Yeng, sunod nga concert queen?

Napanlantawan nga dili imposibli nga malakip sa top six si Rosita Bareng sa nagpadayon nga Pinoy Dream Academy (PDA) sa abs-cbn. Kini tungod kay labihan na niya ka sikat ug nagkalig-on ang iyang pagpanimpad diha sa academy.

Ang pangutana, si Rosita ba maoy mahimong Grand Dreamer? Walay makatubag sa pagkakaron.

Hinoon nagkanayon ang PangMasa nga pagkakaron duha na ka mga jurors ang namahayag nga si Yeng Constantino ang dunay dakong potensyal nga mahimong concert queen.

Bata pa usab si Yeng, 18 anyos busa daghan pa ang mapaabot niya. Samtang 25 na si Rosita. Lisod na nga i-package isip "the New Aunor."

Yong ug Monique

Tinood ba ang taho nga sa ilang kabatan-on kaniadto nalambigit sa usag usa sila si international designer Monique Lhuillier ug Yong Larrazabal, nga karon kapikas ni kanhi Viva Films actress Donna Cruz?

Kini maoy nasagap nga pangutana sa PangMasa. Parehong tubong Cebu sila si Monique ug Yong. Pareho usab nga ilado ang ilang mga pamilya dinhi sa Sugbu.

Bag-ohay lang mipauli dinhi sa Pilipinas si Monique kauban sa iyang foreigner-husband. Dinhi ba sa Pilipinas nadiskobrehan ni Monique nga mabdos siya sa iyang unang baby?

Laing nasagap nga tsika sa PangMasa mao nga dunay miduol ni Monique aron mohimo og commercial apan iyang gibalibaran tungod sa iyang pagsabak.

Samtang si Donna usab mabdos karon sa iyang ikatulo nga anak. Bisan og mihunong na siya sa paghimo og pelikula, inila nga ophthalmologist sa Cebu si Yong.

Vina daghan og suitors

Daghan matud pa ang nanguyab karon ni Vina Morales suma pa sa tsika ni Shaina Magdayao ngadto sa PangMasa ning bag-o lang.

Apan matud ni Shaina nga sa iyang nahibaw-an walay giseryoso si Vina sa tanang naninguha karon sa iyang gugma.

Sa dihang gipangutana kon gusto na ba siya nga maminyo ang iyang Ate Vina, si Shaina mitubag: "Opo naman." "This time, nasa edad na siya." Vina's in her 30s.

Kahinumduman nga si Shaina kaniadto maoy mitagna nga dili magkadayon ang iyang ate ug ang kanidto niining uyab nga si Congressman Miguel Zubiri. Minyo na si Zubiri sa dili taga showbiz.

LT gilisdan sa iyang role

Bisag naglisod, wala moreklamo si Lorna Tolentino sa iyang pagdawat sa role nga inahan ni Angel Locsin sa "Mano Po 5: Gua Ai Di (My Only Love) sa Regal Entertainment.

Nasayran sa PangMasa nga gumikan kay Chinese siya sa maong pelikula, gipatuon siya og maayo og Fokien language ug sa samang higayon mag-Tagalog siya nga dili diretso ug sa tonong Chinese.