Kini ang akong suliran

Sa matag subang sa adlaw usa na usab ka anid sa atong kinabuhi ang mahuman ug daw mouban sa pagtiklop sa kahayag. Maingon tang, kitang tanan nagpuyo sa usa ka lawa sa kaka, diin ang tanan natong kaagi malambigit o makoniktar sa matag usa kanato. Kining tanan susama usab sa mga drama sa radyo nga atong madunggan nga nagtuki sa mga butang kabahin sa kinabuhi.

Usa sa daghan'g nagpalibot sa kalibutan sa radyo si Marvin Leyson. Siya lumad nga taga-Opra Unit 5, Kalunasan ning siyudad sa Sugbo. Si Marvin ang ika-pito ug kinamanghuran nga anak sa pamilya Leyson. Apan sukwahi sa kadaghanan nga midako uban sa ilang mga ginikanan, si Marvin namatngon og buot nga wala ang iyang amahan sa iyang kiliran. Lima pa ka tuig sukad sa pagkamatay sa iyang inahan, unang naaninaw ni Marvin ang dagway sa iyang amahan. Usa kadto ka panagkita nga giliminan sa daghang emosyon.

Bata pa lang, nahigmata na si Marvin sa kalisod sa kinabuhi nga wala ang mga ginikanan. Tuig 1996, misulod si Marvin sa kalibutan sa radyo pinaagi sa pagpa-audition kuyog ang iyang silingan. Milungtad siya og tulo ka tuig sa istasyon'g una niyang gisudlan. Nagtungha pa lang niadto sa ikatulong ang-ang sa kolehiyo sa University of the Visayas sa kursong BS Computer Science, nagkugi ug naningkamot og maayo si Marvin para lang mahisulod sa numero uno'ng istasyonan (AM) sa Visayas ug Mindanao karon, DYHP 612 KHz.

Si Marvin dili lamang usa ka aktor sa drama sa radyo, siya usab usa ka direktor ug tigsulat. Matag karakter nga iyang hatagan og kinabuhi ug sa mga istorya sa drama nga iyang isuwat, hugot niyang tinubdan sa pagpanindot niini mao ang mga ginagmay'ng tipaka sa iyang kaugalingon diin iyang malugit ang mga malipayon ug subo nga emosyon.

Para kang Marvin, lisod dal-on ang role nga kontrabida kung itandi sa leading man. Kini tungod kay dako gayud ang ipagawas nga effort sa imong tingog kung ikaw kontrabida. Sa pagkakaron, duha ka drama sa radyo nga mudagan og 30 minutos ang iyang gibidahan. Ang drama'ng "Dili Na Siya Imo" matag alas dos sa hapon ug "Ang Kaluwasan" nga mabati sa kahanginan matag alas otso sa gabii.

Samtang siya ang direktor sa drama 'ng atong madunggan sa alas nuwebe sa kabuntagon nga nag-ulohan, "Si Wing Wing ug ang Tubig Sa Mantayupan." Dugang pa, siya usa usab sa nagpaluyo sa drama'ng "Salingkapaw" matag alas dos y medya sa hapon isip writer. Lain pa, siya usab ang nagsuwat, pinaagi sa mga tampo sa katawhan, sa sagad nga gipaminaw sa kahanginan matag ala una, ang "Kini Ang Akong Suliran."

Malipayon ug mapasalamaton gayud si MArvin sa Ginoo ug sa mga tigpaminaw nga nagsunod sa iyang mga drama. "Pasalamat gyud ko sa mga nagsuporta. Kanunayon unta nila gihapon ang pagpaminaw ug pagsunod, hilabi na sa akong mga gipanuwat ug gi-leadingan. Dako kaayo akong pasalamat kay sila ang naghimo namong number one," pagpadayag ni Marvin ngadto sa Banat Hugyaw.

Tuod man, sa iyang pipila na katuig sa kalibutan sa drama, dili lamang sa radyo, isip direktor, aktor ug tigsulat, miani na siya og mga pasidungog. Sama sa best actor, best supporting actor, best playwright ug best director sa tinuig nga selebrasyon sa Sugbo, ang Inter-Barangay Drama Festival.

Sa laing bahin, si Marvin usa pa ka ulitawo ug karon nagkuha sa iyang inspirasyon sa mga kabatan-unan nga iyang gigiyahan padulong sa maayong dalan. Siya wala lamang nangulo sa matang sa pag-arte o pagsuwat, siya usa usab ka youth leader. Si Marvin ang presidente karon sa organisasyon'g "Youth Enthusiasts Serving Cebu" (YES-Cebu). Gawas pa niana, siya ang founding chairman sa youth organization sa ilang barangay, ang "Youth On V".

"Gusto ko motabang ug mo-guide sa mga grupo-grupo nga adunay bad record, unya himuon nako nga community service organization. Just like Crossline kaniadto, pero gihimo nakong tarong. Akong gidala og mga tree planting, tabang sa Sinulog, sa lost and found booth namo. Samtang sa Youth on V nga organization, akong gi-gather ang mga batan-on sa amu-a sa paghimo sa labing dako namo nga project, ang usa ka Documentary Film nga akong gisuwat ug gi-direk, "Ang Kagahapon ug Karon Sa Opra." Kini ipasalida matag pasko ug pista sa among barangay," pagbutyag pa ni Marvin.

Busa giawhag ni Marvin ang mga batan-on nga dili pakatulgon ang ilang mga talento ug makiglambigit sa mga organisasyon nga makapalambo sa ilang kinaiyahan. Kining tanan nga naambit ni Marvin miani usab og pasidungog, tungod kay siya napiling "Outstanding Cebuano Youth Leader".

Kining tanan niyang mga kaagi, kasubo, kasakit ug kalipay man milangkob sa usa ka lig-on nga Marvin Leyson karon. "Giving a chance nga ibutyag nako ang tanan nako'ng kaagi, dili gyud maigo sa usa ka episode. Mga sacrifices nga akong naagian una ko naabot sa nahimutangan nako karon. Kung ako man kining isuwat para sa radyo, akong ititulo, "The Untold Story of Marvin Leyson."