Hulgalsa panahon pakyas pagpakgang sa Rakrakan

(Suroy sa www.bisdakzoundz.blogspot.com)

Bisan ang dili maayong tempo wala makapugong sa mga astig ug payter kaayong mga tigpaminawan sa "YourVoice, YourChoice Tingog Kabataan" sa 93.1 Smash FM sa paghugop ngadto sa ALU-Vimcumtu Compound, Pier 1 alang sa pagsaksi sa "Bisrock Rakrakan" (ala Woodstock) nga gipahigayon atol sa ika-39 nga kasaulogan sa anibersaryo sa dyLA, ang Tingog sa mga Mamumuo. Gibana-bana ni DJ Ram Dizon nga dul-an sa tres mil ang nagpasinguwan aron ipatagamtam ang ilang tumang kasibot sa Bisayang mga kanta nga naghatod sa "phenomenal rise of Bisaya rock music".

Daghan na ang nanubay ug nangangkon nga sila ang unang mituboy niining maong matang/istilo sa musika dinhi, apan tataw niadtong nakalabay nga Miyerkules, Septiyembre 27 nga ang Smash FM mao gayud ang Rock Fortress of Cebu. Nanukar ang 16 ka mga banda nga wala'y bayad isip paglantaw sa ilang dakong utang kabubut-on sa Smash nga maoy nihatag og kahigayunan sa ilang mga komposisyon nga madunggan sa kahanginan.

Bisan ang Aggressive Audio (tingog likod sa Senior Citizen, Bakakon - Liar, Evil; Lingin, Medya Galon, uup.) kaniadto usa sa mga nakatilaw og mapait nga pagbalibad ug pagpanupo tungod kay ang ilang binisaya nga komposisyon nga makategorya na hapit og novelty songs, gi-reject sa ilang permerong giduol nga estasyon tungod kay "makaguba sa format". Sa Smash unang nakalaksi og pagtagad ang Senior Citizen nga karon gisumsuman na's mga mamiratahay, ug gisakyan na's mga mahiligon sa remix kay dili naman mabangbang nga hangtod sa Davao pwerte ang nasinati niining kasibaw. Ang ubang FM stations nga naningkamot moagpas sa Smash karon nag-reformat na og hinay-hinay ug wala na "lud-a" sa binisayang pinulungan karon nga nausab na ang "music preference" sa kadaghanan. Labaw pang wala na maghilas-hilas nga mo-rason "makagusbat sa format" kay mismong ang tigpaminawan naman ang mohangyo nga ipatukar ang mga Bisrock nga kanta.

Sa gipahigayong Bisrock ala Woodstock, nasukod ang kasibaw sa pakpak nga gihatag alang kang Ms. Marit Remonde nga station manager sa dyLA tungod kay gawas kang DJ Ram Dizon ug Bré Ambungan Abrea, siya man ang nangusog nga katagaan og luna ang mga lokal nga banda nga matukar ang ilang mga kanta. Bisan pa man og dili lunlon nga Sugbuana si Remonde, gihangop niya ang kamatuoran nga dili gyud mapuhalan ang mga talento dinhi sa Sugbu.

Ang mga mosunod nga mga hulagway mao'y buhing testimonya sa makabungog ug makapatay-og nga suporta sa mga Bisrockers sa Sugbu - gikan sa ginikanan sa mga taga-banda, ngadto na's mga Bisrock clans nga sipa kaayo ang gipakitang pag-abiba - Bisrock Lovers Clan, Isoya Boys Clan, Deadspotters, Alpha Kappa Bomba, Beta Gamma Rho, Kapabis Clan, ug uban pa.

Gi-hook up ang maong rakrakan live sa Smash FM nga nanganaw-kanaw na karon sa habagatang Mindanao, abot sa Capiz sa Panay Island, ug usab sa mga lungsod sa Leyte. Bisan ang paghulga ni Milenyo sa kahimtang sa panahon wala makapakgang sa paghatod sa dyLA og libreng pasundayag isip pahalipay sa tanang nagpaluyo sa maong estasyon ug sa ilang igsoong dyWF Smash FM - Home of Bisrockers.