Bb. Boljoon 2006

Onse ka mga kandidata. Usa ka korona. Duha ka oras. Luyo niining tanan, gipurong-purongan ang bag-ong Bb. Boljoon niadtong Biernes sa gabii sa hamugaway nga Boljoon Gym. Ang maong indigay maoy usa sa mga highlights sa pagsaulog sa kapistahan sa maong lungsod kansang patron mao si Nuestra Señora del Maria Patrocinio. Ang mga kandidata mga representante sa nagkadaiyang barangay sa nahisgutan nga lungsod. Human sa duha ka oras nga panagtigi, napili nga mananaug si candidate number two, Crisagin Pelare. Siya usab maoy milangkat sa mga importanteng minor awards sama sa Miss Bench Body ug Best in Swimsuit.

Ang pagpili nila sa Bb. Boljoon susama sa format sa Miss Earth beauty pageant diin ang mga kandidata patan-awon og hulagway ug pangayoan og panahom kalabot niini. Ang nakalahi lang mao nga sa Miss Earth mga hulagway kabahin sa pagpanamastamas sa kalikopan samtang ang Bb. Boljoon mga pambato nga tourist spots sa maong lungsod. Ning bahina pilion ang five finalists nga maoy mag-ilog sa korona pinaagi sa pagtubag sa usa lang ka pangutana.

Alegre ug mabulokon ang nahisgutang indigay. Hugyaw usab ang mga gowns nga gisul-ob sa mga kandidata sanglit ang mga designers gikan sa dakbayan sama nila ni Allain Ponte, Humberto Villegas ug Brian Aloquin. Bongga usab ang naglangkob isip mga hurado sama sa mga nabantog na usab nga ngalan sa Cebu fashion circle sama nila ni Protacio, Edwin Ao, Chicoy Tomol ug Roger Alferez sa nabantog na nga Models Association of Cebu, ABS-CBN talent Ogie Diaz, kanhi in-demand print and ramp model Malil Borromeo ug Hugyaw editor Ryan Mark.