Kadaugan sa Sugbu

Malampuson nga naugbok sa Sugbuanong si Maria Donna ang bandira sa nasud human niya nalangkat ang labing taas nga titulo sa 2006 Shanghai Music Festival didto sa China niadtong Domingo sa gabii. Si Maria Donna nga lumad nga taga barangay Basak ning dakbayan milupad paingon sa China niadtong milabay nga Miyerkoles kauban ang lain pang Sugbuanon nga si Jimmy Marquez alang sa nahisgutan nga kompetisyon. Si Jimmy nga taga Toledo City maoy silver medalist usab.

Makahuluganon ang kadaugan nila Maria Donna ug Jimmy tungod kay kini ang unang higayon nga mituyhakaw ang talentong Pilipinhon sa nahisgutan nga music festival sukad kini gisugdan siyam na katuig ang milabay.

Si Baste Balboa Jr. General Manager sa SARUA Records Corporation diin contract artist si Maria Donna maoy mipahibawo sa Banat Hugyaw sa maong mabulokon nga balita, pipila ka minuto lang ang milabay human personal nga nanawag ang naulahi kaniya nga naghilak sa kalipay niadtong Lunes sa tungang gabii.

"Bag-o pa gyud siya nanawag nga naghilak kay dili siya makatuo nga siya maoy midaug," nagkanayon si Balboa sa iyang gipadala nga mensahe ngadto sa Banat Hugyaw. Suma pa niya si Maria Donna gikatakda nga muabot sa Manila ugmang adlawa ug inig Miyerkoles mopauli dinhi sa Sugbu. Nasayran nga 25 ka mga contestants gikan sa nagkadaiyang mga nasud sa Asya ang nagtigi sa nahisgutang kompetisyon. Ang mga kantang 'Only When Our Hearts Unite" ug "Make Me Whole" ginama sa banggiitang si Vehnee Saturno ang giawit ni Maria Donna didto sa maong indigay.

Niadtong Martes sa interview sa Banat Hugyaw, si Maria Donna namahayag nga buhaton niya ang tanan niyang mahimo apan ang pagbuot sa Ginoo maoy matuman. Suma pa niya, mapildi man siya, magmalipayon gihapon siya tungod kay dako na kaayo nga garbo alang kaniya ang nahimong pambato sa nasud sa usa ka prestiyosong music festival.

Sila si Maria Donna ug Jimmy daan na nga managhigala sanglit pareho sila nga nabaid ang talento kaniadto pa diha sa nabantog na kaayo nga USJR Dramatics and Cultural Ensemble. Si Donna mihunong sa pagtungha sa iyang kurso nga mass communications ug milibot sa lain-laing mga dapit sa Asya samtang si Jimmy mihuman sa mao gihapong kurso ug misalmot sa Search for a Star in a Million sa ABS-CBN sa mibalay nga tuig diin siya nahimong second runner-up. Ubos siya karon sa pagduma sa Viva Artists Agency ug regular member sa "Champions" sa ASAP 06.

Si Maria Donna ang tingog luyo sa nabantog na nga kanta sa Kabisay-an ug Mindanao nga "Pastilan Bay" nga nalakip sa iyang debut album sa SARUA Records nga dunay career single nga "You Made it Happen." Suma pa ni Balboa mihataw ang unang album ni Maria Donna ug karon niining mao niya nga kadaugan isunod na dayon ang pag-release sa iyang second album lukop nasud na. Nasayran nga gawas ni Saturno, daghan pang mga iladong ngalan sa natad sa musika ang misuwat og mga kanta alang sa second album ni Maria Donna. Sa artikulo kalabot ni Maria Donna nga napatik dinhi sa Banat Hugyaw niadtong Mayo, nasayran nga ang nahisgutan ang kamagwangan ug nag-inusarang babaye sa tulo ka managsuon. Matud pa niya sais anyos pa lamang siya ganahan na siya nga mokanta apan tungod kay maulawon man siya wala siya misalmot sa mga singing contests. Diha na sa pagtungtong niya sa kolehiyo ug nasulod siya sa Dramatics club sa USJR nga kaniadto gidumala ni Dr. Milagros Espina, nabaid si Maria Donna ug nakabaton og pagsalig sa kaugalingon.

Sa tuig 1999 milarga siya ngadto sa Macau ug nag-singer sulod sa tulo ka tuig. Niadto lang 2001 siya mibalik sa nasud ug sukad niadto nahimo siyang lead vocalist sa bandang One in Him. Sa nagkalain-laing dapit sa probinsiya mitukar ang maong Christian-based band, hangtud nakaplagan ang potensyal ni Maria Donna nga mamahimong sikat nga soloist. Kahinumduman nga sa wala pa musulbong ang ngalang Maria Donna, gipanagna nang daan ni music icon Jose Mari Chan, nga siya na ang " next big thing" sa music industry human usab sila nag-duet niadtong Enero.

"I was so honored and proud atong panahona but gikulbaan sad basin mayabag ta," sulti pa ni Maria Donna kabahin sa maong duet. Giangkon niya nga dili parehas kaniadto nga pwede ra siyang maglakaw-lakaw nga magbinugoy nga walay make-up. "Ingun ani ko bugoy, di class apan dili anti-social. I'm just true to myself. I am what I am."