Musika: Matang sa komunikasyon

Mapasalamaton ko'g dako uyamot sa kainit sa suporta nga gipakita sa mga nagmahal sa mga bandang Bisaya niadtong nakalabay nga Tingog Bisaya event sa SSS grounds (November 30-Dec.2). Fayter, astig, hugyaw, di matabang, di matata, di matabas-tabas ang pagmahal sa Bisrocking community sa mga bandang The Agadiers, Agipo, Assembly Language, Gangrene, Indephums, Makadawa, Mantequilla, Ossified, Phylum, Stonestomp, D Kazins, Wet Slipperz, What's The Frequency? ug ang bag-ong kaplag nga Session of the Fighters. Salamat sa pagpaluyo sa 93.1 Smash FM Cebu's Rock Fortress/Home of Bisrockers, Touch Mobile, San Miguel Beer ug sa e+ productions - ang hinugpong nga pwersa nilang Mark Maceda, ug Tenggoy ug Wigi Colmenares. Ang duruhang naulahi mao'y nanag-unang mitabang pagsabwag sa konsepto sa pagbanda-banda dinhi. Karon nanglipang na ang maong pagpamugas. Rock on, Sugbuanon!

Announcement gikan ni Ann sa Bagnos Bisrock Clan. Duna'y Bagnos Bisrock Concert nga mahitabo karong December 9, Sabado sa Suba-Basbas gym sa Lapu-Lapu City. Ang manukar mao ang mga bandang Missing Filemon, Indephums, Blood of the Stone, Flirt, Anorexia, Ossified, Fervent, uup. Tag P50 ang tickets, available at the gate.

Greetings to Tribu Tuba Clan sa Catarman, Cordova labi na nilang Ash, Cero, Piong, Macao, Virus, ug Axelrose. From Archie. Greetings sad sa tanang Bisrocker nga astig kaayo og sa bandang Drift. More power sa Banat News. From Kent of Banilad. Greetings sa mga Bisrockers sa Lahug labi na nilang Dax, B2y, Brakle, Budi, Jr ug Eldon. Gikan ni tanshit.com. Hi pud sa tanang Bisrockers sa Babag 2, Naga nilang mimic, lucil, wendy, adel, gregy, carlo, longlong, onel, mahal ug sa tanang Bisrocker nga tigbuhat og pabuto. Rock on Smash!

Diay interaction gikan ni Ritchel aka Tomas Sumakwel sa [email protected]: "Ang usa ka awit kinahanglan nga ekspresyon sa iyang panahon. Mao gani nga ang Bisrock mao ang angay sa atong panahon kay nia ta sa alingisig nga epoch diin ang matag tawo nagpangita sa iyang kultural nga kailhanan (cultural identity). Ang mga melodramatic songs dili na haom sa atong henerasyon. Busa man gani nga makaingon ako nga "out of tune" na ang kawsa sa Cebu Pop Music kay wala man kini sagopa sa mga batan-on.

"Apan ang musikang Bisrock magbaton sab unta og social responsibility. Himoon siyang instrumento sa kausaban dili lang sa matag usa kondili sa katilingban. Unsaon nato pagsaway ang kamaot sa katilingban? Dinhi mosulod ang giingong poetic sensibility. Dili lang kay largohon pagsulti nga "kurakot ang atong gobyerno" tungod kay dili kana poetic nga pagkasulti. Gawas pa, igo lang ta nianang nanaway apan wala tay mahimong exponent for a change. Kahisgotan nako dinhi ang mga kanta sa Yano in the early 90s. Matataw nato ang ilang kawsa apan subtle kaayo kining pagkahimo diha sa ilang mga liriko. Mao usab ang sa E-heads. Maantigo si Ely Buendia sa poetry. Matikdi ang usa ka linya sa kanta niyang Huling El Bimbo. Tan-awa kon giunsa niya paggamit ang poetic element of irony niining linya: "At sa gabi nasagasaan sa isang maliit na eskinita." Ang irony dinhi mao nga duna ba diay maligsan niining gamay nga eskinita? Giunsa kaha diay pag-agi sa sakyanan nga nakaligis nga gamay man kaayo ang eskinita? Kon imong pangutan-on si Ely, iya ka lang kataw-an kay nasayod siya nga ang nangutana wala'y naantigohan sa poetry.

"Ang mga lirisista angay usab gyod unta nga masayod sa unsa'y lehitimong hilisgotan sa atong panahon. Hain na ta? Unsa kita? Asa kita paingon? Mao kini ang isukit sa lirisista sa dili pa siya mosulat og kanta.

"I love free verse. Ang akong mga winning works sagad free verse. Apan sa seryoso nga tinun-an sa pamalak, there is no such thing as free verse. Ang tanan ipasubay gayod og latid, balaod. Kay kon dili, walay mahitsura nga katahoman. Kon maohon, bisan unsa na lang diay'ng buloka sa pintal ang ihuwad sa pintor mahimo na diay'ng painting? Thing of beauty?

"Ang kadtong mosulat og liriko nga walay grammar angay sab nga masayod sa hustong grammar. Kon wala god ta masayod sa hustong grammar, dili ta makakuha sa gitawag og poetic license. Ang mga abogado bitaw maayo kaayong molighot sa balaod tungod kay nahibawo sila unsa'y balaod. Karon, kon magpasagad lang tag lighot sa balaod nga wa ta'y kasayoran niini, lagmit nga adto ta sangko sa presohan. Mao usab kining mga kanta nga wala magsubay og grammar.

"Bisrock should not cease to be a music. Mao ra ni pangindahay nako, Pinay. Kon abusohan god ang Bisrock, adto ta sangko sa laing school of music nga langas kaayo.

"Of course, we want to express. But the other thing is, we want to communicate. Unsaon man nato pag-communicate kon dili ta hisabtan?"