Ug misidlak si 'White Star'

Human siya milugwa dinhi sa Banat Hugyaw niadtong Mayo, misamot ka mabulokon ang mga paningkamot ni Izarzuri (spanish word sa white star) Vidal. Siya kadtong batan-on nga sa pangidaron nga 17-anyos, nagpakugang sa mga langyaw nga bisita sa businessman nga si Peter Collin atol sa birthday sa naulahi sanglit sama og beterano na siya nga opera singer. Ang nakapahugyaw mao nga wala siyay formal training sa broadway o opera ug igo lamang siyang maminaw sa mga nag-unang ngalan sa maong kalibutan aron tukma ang iyang paglitok sa mga pulong banyaga-Italyano, Pranses ug uban pa. Gani ang komento sa mga foreigners nga nakadungog niya mao nga kun manimpad siya sa gawas sa nasud sigurado nga duna siyay mahayag nga ugma.

Ug daw mosubang na ang mahayag nga ugma nga gipamulong sa maong mga bisita. Kini tungod kay sa iyang pagbisita og balik sa Banat Hugyaw niadtong milabay nga semana gibutyag niya nga nagpaabot na lamang siya nga mahimong pinal ang iyang pagtungha sa gawas sa nasud partikularmente sa Yale University.

Apan samtang wala pa matino ang maong kalambuan gibutyag ni Zsarie (iyang angga) nga maayo ang lakaw nila didto sa iyang amahan, ang banggiitang visual artist nga si Mar Vidal, tungod kay daghan sila og nahimamat nga mga inilang tawo nga naghuna-huna usab nga mugnaan si Zsarie og mga oportunidad. Una niini, ang mao nilang lakaw gitumong aron mo-guest siya sa "Walang Tulugan with Master Showman" sanglit birthday sa host niini ug inilang star builder nga si Kuya Germs. Ang maong guesting nasundan pa og duha ka higayon.

"Pagkanta nako sa birthday ni Kuya Germs daghan ang na-surprise kay nindot kono ko og tingog, nga ang akong gikanta ato kay mga kanta man sa opera," tug-an pa ni Zsarie sa Banat Hugyaw. Ang bantugang mang-aawit ug cebuana nga si Pilita Corales usa sa labihang nakapakpak sa gipakita niyang kahanas sa maong matang sa mga kanta.

Didto usab sa maong birthday celebration ang kanhi first lady nga si Imelda Marcos nga perte usab nga nakadayeg ni Zsarie. "Katulo gani ko gigakos ni Madam Imelda kay nalipay siya nga nibalik na usab kono ang classical music." Nahimamat usab nila si Regal matriarch Mother Lily Monteverde nga maoy miabag sa ilang pagpuyo didto. Busa, gumikan sa kainit sa pagdawat sa nahisgutang mga personalidad, laraw karon nila ni Kuya Germs ug Pilita nga magmugna og solo concert alang ni Zsarie didto mismo sa Music Museum karong umaabot 4th week of January 2007. Pagkakaron nagpaabot pa usab si Zsarie sa kumpirmasyon kun mahinayon ba ang iyang guesting sa umaabot nga fashion show ni Monique Lhuillier didto sa Manila ug sa umaabot usab nga ASEAN Summit dinhi sa Sugbu.

Karong November 21 mobalik na usab si Zsarie sa kauluhan isip guest performer sa usa ka event diin dunay gibana bana nga 1000 ka international delegates unya. Si Zsarie maoy napili sa mga organizers human siya nasigpati nga mikanta sa Golden Wedding Anniversary celebration ni Engr. Jimmy Pajara ( ang contractor sa Marcelo Fernan Bridge) didto sa Manila Hotel.

Ubay-ubay pa ang naka-line up nga imbitasyon alang ni Zsarie. Ug niining tanan malaumon siya nga matuman ubos sa pagbulig sa Ginoo.