Bisan pa man sa akong pagpina kanila nga moabot ang panahon nga may mga tawong mosita nila tungod sa pagtahi nila diha sa ilang sling bag sa bandila susama sa nahitabo kanako sa dihang gitahi usab nako sa akong mountaineering backpack ang maong simbolo atol sa Independence Day Climb sa among tropa sa Prosperidad, Agusan del Sur, sila mitubag nga bisan pa man gipahimug-atan sa Akta Republika 8491 o ang Flag and Heraldic Code of the Philippines ang paagi sa paggamit sa bandila, mas angayang atimanon ang pag-karsel niadtong mga tawong yano lang nitunob-tunob sa bandila sa dihang nahitabo ang usa ka protesta atol sa makahuluganong pagsaulog sa National Flag Day niadtong Mayo 28.
"Kon duna ma'y angayang sikopon kadtong mga tawong nagsige og pasiatab sa ilang dakong gugma sa nasud pinaagi sa ilang mga gipanghambog nga mga reporma apan yano lang nagkatag-katag sa mga flaglets ug mitunob-tunob niini samtang kini nagpasad sa karsada," mao kini ang hinugpong nga baruganan sa Republika.
"Nationalism lies in our hearts and it is burning, that's why we chose Republika because we would want to don a symbol of our nationhood and enjoy the essence of freedom, music-wise," pamahayag sa 19-anyos nga si Junry "Choy" Navasquez, ang vocalist sa Republika nga nagtungha sa night school sa Don Sergio Osmeña, Sr. Memorial National High School. Isip magsusulat sa pundok, ang iyang gitagik nga "Tingog Kabataan" mao ang napiling official theme song sa tulumanon sa 93.1 Smash FM, ang "YourVoice, YourChoice Tingog Kabataan" matag Martes ug Huwebes, 9:30am-11:30 am nga usa ka matawag og halad sa mga mahiligon sa Bisdak nga musika, kasagaran mga rockista.
"Sayo sa buntag/sa akong pagmata/wa pay hilam-os/gubot pa ang hitsura/ngita'g gitara kay maghimo ug kanta/bahin's amigo ko nga napakyas sa gugma/
"Ipabuhagay nato ang atong kalipay/Bisan ug daghan ta ug mga pagsuway/
"Tingog kabataan/manindog kitang tanan/tingog kabataan/manglayat tang tanan/tingog kabataan, manglupad kitang tanan/tingog kabataan, manganta tang tanan/
"Bahala'g kasab-an sa among ginikanan/padayon gihapon sa among kabuang/bati nga storya wala lang namo tagda/bahala'g magmahay, Bisrock among kalipay."
Gawas kang Choy, ang Republika naglangkob nilang Roldan "Dong-k" Arnaiz, 19, isip gitarista, usa ka tinun-an sa electrical engineering sa University of Cebu; ang 16-anyos nga si Jerson "Jigz" Navasquez sa drums nga nagtungha usab sa DSOSMNHS kauban ang iyang maguwang nga si Choy, ug ang 21-anyos nga si Emerson "Men" Barasan, ang bahista nga nagtuon karon sa kurso may kalabutan ang computer sa Microsystems International Institute of Technology diha sa Tabunok, dakbayan sa Talisay.
Sa sinugdanan sa ilang panagkatigom isip Republika, nahibaw-an nga nalangkat nila ang ikatulong luna sa usa ka tigi sa mga banda atol sa gipahigayong 416th founding anniversary sa Punta Princesa niadtong Pebrero 2. Daw sa nakuha gihapon nila ang unang ganti batok unom ka mga tang-an nang mga rockista nga ilang gihulagway nga "astig, payter pud!"
"Not bad. A feat for beginners," apas-sumpay sa pundok. Human niadto, daw sa dili na sila matagbaw kon dili makabalik og patong sa entablado kay matud pa ni Choy "maka-adik gyud ang pakpak sa mga admirers, Ma'm," samtang iyang gi-mustra ang iyang kinumo nga nagpamukbok sa iyang walang dughan. "Maong bisan wala mi kadaug sa kadtong Home Radio nga band contest, against nine other bands, okay ra. Pag fiesta pud sa Labangon atol sa "Jam-Jam" with three bands ug kadtong sa Minglanilla maskin kontrobersyal sad to gamay, nindot kaayo ang paminaw tawgon ka'g aydol sa mga Bisrockers. Inig naog mo-high five sila nimo."
Ang Republika mapalgan nga magtukaran kada Biyernes mga alas-9 sa gabii sa Bakalshed (atubangan sa Salazar Institute of Technology). Sa Septiyembre 15, magpasundayag sila sa Equator Bar sa Pooc, Talisay kauban ang Indephums. Buot pasalamatan sa Republika ang mosunod sa walay pu-as nga pagpaluyo: ang ilang mga ginikanan, mga kahigalaan, kaparyentehan labi na gyud ang ig-agaw nilang Choy og Jigz nga si Jasper; ang igsoon ni Emerson nga si Niel, ang inspirasyon sa Rivermaya, ang classmate ni Dong-k sa Allied Engineering Dept. sa UC, 93.1 Smash FM labi nang Ma'm Marit, Bré Ambungan ug DJ Ram, mga Bisrockers sa Labangon, mga classmate ug barkada ni Jigz labi na gyud ang Bamboo Stick sa Don Sergio, si Joan ug Jasmin, ug sa Labaw'ng Makagagahum nga nagtuga sa talento sa pagmugna og kanta ug paghatag og kinabuhi niini.