Tiunay nga barako

Kapaspas moyawyaw sa kahanginan sa pinulungan'g iningles ang nahimo'ng yawe sa pagsulod niya sa ganghaan sa pangradyo. Pagbansay-bansay pinaagi sa iyang hilig sa pagbatbat og mga "black talk" ug ang pagtan-aw sa mga pelikula nga gibitoonan sa mga Black American ang nakatabang sa pagpalambo sa iyang talento. Ang naglanog-lanog nga ngalang "Benny the Motor Mouth" niadto sa kahanginan, mas naila karon isip Benny Barako, ang bag-ong tigpukaw kanato sayo sa kabuntagon sa istasyonan'g 99.5 RT Nindota Ah!

Una pa misulod sa kalibutan sa pagpamaba, daan nang nabaid ang talento'ng dugay na niyang gitaguan. Dili man tuod sila tig-iningles sa ilang panimalay, apan matag usa kanila kaantigo gyud mobatbat niini. Dugang niana ang pagsulod niya isip account executive sa usa ka kumpanya ug sa lingaw-lingaw niyang pagkanta og mga oppression o discrimination rap. Diin iyang maisip nga siya kabahin sa maong mga kanta tungod sa ubos nga panglantaw niya niadto sa kaugalingon sa matang sa pisikal nga kaanyag.

Si Benny Arnel, ikatulo nga anak sa pamilya'ng Besa, gradwado sa kurso'ng Airline Maintenance Engineering. Siya midako sa pagtuo'ng kinahanglan'g molikay sa mga kagubot. Apan sa dugay nga panahon nga siya mitago luyo sa iyang kaugalingon'g anino, nahigmata siya sa kamatuoran nga kinahanglan usab makigbatok sa uban hilabi na kon ang iyang pagtuo ang sakto. Napukaw ang kaisog sa usa ka barako sa dihang nalambigit siya sa sukmagay niadto'ng bata pa. " Basta, don't touch me. I don't like hassle man gud. Pero di gyud ko mo atras kung sakto ko. Before, I have the tendency to do affront. My theory before was, the best offense was offense. Now I realized that you'll be like a water na lang, ngita lang ka'g laing spot nga mura lang ka'g shadow. As long as, no one will be hurt," pakig-jamming ni Benny Barako sa Banat Hugyaw.

Tuig 1996, una'ng midan-ag ang talento ni Benny sa kahanginan isip Benny Barako, ang magsabasaba matag alas singko hangtod alas nuwebe sa kabuntagon sa iyang programa'ng gitawag og "Hoy Pinoy!" ug "Unang Sirit." Dungan sa una niyang pagtikang sa kalibutan sa radyo, iya usab gisulod ang pagtudlo. Sa susamang tuig, nagtudlo usab siya og Taichi sa mga katawhan. Tuod man, medyo lisod pagtimbang-timbang sa iyang oras pero suma pang Benny, "Both are of the same equal importance. When I took the responsibility of teaching, I also teach the theories of life. The reason nga daghan ko'g kaaway sa Taichi sauna 'coz daghan nag-claim nga Taichi sila but they are not passionate."

Talento ug ang pagka-responsable sa napili niyang mga trabaho ang tinubdan sa kalampusan ni Benny Barako karon. Tuod man, pipila na siya nalambigit sa mga away-away ug pipila na usab nahitabo diin siya napasanginlan ug nakiha. Apan kining tanang unos sa iyang kinabuhi, inusarang gisagubang ni Benny. Dise sais anyos pa lang, mibiya na si Benny sa ilang panimalay ug naningkamot para sa iyang kaugalingon. Kay para kaniya, "You can't know the theories of life if dependent ka. If there are problems, all you need is patience. Problems are not problems, you made them. Why should we fear about them? Come what may. Sabay lang gud sa flow. That makes our life easier."

Taliwala sa mga away ug kalisod nga naatubang ni Benny Barako, nagpabilin gihapon siyang mapaubsanon ug buotan sa mga katawhan. Ang makalingaw ug tabian nga Benny nga naila sa kahanginan, susama sa gihapon sa Benny nga maatubang ninyo sa personal. Manghigalaon ug maabi-abihon nga pagkatawo. Tanan niyang ipadayag nga mga tambag sa kahanginan nagagikan sa iyang kaugalingong kaalam ug kaagi. Suma pa sa asuy ni Benny Barako, iya kining gibatbat sa kahanginan tungod kay gusto lang siya makatabang sa mga katawhan, hilabi na sa mga kabatan-unan. Kay iyang naobserbahan nga ang mga batan-on karon, dali lang galgalon. "They're special in a way that they need to be pampered and cared of. They deserve the same kind of education. I think it's me, part of being a teacher," dugang niya.

Sa pagkakaron, gusto ni Benny nga magpabilin na lang nag-inusara sa kinabuhi. Human siya miagi sa nagkalain-laing bagyo sa kinabuhi, inusara ra kini niyang giatubang ug sa katapusan, mibarog ra usab nga malampuson. "Kutob ra gyud ko sa adoration. Usually, the people I admire are those who can be better. Mao ako, di gyud ko ganahan magminyo. It's not about being hurt. I don't get hurt anymore [that is one thing I want to get]. Emotion is only a feeling, a sensation. Who says its love? It's hate? The mind. Who tells the mind? The senses. We are only educated by using our senses and the environment also. In the concepts of life, way drills nga obvious. Follow lang gyud ka," istorya pa ni Benny Barako.

Sa kadtong nangandoy usab nga maglanog-lanog sa kahanginan sama kaniya, kini ang tambag kaninyo ni Benny Barako; "there are two kinds of DJs, the mixer and the one who talks. Choose what suits you best. Hone your speaking skills in English and Cebuano. And don't rush things. Double time on training. In martial arts, kung di paka ready mosaka sa ring, pila gyud ka bun-og imong madawat. Sometimes, it's not the reputation, it's the proper reputation. Find your weak side and double the effort on training. Most especially, don't forget to keep your head not swell."