Mga 'chika likod sa camera'

• Alas siyete pa lang sa kagabhion naghugop na ang mga tawo aron pagsaksi sa Grand Opening Night sa Pinoy Dream Academy aron pag-atang usab kinsay mapili isip 16 scholars didto sa atubangang bahin sa Provincial Capitol.

• Paglabay sa usa ka oras labihan na ka puno sa venue, ang uban nagbagotbot kay dili na mahimong mopaduol pa tungod kay labihan na ka puno sa dapit nga giandam alang sa kadaghanan.

• Nagyagaw usab ang VIP Entrance sa tuong bahin sa Capitol tungod kay daghang naghupot og VIP Pass ilabi na mga ginikanan ug kadugo sa 38 Dreamers ang wala sa listahan. Naglibog usab ang mga gwardya tungod kay matud pa nila labihan ka daghan sa "lider-lideran" hinungdan nga nagyagaw ug wala sila magkasinabot kinsay sundon.

• Dunay uban nga VIP Pass holder usab ang miatras ug midesisyon nga sa telebisyon na lamang motan-aw tungod kay wala naman sila makasulod sa dapit nga gitagana sa kadaghang tawo.

• Sa sinugdanan ang mga sakop sa Cebu Press nga naghupot usab og susamang VIP Passes gibabagan sa mga gwardiya kay pangangkon nila ang kamanduan mao nga pasagulon lang og tindog ang media sa kadaghanan. Paglabay sa 30 minutes nakalingkod ra gayud ang mga miyembro sa Cebu Press sa atubangang bahin (thanks to Ms. Trixie Tolentino of ABS-CBN-CEBU), tungod kay duna gayud diay giandam nga dapit alang sa media apan wala makasabot niini ang nagbantay sa gates.

• Napulo ka minuto sa wala pa hingpit og galing ang mga camera aron paghatod sa labing dako nga reality based show sa ABS-CBN, mipahiluna na ang tulo ka mga hosts nga sila si Toni Gonzaga, Sam Milby ug Nikki Gil. Si Toni maoy labing giabibahan sa tanan, mapababaye o lalaki nagpanawag sa iyang ngalan ug agig pagsanong, miwara-wara usab siya, mipahiyom ug mikidhat. Nidaot ang lawas ni Sam Milby ug bisan pa man og nagsigi siya og pahiyom tataw ang kalapoy sa iyang nawong. Class ang dagway ni Nikki sa personal, apan dunay mikomentaryo gikan sa likod nga bahin sa mga nanglingkod sa VIP area, nga murag "wig" ang buhok sa singer/ VJ.

• Unom ka minuto sa wala pa magsugod ang show, ang guwapo nga TV Director, Laurenti Dyogi, nagpahipi sa kilid ug hilom nga nag-ampo. Una niini, napuno sa singgit ug pakpak ang palibot, nagpanawag sa ngalan sa director kinsa miwara-wara usab sa iyang kamot dungang pahiyom.

• Hasta kapila gibalik balikan og map ang stage tungod kay dangog na kini gumikan sa pagtutaligsik.

• Sa dihang hingpit na nga nagsugod ang show, misamot kadaghan ang midayeg kang Toni isip host gumikan kay nilang tanan siya ang labing dali nga "maka-pick-up" sa mga instructions. Siya usab ang walay daghang arte nga andam magpa-uwan mabuhat lang ang iyang trabaho.

• Matag commercial break, si Toni usab ang kanunay nga nangumusta sa kahimtang sa mga nanan-aw, ilabi na niadtong nagkadagko na ang lusok sa taligsik. Ang labing hugyaw nga punchline niadtong gabhiona, off- cam mao kadtong gipangutana niya ang mga tawo og " kumain na ba kayo?" ug dihang gitubag nga wala pa, mikomedya siya sa pag-ingon " huwag kayong mag-alala, lilipas din yan!"

• Off-cam, si Sam nagsigi og pa-cute kang Toni ilabi niadtong iyang gipayungan ang dalaga, apan ang banggiitang host daw walay nabantayan ug padayon nga nagbansay-bansay sa iyang mga linya.

• Sama sa nabalita na sa Banat Hugyaw niadtong milabay'ng adlaw, naghugop gayud ang mga supporters sa "bisrock community" agig paghatod sa bokalista sa Scrambled Eggs, Eduardo "Jay-R" Siaboc ngadto sa ganghaan sa katumanan sa iyang mga pangandoy. Matag karon ug unya, gisinggit-singgit nila ang ngalan sa ilang idolo. Gawas sa mga fans, mipabuhagay usab sa ilang suporta ngadto kang Jay-R ang mga guwapa ug guwapang mga sakop sa Models Association of Cebu, nga nagsul-ob pa og putting T-shirts nga gimarkahan og "Scrambled Eggs" sa atubangang bahin niini.

• Daghan ang "na-kilig" sa eksena nga ilang nakita atol sa production number sa rock group dihang ang laing pambato sa Sugbu nga si Panky Trinidad, milingkod sa paa ni Jay-R atol sa finale. Daghan usab ang naluoy kang Handrew, ang host sa Sabado Na Gyud nga wala malakip isip 16 scholars. Pipila ka mga sakop sa Cebu Press, giganahan usab nga masulod unta si Michelle sa Australia imbes nga si Gemma Fritzgerald.

• Sa katapusan, daghan ang ginindotan sa production numbers sa mga "Dreamers" ug miingon nga kon mahimo pa lang wala nalay tagakon sanglit silang tanan duna gayo'y igong potensyal aron mahimong "next big thing" sa industriya. Kudos Kapamilya!