Network nag-ilog sa Baywalk Bodies

Hapit na moabot dinhi sa nasud ang upat ka mga sakop sa Baywalk Bodies nga natanggong didto sa Guam, apan gitago sa ilang manager nga si Lito de Guzman ang tukmang petsa ug takna sa ilang pagbalik gumikan kay karon pa lang nag-ilogay na ang mga network alang sa exclusive coverage.

Tsika sa PangMasa nga mikalit og kasikat sila si Jeanette Joaquin, Clarissa Mercado, Luxx Laurel ug Palmolive Palma gumikan kay labihan ka daghan sa interesado nga mo-interview sa mga nahisgutan kalabot sa ilang kasinatian didto sa Guam samtang nangapriso.

Ang dugang tsika pa sa PangMasa mao nga hasta ang mga kinabuhi sa upat ka Baywalk girls giplanohan na usab nga himuon og istorya alang sa telebisyon.

Apan samtang ang uban nag-hangad pa kanus-a gayud moabot ang upat balik dinhi, nakatando na si Lito ngadto sa Entertainment Editor sa Philippine Star, Ricky Lo alang sa exclusive interview sa programa niini sa GMA-7- ang Showbiz Stripped.

Gani gituohan nga kon moabot sila karon semanaha, sa Sabado posibli nga makita na ang maong exclusive interview hinungdan nga naglibog si Lito unsaon niya pagkalaki nga ang ubang mga shows nagpanikad man usab nga maka-interview sa iyang mga 'alaga."

Dingdong wa maglagot ni Richard

Gikataw-an lang ni Dingdong Dantes ang balitang wala silay tingganay karon ni Richard Gutierrez bisan og magkita sila sa "SOP" ug "SOP Gigsters" kay matud pa, dili niya madawat nga ang naulahi maoy nahimong Captain Barbell ug dili siya.

Pong pa niya ngadto sa PangMasa nga niadtong nakalabay nga adlaw gani iyang gitawgan si Richard ug gihangyo nga patambongon sa debut sa iyang cousin diin misaad si Richard nga mulugwa atol sa party.

Miingon si Dingdong nga dili na siya maghuna-huna sa maong mga taho kay wala kini katinuoran, gawas pa busy na usab siya sa taping alang sa iyang bag-ong project sa GMA-7 - ang Atlantika nga makita na sa October 2, 2006. Samtang gitin-aw ni Dingdong ngadto sa PangMasa nga dili siya apektado sa pamahayag sa kanhi action star nga si Roland Dantes nga hayan anak niya ang nahauna tungod kay matud pa ni Dingdong, mihimo na sila og pakisusi ug natino nga distant relative lang ang naulahi.

Samtang ugma ang premiere night sa "Eternity" diin iya usab nga gipalanog nga gi-submit for screening sa Cinema Evaluation Board ang maong pelikula apan sa September 5 mahibaw-an ang rating niini.

Troy ug Aubrey, nag-live in

Giangkon ni Troy Montero nga nag-live in na gayud sila ni Aubrey Miles apan wala pa silay plano nga magpakasal. Ang maong pag-angkon ni Troy iyang giangkon ngadto sa PangMasa atol sa presscon sa movie ni Keanna Reeves, "Binibining K" ubos sa Reality Films ni Dondon Monterverde.

Matud ni Troy three years na ang ilang relasyon ni Aubrey ug kontento siya sa kiliran sa babaye nga iyang gihigugma. Samtang wala masayod si Troy kon interesado pa ba nga mobalik og himo og pelikula si Aubrey kay matud pa daw gilaay kini.

Sa samang higayon gipalanog ni Troy nga nagtungha siya karon og crash course sa directing ubos ni Erik Matti ug gani ubay ubay na nga commercials ang iyang na-direk.

Gipalanog usab niya nga niadtong panahon nga nawala siya sa showbiz, mi-concentrate siya sa iyang banda diin siya maoy vocalist apan matud pa niya, dili maayo ang kita.

Ang 'Binibining K" isalida na karong September 13 diin apil usab sila si John Lapuz, Candy Pangilinan, Jimmy Santos ug Dennis Padilla sa direksyon ni Joven Tan.