Duha ka indie films magdungan

Kon itugot sa Kahitas-an nga dili pa intawon ta mag-agnas karong semanaha, duha gayod ka digital independent films ang kinahanglan natong tan-awon, kay wa intawon ko makalugar pagtan-aw niini sa sneak preview kagahapon, kay unsaon nga nagdungan man sad kini, hinungdan nga wa na lang koy gitan-aw aron way magmahay sa duha ta tawo nga suod sa atong kasingkagol nga maoy nagdapit. Si Dr. Nestor Alonso nga food columnist sa The Freeman, igsoon ni Atty. Jojo Alonso nga producer sa indie film nga "Kubrador" maoy nagdapit nato para sa maong pelikula samtang ang suod natong higala nga tag-iya sa New Eden ug New Cinema Theaters, mao pod ang nagdapit nato para sa sneak preview sa indie film nga "Hada." Ang "Kubrador" sama sa ato nang nahisgotan dinhi, gibitoonan ni Gina Pareno ug uban kaniya mga iladong mga premyadong mga artista sama kang Cherrie Pie Picache ug uban pa.

Sa laing bahin, ang "Hada," gibitoonan usab sa iladong maayong artista sama kanila ni Emilio Garcia, Rey PJ Abellana, KC Castillo ug gipaila ang usa ka ambongan kaayong bag-ong kaplag nga si Beejay Morales. Dili man god ta makalugar sa pagtan-aw og sneak preview o makatambong og bisan unsang kalihokan basta Lunes tungod sa atong commitments sa trabaho. Lunes, alas 5:00 sa hapon ang sneak preview sa "Hada" diha sa Eden Theater samtang Lunes usab, sa alas 6:00 sa hapon ang sneak preview sa "Kubrador" diha sa Cinema 1 sa SM City, pero may pakapin pang press conference sa alas 5:00 sa hapon, di ka malipong? Maayo pag wa na lang kay tambongan, di ba?