Pasakanin album ilusad pinaagi sa "Sayaw ta Bai" jamming

Hugop sa Handuraw Events Café ugma, Sabado petsa 19 sa Agosto, aron ipakita ang imong naglumpayat nga pagpaluyo ug nagbagang kaikag niining pagahimoong paglusad sa album sa reggae band nga "Pasakanin" ubos sa usa ka jamming nga ilang giulohan og "Sayaw Ta Bai" nga kinutlo sa koro sa "Pasakanin Song", usa sa napulo ka tracks sa maong album.

Ang album nga may ulohang "Paminaw Sa Among Kanta Intawon", nga maoy kahulugan sa Pasakanin, nagbatbat sa mga sugilanon sa panikay-sikay, kapakyasan, ug kalampusan nga gitagik sa mga musikero sa University of San Carlos-Talamban campus nga silang Jon Ian "Yaniboy" Sagun (keyboards), John Reyford "Bob" Elento (guitars/backup vocals), Fraynere "Kulas" Holganza (lead vocals), Rolando "Amats" Mata, Jr. (bass guitar); Irvin Jupiter "Bitoy" Honoridez (drums), Clark Anthony "Arki" Arche (percussion/vocals), Clayton "Tonyo" Martinez (saxophone), ug Michell Glyn "Mesh" Betonio (vocals) kansa nagkumbuya alang sa paghukad og hiniklin nga medyum sa ilang mga progresibong panahum ug nagkadaiyang inspirasyon nga gisabak sa makapasayaw, makapaiktin ug makapahinuklog nga play-up sa mga tolonggon nga maoy nakahatag sa reggae sound og lahi nga matang sa lingaw ngadto sa tigpaminaw niini.

Ang laing mga reggae artists/performers nga sama sa Coolie Dread and the Microphone Commanders ug Mungkanghan maoy mosugod og painit sa maong pasundayag silbing front acts sa Pasakanin sa dili pa ang walo mobagnos pagsugod sa entablado sa ilang mga musikanhong mugna ug motayhop og kinabuhi sa ilang mga orihinal nga komposisyon nga pihong pamilyar na kaayo labi na gyud niadtong mahiligon sa reggae music. Tataw na lang nga masakyan gilayon sa mga reggaenista ang paningog sa Adyit, Pasakanin Song, Girl, Under the Sea, Grab Me Up, Different Shadow, Déjà vu, Magkahi-usa, Trabaho, ug Kinabuhi.

Nahibaw-an gikan kang Fraynere Holganza nga mas naila sa anggang Kulas nga siya na lang ang nahibiling orihinal nga sakop sa Pasakanin nga nagsugod pagtamod sa folk-ballad genre susama sa gipalambo ni Joey Ayala ug sa Buklod. Nakigkumbuya si Kulas sa pito niya ka mga kauban karon alang sa paghatod sa ikaduhang henerasyon sa Pasakanin ngadto sa transisyon niini isip reggae group, ug ngadto sa plataporma sa Handuraw ugma Sabado, alas 9 sa gabii. Matud pa ni Kulas nga ang mga tickets mapalit sa gate apan ang gusto magpa-reserba, mahimong mo-text kaniya sa 09162791538. Iyang gipasabot nga ang mopalit sa album nga balor og P200 libre na ang entrance. Hinuon, wala na kini libre nga beer o usa ka pirasong pizza. Apan kon mobayad sila sa naandang P80 entrance fee sa Handuraw, aduna'y libreng usa ka botelyang beer bugnaw o kaha usa ka hiwa sa kinaham nga Handuraw pizza (pili lang, bai gawas sa sayaw ta, bai!).

Apan sa dili pa kini mahitabo, atangi ang Pasakanin nga mo-jam diha sa UP grounds kauban ang laing mga banda alang sa UP Cook Out karong alas-ocho sa gabii, Agosto 18. Sa petsa 22, anha usab sila makit-an nga magpasundayag sa University of San Carlos Girls High alang sa Students Night nga magsugod mga alas-dos pa lang sa kahaponon diha sa Pentagon