Nina Dolino, way batasan

Napuno karon sa libak si Nina Dolino ang co-host sa Wazz Wazz Up sa Studio 23 nga bag-ohay lang usab nalambigit ni Archie Alemania, hinungdan sa pagselos ni Mickey Ferriols.

Ang tsika ni Manay Cristy Fermin sa PangMasa mao nga gisilagan karon si Nina sa talent coordinator nga si Bamba tungod kay gibinastusan kini niya sa telepono dihang gisigihan siya og text ug miss call gumikan kay wala pa siya moabot sa dapit alang sa anniversary show sa Wazz Up.

Nasayran nga si Nina na ang isunod nga kuhaan sa camera apan wala kini mutubag busa nagkabuang si Bamba. Sa dihang nakontak na siya, matud pa ni Manay Cristy nga perteng pamalikas sa dalaga lakip na ang "Put-na mo!" Matud ni Bamba, "Masakit po talaga ang ginawa ni Nina sa akin, pinagmumura niya ako, samantalang ginagampanan ko lang naman ang trabaho ko.

"Yun talaga ang trabaho ng TC, ang mag-follow-up, dahil kapag may nangyaring aberya, e, ako naman ang puputukan ng sisi at hindi siya.

"Napakaraming artista na po ang nakatrabaho ko, pero ngayon pa lang ako nakatagpo ng tulad niya na kung magmura ng tao, e, parang siya ang nagpapakain sa akin!" sumbong pa ni Bamba.

Matud ni Manay Cristy naglagot si Nina tungod kay gipabahaan siya og texts ingon man miss calls ni Bamba. Hala wala siya malipong?

Midugang si Manay Cristy nga sayop si Nina bisan unsaon og tuwad-tuwad tungod kay kon dili siya buot nga magbaha ang texts angayan nga magpahibawo o motubag siya sa mga tawag tungod kay una sa tanan nasayod siya nga dunay okasyon nga angayan nga tambungan.

Miss Malaysia, partner ni Alfred

Sa November 12 na ang sure date sa paglarga ni Alfred Vargas para sa taping niya sa "Now and Forever" didto sa Malaysia, kauban si direk Mac Alejandre. Busa gituman ni Alfred ang iyang saad nga mosayo og promote sa iyang pelikula nga "Gigil" nga maoy launching movie ni Katrina Halili.

Kagahapon sayo nga mimata si Alfred alang sa guesting niya sa "Unang Hirit" promoting Gigil. Usa ka buwan nga mawala sa nasud si Alfred busa wala siya sa opening day sa ilang pelikula karong November 22.

Nasayran sa PangMasa nga usa ka computer technician ang role ni Alfred sa nahisgutang soap, nga moadto sa Malaysia ug didto magubot ang iyang kinabuhi human unya niya mahibalag si Miss Malaysia 2006 nga maoy iyang leading lady.

Dugang tsika sa PangMasa nga daghan pang mga Malaysian celebrities nga apil sa maong project ug isalida kini sa GMA Network ingon man sa Malaysian TV nga co-producer sa nahisgutang project.

Matud ni Alfred dili ra kaayo sila magproblema tungod kay makamao mo-English si Miss Malaysia busa ang international language ang ilang medium of communication sa maong soap.

Hala dili kaha magselos si LJ Reyes ni Miss Malaysia? Daling mitubag si Alfred nga dili tungod kay nag-istorya na sila ni LJ kalabot niini ug gani nagsabot man sila nga mamahimong mobisita niya didto sa Malaysia ang dalaga.

Labaw sa tanan matud ni Alfred, si LJ ang "Miss Alfred" sa iyang kinabuhi nga gikatakdang kuyugan unya niya sa New York aron magsaulog sa bag-ong tuig kauban ang inahan sa dalaga.