'Ang Pamana,' kahadlokan apan hugyaw

Dunay mga eksena nga pakugang sama sa nahauna nga mga filipino horror movies. Apan gipaniguro sa Fil-Canadian director nga si Romeo Candido nga ang labing una nilang proyekto sa Digital Sweatshop Inc. Production nga giulohan og "Ang Pamana or The Inheritance" usa ka talan-awon nga tataw nga makapanlimbawot sa balhibo apan ang kahadlok unya na mabatyagi sa higayon nga mahuman na ang pasundayag. Suma pa niya lahi ang mugna sa nahisgutan nga pelikula sanglit dunay bulok sa Hollywood ang istorya, ang editing, ang direction ug ang production mismo. Sa iyang pagmugna niining ambisyoso nga proyekto nag-curacha diha sa iyang hunahuna ang paggama og proyekto nga istoryahan ug hangpon gihapon sa umaabot nga henerasyon.

Gigama dinhi sa Pilipinas ug sa Canada ang "Ang Pamana" nga gilangkuban sa mga Fil-Canadian ug mga Filipino actors and actresses nga kasagaran nga mga beterano sa theater o entablado. Kasaysayan kini sa De Jesus family nga nanimuyo sa Canada kinsa nakadawat og taho nga mipanaw ang matriarch sa pamilya dinhi sa Pilipinas nga si Lola Nena. Ang magsuong Johnny ug Anna maoy gipadala isip representante sa pamilya alang sa pagbasa sa kabilin sa ilang apohan. Sa ilang pag-abot sa Manila, nahimamat ni Johnny ang iyang ig-agaw nga si Vanessa, batan-on nga socialite nga susama kaniyang nagumon sa gidiling drogas. Human sa pagbasa sa kabilin, nahibaw-an nila nga silang tulo-Vanessa, Johnny ug Anna maoy gibinlan sa gipanag-iyang farm sa pamilya nga nahimutang sa Bulacan.

Human sa duha ka oras nga byahe nahiabot ang mag-agaw sa 19-hectare property sa pamilya nga nahimutang halayo sa modernisasyon. Dinhi magsugod ang mga kulbahinam nga mga eksena diin nagkadaiyang mga hitabo ang magduwa sa hunahuna sa tulo ka mga apo. Mga dili ingon nato ang magpakita ni Johnny, mga ispirito nga sa pagtuo niya bunga lamang sa huna-huna sa iyang apohan kaniadto ug nga karon iyang gipaningkamotan og salikway isip produkto lamang sa iyang imahinasyon tungod sa pagkagumon niya sa droga. Dunay daghang mga rebelasyon, dunay daghang mga pangutana nga nagpangita ug tubag, dunay mga tinaguan nga mabutyag ug dunay mga kamatuoran nga mas haom nga ilubong na lamang sa kalimot. Kining tanan maoy mohadla sa mga tumatan-aw sa "Ang Pamana" nga unang mihugyaw sa mga mitambong sa 26th annual Louis Vuitton Hawaii International Film Festival niadtong Oktubre.

Usa sa mga eksena matud pa nga angayan atangan mao ang paggawas sa "manananggal' gumikan kay base sa naobserbahan, walay puas ang singgit sa mga nakakita na niini. Hugyaw usab matud pa ang gipakita nga pag-arte ni Phoemela Baranda isip ang kontrabida nga si Vanessa. Gani matud pa ni direk Candido, mausab ang pag-ila sa publiko kang Phoem human unya sa pagsalida sa nahisgutang pelikula tungod kay isipon na unya siya nga aktres. Gawas pa labihan niya ka maanyag sa maong lilas bisan asa nga anggulo tan-awon. Dili lamang ang direktor maoy midayeg ni Phoem kun dili hasta usab ang mga movie critics sa Canada ug Hawaii.

Luyo usab sa kalampusan nga inanay na nga natagamtan sa maong pelikula, gibutyag sa direktor ug sa producer ang matud pa pagtumaw sa mga ingon nato samtang gihimo nila ang maong pelikula didto sa 150-year-old ancestral house sa San Miguel Bulacan. Suma pa ni Caroline Mangosing, producer ug mao usay midala sa papel nga Lola Nena, nga samtang nag-shooting na sila, usa sa iyang mga staff ang miingon nga dunay babaye nga namahayag nga kinahanglan nilang mag-ampo una. Apan midisisyon si Caroline nga nianang pagkabuntag na lang. Pagkasunod adlaw samtang didto siya sa comfort room ug nahunahuna niya nga nakalimot na usab sila og ampo, kalit lang nga miabli ang pultahan, nakapahibulong ug nakapahadlok kini kaniya sanglit ang maong pultahan dili basta-basta nga moabli ug gikinahanglan pa nga itulod og kusog. Si direk Romeo usab miingon nga kadlawon nga dako nakakita siya ug ang ilang driver og white lady. Laing insidente suma pa niya mao nga samtang nag-shooting na sila ilawom sa usa ka shade nga gihimo kaniadtong patyanan sa mga Hapon sa ilang bihag nga pinoy, kalit lang nga dunay bugnaw nga hangin nga milabay sa ilang nahimutangan. Dili katuohan matud pa niya sanglit summer dihang gihimo nila ang maong lilas ug labihang inita sa palibot ug gani puro sila gipaningot niadtong tungora.

Daghan pang mga kahibulungan nga mga panghitabo nga nakakumbinse kaniya nga tinood diay ang istorya kalabot sa mga di ingon nato. Suma pa niya sa Canada giisip nga mugna-mugna lang ang maong mga istorya apan human niyag mugna sa "Ang Pamana" nausab na ang iyang pagtan-aw sa maong mga sugilanon kalabot sa kapre, white lady, manananggal ug uban pa.

"Ang Pamana usa ka pelikula nga gihaom dili lamang sa mga balikbayan kun dili sa tanan nga nakabati sa susamang mga sugilanon gikan sa mga katiguwangan. Usa ka proyekto nga gihatagan og "A rating" sa Cinema Evaluation Board. Labaw sa tanan, usa ka pelikula nga magmatuod unsa ka 'world-class" ang talentong pinoy.

Ang Pamana showing na sa mga sinehan sa Sugbo sugod kagahapon.