Mas hugyaw nga Milyonaryong Mini

Usa sa labing malampuson nga Visayan soap drama sa milabay nga katuigan. Malamposon ug gani nahimoan man og pelikula nga gibitoonan sa mga dagkong artista sa Philippine Cinema kaniadto. Gumikan niini ang mga kadagkuan sa ABS-CBN Regional Network Group naaghat sa pagbanhaw sa maong drama nga hangtud karon lab-as pa sa panumduman sa kadaghanan. Unang gitagik ug gidireksyonan ni Marcos Sacol, ang bag-ong "Milyonaryong Mini" karon, sinuwat na sa batan-ong si Jurey Mirafuentes ubos sa direksyon ni RD Alba, sa Alba Productions. Gitin-aw sa production team nga ang titulo ra maoy ilang gigamit apan lahi ug mas hugyaw ang istorya sa bag-ong bersyon, mas mabulukon usab ang dagan sa istorya sa matag characters. Ang bag-ong "Milyonaryong Mini" ipasalida na karong October 9 sa tanang Visayan speaking regions, partikularmente na usab sa Cebu, Tacloban, Dumaguete, Davao ug Cagayan de Oro City.

Mas hugyaw usab ang cast sa bag-ong bersyon sama na lang nila ni Randolph Libres (Berting) Cherrielou (Petra), Kathy Gabronino (Salud) ug Budoy (Cosme). Ang Cebu Press nakahigayon og bisita sa set sa "Milyonaryong Mini" didto sa Bohol niadtong milabay nga Lunes ug nahimamat ang mga nahisgutan. Hapit na mahuman ang taping niini ug nasuta nga sa bag-ong bersyon ipakita ang sinugdanan sa panaghigalaay nila ni Berting ug Cosme nga bisan pa man og managlahi ang kahimtang sa ilang pamilya, mas lig-on ang ilang pag-amigohay. Masundan usab ang pagtubo sa mga managsuong Petra ug Salud, diin malili ang dako na nga kalainan sa ilang batasan ug pangindahay hangtud nga nadalaga na silang duruha.

Si Kathy kinsa, host kaniadto sa Sabado na Gyud Ngiga Gud sa ABS-CBN Cebu namahayag nga mas "challenging ang role gumikan sa colorful twist and turns sa mga characters." Ikaduha na kini niyang teleserye, ang una mao ang For Life series kaniadto, apan matud ni Kathy nga dako karon ang preparasyon itandi kaniadto. Apan si Budoy midason nga " wala ra may challenge kay si Cosme mura ra man sad og ako." Buot niyang ipasabot nga natural ra ang iyang pag-arte dinhi niining labing una niya nga teleserye.

Apan si Randolph nagkanayon nga " dako kaayo ang responsibility kay sikat baya kaayo ning Milyonaryong Mini sa una. Plus this is given a new facet. Like for example si Berting before was very serious, now the writer demands more character, so this is not similar to the original." Si Randolph bag-o pa lang nga nanimpad sa nagpadayong Philippine Idol sa ABC-5 diin wala siya mulungtad pag-abot niya didto sa kauluhan. Matud pa niya wala niya kadto igsapayan tungod kay nasayud siya nga dunay giandam kaniya ang Ginoo. Wala magdugay, miabot ang tanyag alang sa Milyonaryong Mini, ang labing ambisyoso karon nga proyekto sa ABS-CBN Cebu diin sama sa kauluhan, magpahigayon unya og mall shows ang casts sa mga key cities sa Visayas ug Mindanao aron pag-promote sa nahisgutang teleserye.

Si Randolph kinsa usa ka Radiologist, dili na bag-o sa local entertainment scene, gani giisip naman siya beterano sa mga stage plays. Ambongan ug sakto sa barog, si Randolph milugwa na usab kaniadto sa mga teleserye sa ABS-CBN Cebu sama sa Kapalaran ug For Life, nga puro ubos sa direksyon ni RD Alba. "Mas challenging karon kay sa una typecast man ko as heartthrob. Karon, lisud baya ang magpakatawa."

Samtang nasayran usab nga dili si Cherrielou ang original choice isip Petra kon dili ang Sugbuanon nga si Sheryn Regis apan labihan ka busy niini. Gi-consider usab ang Davaoeña nga si Juliana Palermo apan dili usab magtakdo ang schedule niini. Hinoon dunay special participation si Juliana sa maong teleserye. Bisan pa man sa maong kamatuoran, wala magsapayan si Cherrielou kay dako niyang garbo nga makatabang pagpalambo sa mga teleseryeng binisaya. " Lahi gyud kon makahimo ka og binisaya. Fan man sad ko sa "Si Goat the Wanderpol" sa una. So mao to nga pag-offer nila sugot dayon ko, gipahikay dayon nako ang akong schedule." Si Cherrielou, kinsa sakop sa sikat nga grupong showgirls namahayag usab nga "mas dali, mas gaan katrabaho ang akong mga kauban kay the same ra man nga bisaya. Mura rag nagbakasyon."

Hinungdan nga ang mensahe ni Cherrilou alang sa tanan: " I just hope nga the kind of support nga ilang gihatag ngadto sa mga ginama sa Manila, mao usab untay ilang ihatag ngadto sa Binisiya." Samtang si Budoy miingon nga ang iya karong pag-arte wala magpasabot nga iya nang talikdan ang pagkanta-kanta o ang iyang banda. " Lover man tag art but dili ra sad na kutob sa pagkanta kanta. Kani another form of art mani so mao ni siya."

Ang bag-ong Milyonaryong Mini mas gipahaom usab sa bag-ong panahon. Gani gihulagway kini sa production team nga "more spontaneous, more realistic drama." Nagkanayon usab si Mirafuentes nga gisakyan nila ang sistema sa Koreanovelas, love story ug comedy nga dunay nagpahipi nga mga bulawanong pagtulon-an. Labaw sa tanan, si Mirafuentes namahayag nga angayan nga atangan ang bag-o usab nga ending sa bag-ong Milyonaryong Mini kay sigurado nga mahugyaw ang tumatan-aw apan sa samang higayon mutuo usab sila kay posibli gayud kini nga mahitabo sa tinood nga pagkinabuhi.