Circle of Willis: Mapuslanon

(pinaymangatkatay.multiply.com, www.bisdakzoundz.blogspot.com)
Lain na usab nga pundok sa mga rockista sa Cebu Institute of Technology ang mitikang sa unang higayon sa plataporma sa Handuraw Events Café niadtong nakalabay'ng buwan kauban ang Absolute Failure, KDB (Koolerah and d Digital Buchitoongs), Fervent ug Agipo.

Apan sa wala pa himo-a ang ilang matawag og debut gig sa Handuraw alang sa Orig All Star Event, ang CIT-based Circle of Willis mitunol kanako sa usa ka CD demo sa ilang "Reyna Prinsesa" nga namugna ginamit ang nagkadaiyang impluwensya sama sa Bisaya nga mga bandang Phylum ug The Ambassadors, ingon man ang 6cyclemind, Rocksteddy, Urbandub, The Calling, Incubus, Saosin, The Used, Story of the Year, ug Yellow Card.

Ang balita nga sila makatukar na alang sa Orig All Star saktong niabot niadtong mga takna-a nga sila naghandom og ikatulong pasundayag - ug nga ilang gipangayo nga kini anha unta mahitabo sa Handuraw. Ang pangandoy nga makatagamtam og debut gig diha sa Handuraw niturok sa dihang ilang nadungog nga ang maong "artists' haven" matawag og sukaranan niadtong buot molayat sa mas halapad pang wanang sa mga gitawag og "various avenues of expression".

Dili matago ang ilang kasibot sa dihang nabasa ang maong balita nga gipasa kanako ni Zarah Smith pinaagi sa text message. Daw sa kalayaton ang mga sakop sa Circle of Willis sa maong kalambuan. Mapasalamaton nga sa katapusan, human sa gihimong screening, nipunting ang pabor ngadto kanila.

Kinutlo gikan sa usa ka medical terminology nga gihulagway sa Wikipedia, nga "the cerebral arterial circle, which actually is a circle of arteries that supply blood to the brain," ang Circle of Willis daling mipasabot kon ngano nga mao kini ang pangalan nga ilang gilukdo.

"We want to be in all avenues possible to be able to reach out to fellow youths of today and supply them with sound reasons to fight back personal issues and concerns, most especially teen angst, through the messages of hope, inner healing, and awakening exemplified in our songs," mao kini ang sumada sa tanang gipangbatbat nga rason nilang Kim Matabalan (vocals), Klint Angelo Perocho (bass), Reno Richard Ramirez (drummer), Mark Conte (lead guitarist, songwriter/composer), ug Tam Roque Lucaban (rhythm guitarist).

Ang Circle of Willis gihingalan gikan kang Thomas Willis (1621-1673), usa ka banggiitang mananambal nga Briton.

"We would want to challenge every youth to deal challenges and issues squarely and "get a life through music," mao kini ang gipahimug-atan ni Reno, kansa gikan sa pagka rapper sa usa ka underground hiphop nga pundok sa Valencia, Bukidnon nahimo na karong determinadong Bisdak nga rockista.

Si Kim, Klint, ug Reno mga tinun-an sa kursong Nursing kansa milukat og inspirasyon gikan sa "mapuslanong panaghugpong sa mga ugat sa kasingkasing alang sa pagpalugway sa kinabuhi." Si Mark usa ka tinun-an sa Civil Engineering, samtang si Tam tinun-an sa kursong Electronics and Communications Engineering. Kining mabulahanong pagkapundok sa lima naglantaw sad nga matulbokan na ang gikatahong walay hinungdang panagbangi ug walay maayong sangpotanang panagbingkil-bingkil tali sa mga estudyanteng nursing ug engineering.

Sa sunod buwan puhon, kining mga batan-on nga nagsukad pa's mga nagkadaiyang lalawigan sa Mindanao (Tam - Compostela Valley, Mark ug Klint - Siargao, Surigao del Norte, ug Kim - Sindangan, Zamboanga del Norte) mosalmot sa pagahimoong "Rockquesta Battle of Bands sa CIT gym nga paluyohan sa College of Nursing. Gihugon-hugon usab nga malusad na nianang panahona ang ilang Reyna Prinsesa Extended Play album nga may lima ka kanta - Gipaasa, Wala Na, Forever ('till I die) ug Playgirl atol sa maong okasyon.

Ang mga kanta may kalabutan gihapon sa gugma-gugma ug kini gigama ginamit ang istilong pop rock. Ang "Gipaasa" may kalabutan sa usa ka mithi nga tapuson na ang usa ka relasyon nga wala na'y padulngan o wala na'y igong kapasikaran nga lugwayan pa. Ang "Wala Na" nagpakita sa typical nga paningkamot sa usa ka lalaki nga makapahimuot sa iyang gipakabathala, ang "Forever ('til I die)" nagsaysay sa paglaum nga makapabuhagay sa gibating paghigugma, samtang ang "Playgirl" nangigo sa mga babayeng nagduwa-duwa lang sa panahon ug sa emosyon sa mga kalalakin-an.