What's The Frequency?

(pinaymangatkatay.multiply.com, www.bisdakzoundz.blogspot.com)
Naghupot og baruganan sa pagtuboy sa paningog nga Bisaya diha sa natad sa musika, si Ramil Dizon nga mas nainila sa kahanginan nga si "DJ Ram" kaniadto nagduha-duha pagpalanog sa maong katuyoan sa kahanginan tungod sa iyang kamanggiuwawon.

Kontento na siya sa pagkuri-kuri sa computer lakip na ang control table alang sa iyang kaubang si Bré Ambungan isip technician. Wa niya damha nga sugod pa lang kadto sa usa ka misyon nga naghuwat mapalapdan, mapatas-an, ug mapaladman. Sa dugay nga panahong pagkumbinsir ni Bré ug sa lain pang mga kaubanan sa industriya sa pagpanibya, karon usa na si DJ Ram sa mga tingog nga labing gipaminaw. Kakurambos si Bré, ilang gipadagan kining usa sa mga malampusong youth-oriented programs sa kahanginan nga nagduso sa paningog nga Bisaya rock - ang YourVoice, YourChoice Tingog Kabataan - sa 93.1 dyWF Smash FM (Cebu's Rock Fortress).

Kay usa man usab siya ka karaang rockista nga nakasaksi sa mga kinabuhi sa mga music geniuses sa karaang panahon nga giguba lang sa pag-abuso paggamit sa drugas, dili na kini buot pang makita ni Ram sa mga kabatan-unan karon maong iyang gipaningkamotan nga aduna'y tulumanon nga magsilbing medium alang sa paghatod og kabag-uhan sa pagtratar sa mga Bisayang huni ginamit ang rock genre.

"I feel for that great need to introduce a medium that would in its rippling effect lead to a paradigm shift on the community's reception to Bisaya music. Nga dili sila baduyan, dili lud-on, dili kornihan maminaw og Binisayang kanta. Ato gud ni. Angay ba diay ning ikauwaw?," mao kini ang iyang giladlad nga hagit sa bag-ong panahon sa natad sa pang-musika.

Nahimamat nako si DJ Ram sayo ning tuiga sa dihang gihatod nako ang akong kaugalingon sa disc jockey's booth sa Smash aron kahatagan og pagtagad ang usa ka hangyo sa usa sa akong magbabasa kinsa tigpaminaw usab sa ilang tulumanon. Tapad sa iyang kakumbuya nga si Bré Ambungan, si DJ Ram milakbit-saysay nga ang iyang kaagi nahisama'g manalagna nga wala dawata sa iyang kaugalingong yuta. Hinungdan man gani nga gidala niya ang maong kawsa dinhi. "Makalagot kaayo sa amo-a sa Ormoc, wala ko gyud ni mabuhat didto imbis taga didto ko. Diri hinoon sa Sugbo, diri gyud hinoon ko naningkamot motuboy sa Bisayang musika, nya dinhi gidawat akong panglantaw ug gitahud akong mga paningkamot," matud pa niya.

Niadtong Septiyembre 27, sa malampusong Bisrock Rakrakan (ala Woodstock) alang sa kasaulogan sa ika-39 nga anibersaryo sa dyLA, literal nga milupad si Ram sa ilang pasundayag kauban ang iyang bandang "What's The Frequency?" Nagtaud siya'g itom nga pako nga daw usa ka anghel sa kamatayon, apan wala kini niya buhata nga nagdala og laksot nga impresyon. Si DJ Ram usa ka aktibista, gikan sa pagmartsa ug paghigda sa kadalanan ngadto na sa sulod sa disc jock's booth, ug ang maong mga pako simbolo sa iyang pagsuporta sa Bisaya rock; iyang hugot nga gisaway ang mga estasyon nga nagpatukar og mga piniratang CD nga iyang gihulagway nga "platinum sa Colon" ug labi na niadtong kusog kaayo mo-remix. "Kadtong pako simbolo to's paglupad unta sa mas hataas pang dimension sa Bisrock, pero naa may mga hulga sa pagpanukad pa lang daan niini. Mananghid unta sila sa nagbuhat sa kanta kon mo-remix. Insulto man na's mga Bisaya nga mga talents. Kita-kita ra gud diri. Wa'y unay," mao kini ang gibalik-balik niyang panawagan mata'g tikang niya's kahanginan.

Ang WTF nakamugna na og upat ka kanta - ang Royal Rumble, For Richer and Poorer, Lover's Burden ug ang HHH (Kumusta Na) nga maoy unang nakatilaw og airplay. "We employ emo, punk, and alternative for styles. Kung maminaw ka sa among mga songs, maybe makatawa ka because of the lines, but all these songs gi-base sa personal experiences of real people. It pays to listen to the honesty embedded in every piece," pasabot ni Ram.

Aron mahitsas ang WFT, ang 15-anyos nga si Aiko Abelardo maoy nibarog isip bahista. Si Aiko 3rd-year high school student sa Nissi Academy sa Lapu-Lapu City. Gawas sa iyang interes sa gitara, mahilig usab siyang magkuri-kuri sa computer ug maminaw og alternative ug punk music.

Si Charles "Cheeno" Salvador, 20, nagtungha sa University of San Carlos sa kursong Bachelor of Science in Business Administration mao ang lead guitarist ug mahiligon sa tugtog nga reggae, grunge, ug alternative music.

Samtang si Aldrin Montealto aka The Freak Master D-Coy Loco, 24, maoy responsable sa WTF drumplay. Mahilig sa outdoor adventure, si Aldrin sertipikadong nature freak gumikan sa iyang pagkamahiligon sa trekking, skimboarding, caving, ug mountain climbing. Usab, mahiligon siya sa reggae, ska, alternative ug hardcore music.

Ang labing mahinungdanong butang nga akong gi-konsulta ni Ram mao ang mga text messages sa ubang mga disc jockeys nga gusto usab makabaton sa mga CDs sa mga Bisrock nga banda. Kon angayan ba nga hatagan ang mga taga laing estasyon.

"No deal. Naghago ko before nya sila kadagko nila nga network unsa man diay gamit sa ilang mga researchers? Kon makatukar man gani sila, either naa sila'y connection sa mga bands with managers or platinum copies na sa Colon. Besides, we at Smash have waged a battle against piracy and remix of songs nga dili mananghid sa nagbuhat sa kanta. Naanad sa ilang kawala'y mga batasan! Adto nako ni ipanghatag ang mga CDs sa stations in Bohol, Negros, Leyte and parts of northern Mindanao and Panay island that established contacts with us," panapos ni Ram, ang main man sa WTF.