Katilingbanong kawsa sa Black Star

Pagbugtaw sa kamatuoran diha sa musika. Paghubit sa inadlaw-adlaw nga sitwasyon sa katilingban may kalibutan sa krises ekomikanhon, political ug kawad-on. Kining tanan mapanalaminan diha sa mga kanta sa sumusubang nga bisrock band nga nagtawag sa ilang kaugalingon isip "Black Star." Ang grupo namugna niadtong September 2005 ug karon mipasilong diha sa halapad nga landong sa Zugbuanong Lumad kon Zuglu. Ang pagkamahiligon sa musika sa mga sakop niini maoy bidlisiw aron sila nagkatapok, nagkapundok ug nagkahiusa.

Ang "Black Star" gilangkuban nila ni Hubert Abalo (bass guitar), Zaloy Bacasmas, (vocals) Nicholas Badano (vocals), Christopher "Toopsy" Racal (bass guitar and drums) ug Jimmy Zamora(lead guitar). Progressive rock ang ilang istilo sa musika. Sila si Demy ug si Christopher nga maoy band leader ang naningkamot nga matukod ang grupo. Ang duruha pareho nga mitapos sa kursong Bachelor of Music sa Collegio de Immaculada Concepcion.

Kaniadto si Christopher kinsa usa ka Talisaynon miyembro sa bandang Scare Crew samtang ang laing mga sakop nila gikan usab sa nagkadaiyang mga banda. Dungan niini gipadayag ni Christopher nga makamao siyang motugtog sa nagkalain-laing instrumento sa musika sama sa uban niyang mga ka-banda.

Si Christopher usa ka magtutudlo sa musika sa mga high school students sa Saint Scholastica Academy diha sa Tabunok sa milabay'ng lima ka tuig, nahimo usab siya nga music teacher sa San Carlos Girls High ug anaa na siya sa Talisay City College. Ug ang kauban niyang si Demy nagtudlo usab karon sa music sa CIC.

Gibutyag ni Cristopher nga ang ilang mga gigamang kanta nagkadaiya ang tema sama sa panawagan ngadto sa nagduma sa renda sa pangagamhanan aron mahigmata ug likayan ang pangilkil ingon man usab duna usab silay mensahe alang sa mga yanong lungsoranon para mahigmata ug manikay-sikay aron maglaraw ug magbuhat og mga butang nga makahatag og kaayohan sa tanan. Duna usab silay kanta nga nagtuki sa kalikupan ilabi na ang pagpanalipod ug pag-ugmad niini aron kini molambo ug kapahimuslan sa umaabot nga henerasyon.

Ang kantang "Pobre ko Datu mo" nga orihinal usab nga komposisyon sa Black Star ang karon inanay na nga nakigduwa sa panumduman sa publiko pinaagi sa lanog nga sibya sa karong gitawag nga gingharian sa bisrock- Smash FM. Ang naasoy nga kanta nagtuki sa nagka-grabe nga pagpangawkaw diha sa "kaban ng bayan."

Pangandoy karon sa "Black Star" nga makabaton og higayon nga makagama og album. Apan samtang nagpaabot pa sila sa maong panahon, padayon una sila sa ilang kawsa sa pagmugna og mga kantang magpahigmata sa katilingban aron maningkamot, makigbisog ug makighiusa alang sa kaayuhan sa tanan, pobre man o adunahan.