Dagway ug huna-huna ni DJ Andrea

Sa usa lamang katan-aw mailhan nang daan nga adunay kaliwat nga langyaw. Tuod man half Filipino ug half-American si Andrea Dunlop nga naila sa kahanginan isip DJ Andrea diha sa gipalanog nga estasyonan sa "Monster Radio" sa programang "School of Cool" matag alas 10:00-12:00 nn. Kung dagway ang pagabasihan lad-lad nga mupatigbabaw ang hitsura nga langyaw apan ang dughan ug huna-huna ang pagahisgutan masuta nimo nga usa usab siya ka Pilipino.

Nagmatngon og buot si DJ Andrea sa nasud sa iyang amahan, New Zealand, apan nagdako usab siya nga migamit sa pinulungang Cebuano kay mao man kini ang gitudlo kaniya sa iyang inahan. Gani sa sulod sa ilang panimalay kaniadtong didto pa sila sa New Zealand, ang pinulungang Cebuano maoy usa sa mga pinulungan nga ilang gigamit.

"Yes, I could speak Bisaya, it is my first language. I was raised by my mom and she want me to speak Bisaya," abli niya sa jamming.

By blood relationship usa ka Filipino citizen si DJ Andrea ug permanente siya nga residente sa nasud kay matud pa niya, ang iyang partner usa man usab ka Filipino. Aduna sila'y usa ka anak nga lalaki nga alang kaniya maoy usa sa naghatag kaniya og inspirasyon aron sa pagpaningkamot ug pag-atubang sa mga hagit sa kapalaran.

Para kang DJ Andrea dako ang nahimong kausaban sa iyang kinabuhi human niya gihimugso ang iyang anak. Matud pa niya nahimo kini'ng mabulukon ug puno sa kinabuhi. Kay kung kaniadto nagpa-uraray lamang siya sa tanan niyang mahuna-hunaan ug dili manumbaling kung unsa'y sunod niini, karon naka-ingon siya nga mas nindot ug puno sa damgo ug mga pangandoy ang iyang gisubay nga dalan. Doble usab ang iyang gihimo nga pag-amping sa tanang butang nga iyang gibuhat hilabi na nga usa siya sa mga gitan-aw nga ihimplo sa iyang anak.

Tinuod nagmatngon og bu-ot si DJ Andrea sa New Zealand apan kung siya ang pasultihon mas gusto siya nga anhi magdako ang iyang anak sa nasud kay nagtuo siya nga mas maka-ayo kini sa iyang anak.

"Here, people have more respect for each other and people enjoy the simple life. They have nothing but they're happy. I don't want my son growing up any. In a successful society where things are worst, because he will learn things from me but he will also learn things from other people. I'd rather him being here and learn about respect than in America," pagtimbang-timbang pa niya.

Bag-o pa lamang nahisulod si DJ Andrea sa maong industriya. Usa ka higala nga nagtrabaho usab sa maong estasyonan ang nagdani kaniya sa pagsulod sa maong kalibutan. Wala na siya mu-agi og audition kay sa iyang pagsulod gi-train man siya dayon ug daling gitugutan nga muyaw-yaw sa kahanginan.

Para kaniya ang kinabuhi sa usa ka DJ adunay sagul-sagul nga emosyon. Malipayon ug nalingaw siya sa iyang gibuhat apan dili usab niya malikayan nga mabalaka hilabi na nga usahay mahisulod sa iyang alimpatakan kung aduna ba'y naminaw kaniya ug naka-uyon ba sila sa iyang gibuhat sa kahanginan.

"Life as a DJ right now, it's cool. Sometimes wondering if your reaching the people, like if they're listening to you or not. I mean I can't stop thinking,oh! Maybe nobody is listening because they don't like the way you are. But its really really good for a moment," angkon niya sa dihang nagkalawom ang jamming.

Kalabot niini nakabaton usab siya og daghang higala nga nahiduol na sa iyang kasing-kasing, pinaagi sa mga tigpaminaw. Labaw na gyud kadtong permanente nga manawag ug mo-text kaniya.

" Its really great, I think a lot of my listeners are my friends. I got funny funny texters. Sometimes you got to take and really be with what they are saying and you have to adjust things because sometimes I become too opinionated. But its cool because you can tell that people are really listening to you, hanging on to every word you say co'z it means you are doing well."

Malaumon siya nga aduna siya'y hayag nga ugma'ng gi-atubang kay sa pagkakaron nagkugi ug nanlimbasog man siya. Mao nga nagtuo siya nga bisan kinsa magmalampuson basta dili lang gyud muhunong ug magpa-hayahay. Maong ang mensahe niya para sa mga katawhan hilabi na gyud kadtong nanganduy nga mamahimong usa ka DJ nga mu-suway lang gyud.

"Go for it, go apply and do it. In everything you do go for it. It's not just a fight of being a DJ. If they want to become a DJ go to radio station and apply. If it means you to take English lesson, go take English lesson. If it means you to take Mass Comm., take it. But don't just sit around and murmur 'oh, I wanna be a DJ but I can't. Do something about it co'z I'm tired of people saying, hmmm... I got no money! Do something about your life and maybe you could have some money," tak-op niya sa jamming.