May isugilon pod ko

Niadtong Agosto 18, nakigsawo ko sa pipila ka mga iladong mga tawo dinhi sa dakbayan sa Sugbo sa usa ka Thanksgiving Lunch didto sa usa sa mga function rooms sa Casino Español, nga gipatawag ni Sir Dodong Gullas nga gitambongan sad nila ni Sir Eddie Gul, ang Representative sa 1st District sa Cebu, ug ni Sir Miguel Belmonte sa Philippine Star. Niingon kog mga iladong mga tawo, kay kinsa may wa makaila nilang Leo Lastimosa, Bobit Avila, Flor Ynclino, Dr. Nestor Alonso, Joe Recio, Atty. Aven and Maam Carmen [formerly Cebu City Councilor] Piramide , Maam Jessica Avila, Archie Modequillo ug uban pa?

Sila si Sir Bobit Avila ug Leo Lastimosa gipanghatagan og mga pasidungog kay nakadawat man sad ni silag mga awards gikan sa lalawigan sa Sugbo isip "Garbo sa Sugbo" so, kinsa may wa makaila nila.

Pagdawat nila, may gisulti pod sila pasalamat ug sugilanon sa ilang kaagi nganong nahimo silang tipik ug bahin sa The Freeman ug Banat News labi na ni Leo kansang column sa The Freeman mabasa usab diha sa mga pahina sa Banat News. Sa akong bahin, kon gipasulti pa pod ko, sama ni Leo, duna sad unta ko'y ikasugilon nganong nahimo sad kong tipik ug kabahin sa Banat ug sa The Freeman. Pero bisag wa ko paistoryaha, kay bag-o man lang sad nag-anniversary ang Banat, moistorya lang gayod ko. Nawagtangan kog trabaho atong l980, kay gitangtangan kog boardwork sa manager namo sa dyCB atong panahona, gihatod gani ang memo didtos balay nga dili na ko katingog pagka ugma. Pero atong panahona, sige na'g padala'g istorya nako si Dulce nga nagsugod pod og tuyhakaw didto's Manila, mao nga nagsige lang gihapon kog suwat og press release sa The Freeman, kay nanira man pod ang Cebu Daily Times [gipanag-iya ni Dr. Cesar Estalilla] diin, nagsuwat ko'g column. Wa madugay, giingnan kong Mr. Juanito Jabat nga, himoon na lang regular ang akong column og hatagan kog P50.00 kada buwan, nalipay kaayo ko, kay ang P50.00 niadtong panahona, sa way trabaho, dako na kaayo. Mao toy sugilanon sa akong kinabuhi sa The Freeman ug Banat News isip labing unang Entertainment Columnist sa dakbayan sa Sugbo. Sama ni Leo Lastimosa, si Mr. Jabat maoy akong Godfather.