Ang buwan sa Septiyembre

Gawas nga sa buwan sa Septiyembre giluwatan ni kanhi Presidente Ferdinand Marcos ang Martial Law, daghan kog mahinumduman niining buwana. Kay niining buwana, natawo ang akong anak nga si Nilo Relatado [September 20] ug ang akong paboritong pag-umangkon nga si Marilou M. Relatado [anak ni anhing Danny Relatado-natawo sa September 21], ug namatay usab sila si Danny [September 26] ang pinangga nakong iyaan nga Perlas awardee, anhing Jacoba Espinosa vda. De Villaflor, ug ang asawa ni anhing Danny nga si anhing Filomena M. Relatado. Si anhing Danny nga nag-taxi driver una mahimong news reporter sa DYRC, nahimong pinangga sa usa ka turista nga gihinganlan og Tom Keys, tungod kay giuli man ni anhing Danny ang bag ni Tom nga dagha'g sulod nga mga dollars, didto sa hotel nga iyang gihatdan ni Tom, busa bisan reporter na si Danny sa DYRC, kon mobalik si Tom sa Pilipinas makigkita gayod ni Danny. Gani, hangtod karon, kon moanhi sa Cebu si Tom, makigkita gayod siya namong suod nga pamilya ni Dan, ug dili gayod mosipyat ang mga regalo, gawas sa hinabang niyang financial.

Septiyembre 25 usab ang adlaw'ng natawhan sa suod nakong higala nga si Wendy Mendoza, hinungdan nga niining adlawa, magpakaon gayod mi si Wendy, ug maghatag og kalingawan ug ginagmay nga regalo sa street children sa Parian Drop In Center. Apan subo nga palandongon nga, daw dili una kini mahitabo barong tuiga, tungod kay naapil sa pagkasunog ang parlor ni Wendy diha sa Plaza Fair. Gani, hangtod karon, wa pa ko makapaneguro kon asa ni Wendy balhina ang iyang parlor.