Aubrey apil sa Amazing Race

Karon pa lang excited na si Aubrey Miles sa iyang umaabot nga partisipasyon sa Pinoy delegation sa show nga "The Amazing Race" Asia nga magsugod na karong November 9.

Ang maong show makaupat na kahigayon nga nakadaug og Emmy award hinungdan nga gisaad ni Aubrey nga buhaton niya ang tanan aron siya maoy modaug sa P100,000 (yes, 100,000 dollars) nga cash prize.

Bag-ohay lang gibutyag ni Aubrey nga busy siya karon ug ang iyang mga igsoon sa ilang pawnshop business. Sa January 2007 usab gikatakda nga isalida ang Ronin sa ABS-CBN, fantaserye diin usa si Aubrey sa mga kontrabida. "Starzan" ni Joey ibalik Ni Ryan Mark

Sanglit uso ang mga remake karon, plano ni Mother Lily nga himoon og balik ang usa sa labing malampuson nga pelikula ni Joey de Leon sa iyang movie outfit kaniadto, ang Starzan.

Pwes kinsa pa may lain nga mosulod sa hunahuna ni Mother Lily alang sa title role kon dili si Kempee de Leon, kinamaguwangan nga anak nga lalaki ni Joey?

Ug karon pa lamang usab duna nay nahunahunaan si Kempee aron maoy iyang leading lady ug walay lain kun dili si Francine Prieto.

Kaniadto sa dihang gihimo ni Joey ang maong pelikula, si Zsa-zsa Padilla maoy iyang pares. Mosalga na ang mga "mini"

Ugma pang adlawa pormal nga magsugod ang naila ug kaniadto gikagubtang cebuanovela-Milyonaryong Mini. Apan karong alas singko sa hapon maaninaw na ang behind the scenes ug piniling mga eksena sa unang version diha sa ABS-CBN Cebu sa dili pa ang 'Pangako Sa'yo." Ang behind the scenes maoy maghatag og giya unsay mapaabot sa mga mahiligon sa telebisyon sa Kabisay-an ug Mindanao niining pagbalik sa Milyonaryong Mini nga gihatagan og bag-ong bulok sa panulat ni Jurey Mirafuentes.

Sa presscon kagahapon sa hapon nga gipahigayon sa SM Entertainment Plaza gitin-aw sa mga kadagkuan sa ABS-CBN Regional Network Group nga ang pagbuhi og balik sa Milyonaryong Mini wala magpasabot nga nahutdan na og ideya ang creative team o mihupas na ang katakus niini aron pagmugna og bag-ong pasundayag. Si Donna Ocampo, Over All Production In-Charge sa RNG namahayag nga gibalik ang Milyonaryong Mini tungod kay napamatud-an nga ang kasagaran sa mga tumatan-aw naghinamhinam nga makita pagbalik ang mga karaang pasundayag nga hatagan og bag-ong twist ug flavor sama na lamang sa kalampusan nga gi-ani ning bag-o lang sa soap drama nga 'Gulong ng Palad." Si Merle Dacunos, Executive Producer sa Milyonaryong Mini midugang nga sanglit ang nahisgutang cebuanovela maoy labing sikat sa tanang cebuanovelas nahukman nga ibalik kini sa telebisyon, sugod na ugmang adlawa.

Dungan niini si Mirafuentes mipahibawo nga duna gayoy dako nga kalainan sa bag-ong version itandi sa original nga tinagik ug gidereksyonan ni Marcos Sacol kaniadto. "It's more on college life ang story. Lahi gyud," butyag ni Mirafuentes.

Ug tuod man isip palahi, dili usab basta-basta ang lineup sa cast sama nila ni Budoy isip Cosme, "nausab ang kapalaran sa dihang naaan nga dato," Cherry Lou isip Petra, "ang kikay nga nahigugma kang Cosme," Cathy Gabronino isip Salud, "tungod sa salapi dili na siya ganahan pang mahigugma" ug Randolph Libres isip Berting," ang dato nga nagpakaaron-ingnon nga pobre aron maangkon ang gugma nga gikahinaman. Duna usay special roles sila si Juliana Palermo isip Jessa nga ex-girlfriend ni Berting ug si Giselle Sanchez nga maoy inahan ni Cosme. Apil usab ang beterana nga artista ug kapitan sa barangay Looc nga si Hon. Edith Cabahug isip ang kontrabida nga inahan ni Berting kinsa supak sa relasyon nila ni Salud. Ang Milyonaryong Mini ubos na sa direksyon karon sa batan-ong si RD Alba, usa ka Boholano nga mikuha og filmmaking sa Estados Unidos. - Ryan Mark