Nagsugod na ang Ronda

Gilusad duha na ka semana ang milabay ang "Ronda Fuerza sa Kahanginan," labing bag-ong programa sa dyRF matag alas 5:00 sa buntag. Kini magtuki sa mga nag-unang mga isyu ug mga lab-as nga balita matag-adlaw alang sa kasayuran sa publiko, sa ingon sila usab makaumol sa ilang tagsa-tagsa ka panahom.

Sa alas 6:00 sa buntag, isentro sa programa ang komentaryo ug mga exclusive expose sa mga nahitabong anomaliya diha sa nagkadaiyang ahensya sa kagamhanan lakip na niini ang pagpangabuso sa gahum, paglapas sa balaod, pag-pasipala sa kinaiyahan ug pagyatak yatak sa katungod sa kabus.

Ang Ronda Fuerza sa Kahanginan gipaluyohan ni Ike Durano II kinsa naila na kaayo sa iyang pagkakomentarista. Ang maong programa maoy nagsilbi nga "comeback" ni Ike human siya mi-lie low sa pag-panibya sulod sa pipila ka buwan. Lakip sa nagpaluyo mao ang grupo sa News and Public Affairs nga gilangkuban nila ni Fred Quiño, Joy Tumulak, Dennis Tabar ug Guam Logroño lakip usab ang mga tigbalita sa mga silingang dakbayan sama ni Dodong Guden (Mandaue), Riza Mae Catarina, (Lapu-Lapu) ug Gary Cabotaje, (Talisay).