Nasambogan og politika ug intriga

Pagkakaron, nagdagan na ang comedy series nga "Milyonaryong Mini." Sa miaging Oktubre 8 [Domingo], gipaila sa ABS-CBN ang mga artista niini didto sa Entertainment Plaza sa SM City sama kanila ni Cherry Lou Maglasang, Edith Cabahug [ang barangay captain sa Looc, Mandaue City] ug anak, Cathy o Candy Cabahug, Randolph Libres , Budoy ug uban pa nga tungod sa kadaghan, wa na nako mapangutana ang uban, dili na gyod nako mahinganlan dinhi.

Usa sa mga pangutana nga gipasupot nga pangutana ngadto ni Edith Cabahug may sambog gayud sa politika tungod kay may kalabutan kini sa mga nanggawas nga taho nga dunay laraw ang kapitana nga magpapili isip konsehal sa dakbayan sa Mandaue sunod tuig. Mitubag usab si Edith nga kon ang pagsilbi sa tibook syudad sa Mandaue mao ang gikinahanglan, ug maoy pangayoon sa mga Mandauehanon, dan modagan siya, apan kon dili pangayoon, magpabilin siyang Barangay Captain sa Looc, kay duna pa man pod kono'y duha ka tuig una mahuman ang termino sa paghupot niya sa posesyon.

Gidugang niya nga kon aduna pa usab siya'y igong panahon, magpabilin usab siyang artista, kay sukad pa sa bata pa siya, artista na man gyod kono siya, ug naundang lang pagminyo niya kang Mandaue City councilor Raul "Pokang" Cabahug. Nabalik siya sa pagka artista sa pag-artista usab sa iyang mga anak nga sila si Kekin, Kevin ug Cathy [kon Candy].

Sa laing bahin, giintriga usab si Randolph kay doktor man ang original nga Berting sa unang "Milyonaryong Mini" si Dr. Charles Nadela nga tungod matud pa pagka playboy, naundang sa maong TV series, human malambigit usab sa original nga Salud nga si Daphne Tiu. Pwes ang intriga posibli ba usab nga playboy si Randolph ug hayan malambigit sa iyang leading lady o dili ba, ni Cherrylou? Hugtanon miingon si Randolph nga dili kana mahitabo, kay boutan kono siya, ug gani, niadtong Domingoha, misimba man siya. Tinuod kaha ang gisulti ni Dr. Randolph Libres nga, kay mosimba man siya matag Domingo, boutan gyod siya ug dili na madani sa laing babaye? Matod pa, AVANGAN !!!!