Avlish: "Limpiyo, baskog nga matang sa musika"

Tungod sa inspirasyon sa ilang kanhi seaman nga amahan nga si Genes, ang tulo ka magsoong lalaking Silva sa Pondol, Balamban nagkasinabot nga mugnaon ang usa ka kanta nga naghagit sa pagbangon sa Sugbo.

Tuod man mitumaw ang bandang Avlish (binaleng pagbasa sa apelyidong Silva nga gipun-an og "h" sa tuyo nga mahimo kining funky paminawon). Ang ilang "Hagit (Bangon Sugbo)" maoy matawag og kontribusyon sa tinguha nga ang himoong prioridad sa mga batan-on karong panahona mao ang pagtabang nga maalim ang gikerker natong ekonomiya.

Pinaagi sa Bangon Sugbo, ang Avlish mipasupot og usa ka matang sa hagit alang sa mga batan-on nga magpakabana, manginlabot o mo-interbener alang sa pagputol sa talikala sa grabeng kawad-on pinaagi sa giingon nilang "wise choices that would create a domino effect on other sectors of society we all must learn to live interdependently with."

Ang 24 anyos nga si Quiel, kansa maoy vocalista/gitarista ug maalamon usab sa keyboards nagsaysay nga ang ilang amahan nga si Genes kanhi bahista sa banda nga iyang natukod sa iyang kabatan-on. Matud pa sa magsoong Silva, si Genes ang angayan sa titulong "karaang rockista" tungod sa iyang gitawag og "old rock schoolhouse". Dako, lawom ug lapad ang impluwensiya ni Genes ngadto sa iyang mga anak ug gani napahid na niya sa mga abaga sa tulo ang iyang "musical genius and emotional intelligence" nga karon maoy nakahatag og direksyon kon klarong tumong sa musika sa Bisrock band nga Avlish.

Kauban sa iyang mga manghod nga silang Ken, 16 (drums), ug Jordan, 19 (bass, vocals) lakip si Dennis Bacaron, 18, (guitars, vocals) naghugpong ang maong mga lumad nga Balambanon aron iduso ang gilarawan nilang "limpiyo ug baskog nga matang sa musika". Buot ipasabot nga gawas nga bug-os, lunsay ug tim-os ang tinguha niining makapausab sa prioridad sa kabatan-unan, baskog ang nagliming mensahe niini diha sa tinarong nga paghan-ay sa lyrics.

"Usa na's gipasabot diri namo sa among amahan nga puslan man mobuhat ka'g kanta kanang makatabang sa paradigm shift sa mga parehas namong mga batan-on aron magiyahan kadtong nahisalaag og nga angayan nga makakita og lamdag. Tungod kay dako man ang tsansa nga modangop sa musika ang batan-on para ipagawas ang iyang gipanghambin, likay mi's mga inamaw o hinanggaw nga mga lyrics," pasabot ni Quiel.

Tungod kay si Quiel man ang main songwriter sa Avlish, iyang gipahimug-atan ang iyang baruganan pinaagi sa pagpalawum nga, "Hagit talks of the youth of Cebu. And so are most of our songs. Seryoso among type sa songs then mostly inspirational, bringing hope to the youth."

"Bangon Sugbo, singgit kabataan/ikaw ang nagdala sa atong kauswagan/Bangon Sugbo, singgit kabatan-onan/hagiton ta ang ugma, sa atong panaghiusa," sa ingon niini nga paagi gihan-ay ang maong hagit.

Ang upat ka sakop sa Avlish puros mga tinun-an sa Cebu Institute of Technology busa gitawag nila og CIT-based band ang ilang pundok. Ang magsoon nagsugod isip bandang "Sliktrik". Tungod kay suod nila si Dennis nga katalirongan usab, ila kining gidapit nga mopasakop kanila isip vocalista. Si Dennis gikan sa hardcore nga bandang "Blitz Wicked" isip guitarist. Una silang nakapasundayag sa Harrison Park diha sa Osmeña boulevard-dalan Aznar alang sa pagsaulog sa Sinulog sayo ning tuiga. Dakong grasya, matud pa, ang mga out-of-town performances sama didto sa Camotes island alang sa pagbukas sa Lake Danao Park sa lungsod sa San Francisco. Didto, naka-jam nila ang lain pang pito ka mga banda. Gisundan kini sa usa ka pagsaulog og kapistahan sa Carmen, Bohol kauban ang pipila ka mga show bands.

Gawas sa ilang gugma ngadto sa ilang yutang natawhan - ang Pondol- nga ilang gilarawan diha sa ilang lain pang komposisyon nga nag-ulohan og "Balamban", ang ilang album puhon nga "Call of Silence" maglangkob usab sa mga love songs nga gigama ginamit ang impluwensya sa rock 'n roll, ug sa mga mangantahay nga susama sa Creed, Alter Bridge, AC/DC, Nickelback ug Led Zeppelin.

"Hagit poses a challenge for the youth nga ipakita ang ilang dakong purpose, dili ang ilang pagka-liability ngadto sa katilingban," mao kini ang hinugpong nga baruganan sa Avlish.