra), Stonestomp (Tigpatuman), D'Kazins (Naunsa Na?), Wet Slipperz (Bisan Pa) ug What's The Frequency? (Royal Rumble). Mi-jam usab ang Mr. Pepper ug ang bag-ong kaplag sa nataran sa Bisrock nga Session of the Fighters (Ayaw Padala sa Tama).

Ang tulo ka gabiing rock-rakanay giulohanan og "Tingog Bisaya" nga usa ka konsepto sa e+ productions kakumbuya ang lig-ong mga pwersa sa Touch Mobile ug San Miguel Beer. Nahimo ang maong konsiyerto sa tuyo nga ipakita sa lokal nga komunidad ang kusog sa mga Sugbuanong mga banda.

Apan sa wala pa ang maong kalihokan, ang magsoon kauban ang ilang mga ig-agaw ug ilang 43-anyos nga amahan nga si SPO1 Meliton Agadier (yupz, siya kadtong polis nga naka-disarma - bisan pa man siya off-duty - sa duha ka lalaking naaktohang nanulis sa usa ka public utility jeepney nga iyang nasundan diha's MJ Cuenco Avenue di pa lang gyud dugay). Nahimong tinahod nga mga dinapit ang pito sa Lunes nga edisyon sa BisrocKabataan, usa ka youth-oriented rock radio program nga gisibya sa 93.1 Smash FM diin ako mao ang co-anchor ni DJ Ram Dizon.

Ang maong pagdapit nahimo isip pagtamod sa usa ka hangyo sa mga pipila ka tigpaminawan sa maong tulumanon nga naintriga sa mga "seksing tirada sa Agadiers may kalabotan sa paglatid og kanta". Ang maong mga kanta gitagik ni Agadiers' main man Alaine. Tulo niining mga kantaha nakapalaksi na'g pagtagad sa mga Smashers. Kini nasukod pinaagi sa nagkadaghang airplay requests sa Mga Halok, Pagbakho, ug Gugma. Kining tulo ka mga kanta nahilakip sa usa ka album nga may ulohang "Adto Ta Sa Ngitngit" apil sa laing walo ka tracks. Mapalit ang album sa tag P150 diha sa Kahayag Café. Ang album launching mahitabo karong Disyembre 22 sa Handuraw Events Café.

Apan gawas sa ilang seksi nga tirada sa pagmugna og mga kanta, mas nilutaw ang ilang makatandog sa balatiang relasyon nga gisawhan sa ilang amahan - manager, driver, yayo, mentor. Gibugkos na kining tanan.

Sa live interview may duha na ka Lunes ang nakalabay, si SPO1 Agadier sa Carcar Police Station mipadayag nga siya usa ka "frustrated musician". Mao man gani nga kini iyang gipangita diha sa iyang mga anak nga salamat na lang kuno sa Kahitas-an nga mahiligon usab sa pagpanukar. Mas daling nahatagan og katumanan ang maong pangindahay.

Tungod niining maong set-up, susama ra'g nanglipang nang daan ang Empowerment and Reaffirmation of Parental Activities Training (ERPAT) program sa pangagamhanan sa dakbayan. Usa kini ka tulumanon nga nagpasabot sa papel sa mga amahan sa pagmatuto sa ilang mga anak.

"It was generally observed that most fathers only concerned themselves on how to earn a living to support the needs of their families disregarding the important role they play in child rearing," mao kini ang gisaysay sa usa sa mga pagtoon nga gitagik may kalabotan sa giduso nga programa sa buhatan sa Social Welfare and Services sa dakbayan sa Sugbu.

Si SPO1 Agadier naghupot sa prinsipyo sa pikas nga habig, ug kini tataw niyang gipuy-an. Sa iyang gipakitang pag-atiman sa iyang mga anak ug pag-umangkon, sama usab nga iyang gi-agni ang ubang mga amahan nga mosuporta sa mga tulumanon sa dakbayan.

"Fathers should actively take part in the upbringing of their children. Child rearing is a responsibility that should be shared by both mother and father," si SPO1 Agadier miawhag nga ang mga amahan magpakisayod ug manginlabot gyud sa mga kalihokan sa ilang mga anak.

Hugot niyang gibarogan nga papason na ang sayop nga pagtoo nga ang papel sa amahan limitado lang sa paghatag sa mga batakang panginahanglanon sa pamilya. Buot niyang matanom sa alimpatakan sa mga amahan nga ang ilang presenya ug partisipasyon sa mga damgo, tinguha, tingusbawan, ug suliran sa ilang mga anak, ilabi na gyud sa mga tuig nga nanagtubo ang linghod pa nilang mga hunahuna, mao ang singgit sa bag-ong panahon.