Loyal si Heart ug Jericho

Wala na mokomentaryo pa si Ms. Angeli Pangilinan-Valenciano kabahin sa isyu nga walay offer nga gihatag ang GMA-7 nila ni Jericho Rosales ug Heart Evangelista (duha sa mga talent nila sa Genesis Entertainment).

Gitin-aw hinoon ni Ms. Angeli ngadto sa PangMasa nga tinuod gyud nga walay kontrata ang duha sa ABS-CBN, gawas kang Heart nga regular nga VJ sa "MYX," apan nagpabilin gihapon silang loyal sa Kapamilya network.

Gani, sa dihang gikuha si Heart para mag-host sa "Philippine Idol" matag gabii para sa updates niini kabahin sa mga finalists, nananghid pa kini sa ABS-CBN.

Gibutyag usab niya nga adunay offer nga soap para ni Jericho ug Heart sa ABS-CBN, aduna usay usa ka producer nga mitanyag og teleserye nga adto pa sa Malaysia i-shoot, pero wala gihapon kini nila dawata kay gawas sa gibasa pa nila og maayo ang script, gi-enjoy usab karon og maayo ni Jericho ang iyang music. Gani excited kaayo siya sa nindot nga pagdawat sa iyaha sa dihang nalakip siya sa US concerts nila ni Kuh Ledesma ug Christopher de Leon ning bag-o lang.

Daghan usab og projects nga giatiman karon si Heart. Sunod semana, mag-taping sila ni Jericho sa usa ka episode sa "Your Song" para sa ABS-CBN.

Sarah molangyaw na sab

Daghan na ang nagpangutana kung unsa ang sunod nga project nga ihatag sa ABS-CBN o sa Viva Films kang Sarah Geronimo karong iya nang napamatud-an nga kaya niya'ng modala sa iyang kaugalingon'g show human malampuson nga mitapos ang "Bituing Walang Ningning."

Apan nasayran sa PangMasa nga hayan next year pa matubag ang maong pangutana ug sa mga fans ni Sarah para sa bag-ong project nga ilang gihuwat. Kini tungod kay aduna pay request nga balikon ang malampuson nga concert ni Sarah, ang "The Other Side of Sarah US Tour."

Maong pagkahuman gyud sa promo sa iyang bag-ong album sa Viva Records nga "Being" molangyaw na usab si Sarah sa unang semana sa Nobyembre ning tuiga. First stop niya sa November 10 sa Anaheim, California; November 11 sa Washington; November 12 sa Las Vegas ug sa lain pang mosunod nga mga venue.

Magtukod pud og restaurant

Nagkat-on usab karon ang anak sa estranged couple nga sila si Gina Alajar ug Michael de Mesa, si Aj o Andrew J. Eigenmann og luto tungod kay plano usab niini nga magtukod og restaurant. Pero wala kini nagpasabot nga iya lang talikdan ang pag-artista.

Kasamtangan'g nag-artista karon sila si Aj ug ang duha niya ka igsuon nga sila si Geoff ug Ryan Eigenmann. Apan kanilang tulo, si Geoff gyud ang labing-busy. Uban sa cast sa padayon'g gipasalida nga blockbuster movie sa Star Cinema karon si Geoff, ang "First Day High."

Bisan pa man og giangkon ni Aj nga buwag na sila sa kanhi niya uyab nga si Dennise Laurel, nagpabilin gihapon silang higala sa naulahi. Tuod man, nindot man usab ang naumol nga relasyon sa duha. Gani, hangtod karon, nagdahom gihapon sila nga sila ra gihapon ang magkadayon sa katapusan.