Prinsesa sa kahanginan

Nagmatngon og buot nga ang tanan niyang panginahanglan sarang nga mahatag sa iyang mga ginikanan. Apan bisan paman sa maong abunda nga kahimtang wala niya tuguti ang iyang kaugalingon nga kanunay nga iyango-ngo ngadto sa iyang pamilya ang tanan niyang panginahanglan. Hinuon sa dihang siya nagpanuigon og 17, midesisyon nga mulupad sa Cagayan de Oro City diin siya nag-part time isip usa ka DJ samtang nagtungha sa kurso nga Mass Communication didto sa Xavier University.

Si Geraldine Dejos nga naila sa kahanginan isip DJ Kim Twister diha sa mas gipalanog nga estasyonang "95.5 Star FM" wala damha nga daw sama sa usa ka alimpos sa kapaspas pagkab-ot sa iyang pangandoy nga mamahimung usa ka DJ, usa sa mga rason sa iyang pagkuha sa kursong Mass Communication. Si DJ Kim Twister una gidala sa alimpos diha sa ganghaan sa Star FM, unang naglanog-lanog sa LS 97 sa ABS-CBN ug DYBU Love Radio isip Gerry Kim ug Kim. Samtang sa iyang unang tuig sa Star FM naila usab siya isip Star Kim.

Bisan nahadiin-diin na siya gidala sa kapalaran ug gisaag sa panahon dali lamang siyang namatikdan ug nailhan tungod sa pangalan nga "Kim" nga daw mipilit na kaniya. Ang maong pangalan iyang gigamit tungod sa iyang pagtamod sa iyang idolo nga si Lea Salonga.

"My real name is Geraldine. Kim is my dream name co'z I love Lea Salonga and di ba she portrayed Kim of Ms. Saigon, that's why it's Kim," pasabot pa ni DJ Kim Twister.

Kung talento, dagway , ug kaalam ang pagahisgutan aduna gayuy ikabuga si dj Kim Twister, apan wala niya gililong ngadto sa Banat Hugyaw nga naglisod siya sa iyang unang mga adlaw isip usa ka dj. Kini tungod kay gawas nga nagtungha pa siya niadtong mga panahona dili usab malikayan nga aduna siyay nakauban sa trabaho nga mas nahi-una na kaniya sa maong industriya ug mas taas na og kasinati-an.

"First few days, first few weeks of being a dj mu-struggle gyud ka ana, hilabi na nga bag-o paka with other people nga dugay na sa job, 'nya ikaw trying to learn pa. Murag competition nga bag-o paka unya struggling how to become a dj," pagpadayag pa niya

Walay misupak dihang natudlo siya isip senior dj kaniadto ug nahimo'ng assistant manager sa pagkakaron. Unya giplanuhan siya karon nga himuon'g assistant area manager sa estasyonan nga iyang gi-alagaran sulod na sa lima ka tuig, human nakita sa management ang iyang dakong gugma ug dedikasyon sa iyang trabaho bisan sa kamatuoran nga mas ubos ang sweldo niini itandi sa ubang trabaho.

"I love being a dj. Its cool gotta make people happy, hardship in looking for client. As they say when you're in the media you'll live like a queen and die like a rat. Live like a queen because people would know you and die like a rat because you don't earn as much as other people are earning."

Fun, music, friends ug love mao kana ang kinabuhi sa usa ka dj para kaniya. Hapit tanan niyang oras iyang gigahin sa iyang trabaho kay gawas nga gusto niyang ipadayag ang iyang dakong gugma sa musika, pinaagi niini iya usab nga nabatyagan ang pagmahal sa iyang suking mga tigpaminawan sa iyang programa'ng "Its All For You" matag alas 9:00-11:00 sa buntag ug 1:00-3:00 sa hapon .

"My God, listeners I love them, bitaw walay plastikan, they are very important in a sense nga they become a part of my life. There's even one listener, one family nga mag pa-enroll sila sa ilang anak 'nya mananghid pa sila nako like, Sorry Kim we can't listen until 11 o'clock because magpa-enroll pa me sa akong anak, I'l just listen to you at 1o'clock . Ingon ana sila ka-close, 'nya I haven't seen these people personally ha... they just sent me family picture. Ingon ana sila grabeh..." pagbutyag pa niya

"Kung dili gani na sila mu-text murag maka ingon ko nga naminaw ba kaha sila, 'nya I feel sad ba. Unya everyday magpadala gyud na sila og quotes through computer like, Enjoy your day, God bless you," dugang pa ni DJ Kim Twister.

Kung pagatimbangon dagha'g mga rason para mubiya siya sa maong trabaho apan mas labaw ka daghan ug mas bug-at ang mga hinungdan aron magpabilin ug magpadayon sa pagpanginabuhi diha sa maong industriya. Alang kang DJ Kim Twister ang mga tigpaminaw maoy usa sa bug-at nga mga rason nganong hangtod karon ang tingog sa prinsesa sa kahanginan padayon nga mabati sa matag panimalay o pamilya nga nahimong kabahin sa iyang inadlaw adlaw nga pagkinabuhi.