Si Josie Pereyra, sa JSP Ads and Promo, mipahibawo kagahapon nga ang mga bida gawas kang Kim, moabot dinhi sa Sugbu karong Biyernes sa buntag gikan sa Tagbilaran City.
Samtang ang Sugbuanon nga si Kim Chui, mosunod pag-abot gikan sa Manila inig ka udto na sa maong adlaw sanglit duna pa siyay mga commitments sa kauluhan nga dili mahimong biyaan.
Pagkahapon sa Biyernes ang cast makighimamat sa mga sakop sa Cebu Press alang sa usa ka press conference sa dili pa sila motekang sa SM Entertainment Plaza alang sa usa ka mini-show.
Gibutyag usab ni Pereyra nga si Kim magpabilin pa dinhi sa Sugbu hangtud sa Domingo sanglit aduna pa siyay show diha sa Ayala Center.
Ang First Day High, maoy launching movie nila ni Kim ug Gerald, ug dinhi masukod unsa ka lig-on ang ilang loveteam nga namugna samtang didto pa sila sa sulod sa Bahay ni Kuya isip mga housemates sa Pinoy Big Brother Teen Edition.
Ang mga himantayon sa kauluhan nagkanayon nga ang Kim-Gerald loveteam maoy labing kusog karon nga tandem sa nataran sa Star Magic, kalampusan nga matud pa nakahulga og maayo karon sa GMA-Artist Center hinungdan nga ang Jennylyn Mercado ug Mark Herras na maoy gihimong panagang pinaagi sa Love to Love season finale sa Kapuso network matag Domingo.