Manggiuwawon nga Kukuk

"Once your a DJ, ngita gyud kag microphone. As long as naa pay modawat nako as a DJ, I will stay as a DJ." Ni gamay wala misanting sa alimpatakan sa usa ka simple nga tawo kaniadto ang pagpamaba. Niadto'ng bata pa lang, dili kaayo siya mahiligon sa mga musika. Apan sa dihang nagsugod na siya og kuyog-kuyog sa iyang mga higala sa usa ka disco mobile, napukaw ang dugay nang nagpahipi nga interes sa pagpanibya ni Jonathan, nga mas naila karon isip Tony Kukuk sa numero uno'ng istasyon, 91.5 Hot FM!

Dise otso anyos pa lang, sugod nang gibaid ni Jonathan ang bag-o lang niyang nadiskubrehan nga talento. Tuig 1995, milanog na sa kahanginan ang niadto'ng maabi-abihon nga tingog ni Jonathan, nga unang naila sa ngalan nga James Carlos. Nalingaw gayud siya sa iyang pagpanrabaho tungod usab sa mga bag-ong higala nga iyang nahimamat. Pero dili lang kadto puno sa lingaw-lingaw kay tuod man, kadto'ng tanan dili usab sayon para kaniya.

Sa susama'ng tuig, nagtungha siya isip 2nd year college student sa kurso'ng Computer Science sa Southwestern University. Apan taliwala sa kakapoy ug kalisod nga iyang nahiaguman, mi-gradwar si Jonathan sa nahisgutang kurso. Wala lamang siya milungtad sa maong pagtungha, milungtad usab siya sa iyang unang trabaho. Gani sukad siya mitrabaho isip magsisibya, hangtod karon mi-gradwar na lang siya, usa gihapon siya ka magsisibya.

Kining tanan niyang mga kalampusan bunga lamang sa usa ka tinubdan, ang iyang pagmahal sa trabaho'ng wala niya damha. Kining pagmahal ug pagka-responsable sa trabaho ni Jonathan makita gayud nato sa mga istasyonan nga iyang nasudlan. Sa tulo ka istasyonan diin siya mitrabaho kaniadto ug karon, kanunay kining mag-una sa mga gusto sa mga tigpaminaw. Pero mapaubsanon'ng butyag ni Jonathan sa Banat Hugyaw nga: "I think mo number 1 ang station because of teamwork. As FM station, dungan gyud namong gituman ang plano sa station, ang himuon kining number 1. Kining among pag-number 1 tungod usab kini sa mga listeners, pasalamat gyud mi nila."

Tuod man, dili gyud layo sa kasing-kasing sa atong magsisibya nga si Tony Kukuk ang iyang mga tigpaminaw. Lingaw pa niya'ng gihinumdom ug gisaysay sa Banat Hugyaw ang nahitabo sa iyaha kaniadto sa usa niya ka tigpaminaw. Nakalitan ug nahimuot na lang siya sa pagbisita sa iyang tigpaminaw, kini tungod kay sa ilang panagkita sa istasyonan, iya diay kining magtutudlo sa unibersidad diin siya nagtungha.

Apan dili lang kana ang usa ka panghitabo nga dili gyud niya malimtan kung kabahin man sa iyang mga tigpaminaw ang hisgutan. Sa iyang maanindot nga tingog nga milanog sa kahanginan, usa na ang espesyal nga babaye karon sa iyang kinabuhi ang naagni niini. Ang iyang kapikas sa kinabuhi karon, usa sa mga suki nga tigpaminaw niya niadto. Nagsugod lang ang tanan sa pagtawag-tawag ug pagbisita niadto sa iyang asawa karon sa istasyonan hangtod miabot na ang panahon nga nagkahigugmaay silang duha.

Sukwahi sa pagtuo sa uban nga dili magdugay ang sama niana nga relasyon, ang relasyon nga giumol ni Tony Kukuk ug sa iyang asawa milungtad na og pito ka tuig. Sa pagkakaron, adunay duha ka bibo'ng mga anak si Tony Kukuk ug para kaniya, ang pamilya ang labing -importante sa iyang kinabuhi. Samtang iya usab mahulagway ang iyang pamilya nga usa ka simple ug mura sad og FM. Kini tungod kay mahiligon man usab sila sa musika.

Apan dako gayud ang pagbalibad ni Tony Kukuk kung mahitabo man sa umaabot nga panahon nga mahisulod usab sa ganghaan sa radyo ang iyang duha ka pinalangga'ng anak. "No! Ok lang siguro kung lalake. Dili ko ganahan kay luoy kayo tan-awon ang babaye. Sa station man gud, usahay pressured kaayo ka. May lang og lalake kay makaya ra," dugang pakig-jamming ni Tony Kukuk.

Dugang pa niya nga gusto lang niya ihatag ang tanang maayo para sa iyang mga anak. Ang magmalipayon sila sa ilang mga gusto unya sa umaabot. Gani isip amahan, inigsuon ang iyang pamaagi sa pagdala sa iyang mga anak. Para kaniya, kini aron nindot ang ilang pamilya kay suma pa niya nga anaa man gyud nay panahon nga mahadlok ang mga anak moduol sa ilang amahan ug inahan. Para kini malikayan, mao kini ang nakita nga pamaagi ni Tony Kukuk.

Sa laing bahin, sama sa kadaghanan dako gayud ang kalahian sa atong naila nga Tony Kukuk sa kahanginan ug sa Tony Kukuk luyo sa maanindot nga tingog sa kahanginan. Atong mahulagway si Tony Kukuk nga komedyante ug dili mauwaw apan luyo sa bugal-bugalon nga tingog, mitago ang usa ka hilumon nga si Jonathan. Siya mahigalaon ug pasensyoso usab hilabi na sa mga dili kaayo maayo nga mga callers. "As a DJ man sad, kaw gyud ang mag-adjust. Kung imo sila sabayan, magka-misunderstanding ra unya mo. Lainon sad nya nila og sabot. Maong magpubos lang gyud, adjust lang," pagpaambit ni Tony Kukuk.

Sa menos onse na niya ka tuig isip DJ, nagpabilin gihapon ang kakugi, pagmahal ug pagkamahiubasanon ni Tony Kukuk sa iyang pagkamagsisibya. "Mas bilib gyud ko sa ubang DJ, sila ang akong gi-idol. Sa uban nga gusto mag-DJ. paminaw lang mo sa different Dj's aron inig apply nimo, nana kay knowledge gamay. Practice lang gyud. Hardwork ra gyud na. Kung mag-hiring, apply. Basin madawat, wa lang damha DJ na pud ka," pagtapos ni Tony Kukuk sa pakig-jamming niya sa Banat Hugyaw.

(Inyong mabati ang manggiuwawon nga Kukuk sa Hot FM! matag alas nuwebe sa buntag hangtod ala una sa hapon)