Dakpa si Labidabi Rico Perico

Pangalan: Glynn B. Bancairen

B-day: October 31, 1979

Address: Sambag II

Ed. Background: AB Political Science

Type of Music: Pop ug Rock

Slot: 4-6 am, 6-10 am ug 2-6 pm

Program: Hot Pandesal Show, Morning Hataw, Afternoon Hataw

Hobbies: Playing basketball, Singing

Kuyog-kuyog sa usa ka higala kaniadto nga nakadaog og promo sa usa ka estasyonan sa radyo ang mipukaw sa nagahagok niyang talento. Dungan niini iyang giatubang ang mga mata sa katawhan nga daw mitulisok ug walay ku-kaikog nga nagyama-yama kaniya hilabi na nga kaniadto bisan sa ilang banyo naglanog-lanog ang iyang tingog isip pagbansay-bansay aron sa higayon nga andam na siya nga muatubang sa mga tigdumala sa mga estasyonan sa kahanginan ug dili na siya maglisod pa sa pagpadayag kung unsa ang pinitik sa iyang dughan.

Feeling DJ ang tawag kaniya kaniadto sa iyang mga boardmate. Apan wala manumbaling ug hinuon ganadong mitubag sa maong hagit. Siya si Glenn B. Bancairen nga naila isip DJ Rico Perico diha sa numero unong estasyonan sa kahanginan ubos sa gibuhi-an'ng desisyon sa KBP ( Kapisanan ng mga Broadcaster sa Pilipinas) ning tuiga " 91.5 HOT FM".

Si Glenn sa wala pa mahisalag sa ganghaan sa Hot FM, unang naila sa kahanginan isip Glenn Gorordo ug Janithor sa "Yes FM ug Love Radio". Siya miangkon sa Banat Hugyaw nga lisod ug challenging gayud ang iyang unang mga adlaw isip usa ka DJ hilabi na nga niadtong mga panahona nagpadayon pa siya sa iyang ika-duhang tuig sa kursong Political Science diha sa Southwestern University. Pun-pa nga aktibo siya sa campus politics isip governor sa Supreme Student Council sa SWU kaniadto sa dihang senior student na siya. Sa mao usab nga tuig nagsugod na siya sa paglupad-lupad sa kahanginan isip DJ Rico Perico. Ang langgam nga mulingaw sa nagasubo 'nyung dughan".

Sama sa usa ka langgam, nasayud siya nga aduna siya'y kagawasan nga talikdan ang pagka-DJ ug ipunting ang iyang atensyon sa iyang pag-eskwela kay gawas nga duna siyay katungdanan sa SSC niadtong panahona nagsugod na usab siya sa pag OJT (On the Job Training).

"Mas priority nako ang akong pag-eskwela pero nahigugma gyud ko sa akong trabaho, mu-uli ko sa station 'nya mugawas sa school. Usahay anhi ko magtuon sa station, 'nya pag fourth year college nako 'nya ako nay na governor usahay anhi nalang sila magpa-sign sa station. Pero wala ko nagmahay nga wala nako gi-give up ang akong pagka-dj co'z wala gyud ko naglisod og pangita og trabaho after I graduated last 2004 kay wala man ko nahunong sa maong trabaho."

Tiunay nga responsible si dj Rico Perico dili lamang sa iyang pagka-estudyante kaniadto, ni sa iyang trabaho sa pagkakaron kundili lakip na usab sa iyang pamilya. Siya nagkanayon nga sa pagka-karon wala pa gyud mahisulod sa iyang alimpatakan ang pagminyo kay gusto pa niyang tabangan ang iyang mga ginikanan sa pagpatungha sa iyang mga igsuon. Hilabi na nga siya usab ang kinamagwangan nga anak. Para kaniya ang iyang pamilya ang iyang gihimu nga inspirasyon sa matag yaw-yaw niya sa kahanginan.

"Ang akong family ang akong sandigan, sila ang akong kadaganan. I'm happy knowing nga proud sila nako. I'm the eldest then, ako gyud ang tan-awon sa akong mga igsuon maong magbantay gyud ko sa akong mga gibuhat," pagpaambit niya ngadto sa Banat Hugyaw.

Kung si dj Rico Perico ang pasultiun, dili gyud ikabaylo sa bisan unsa paman ang iyang trabaho sa pagkakaron kay enjoy ug mapasigarbohon gayud kaayo siya niini, hilabi na nga matud pa niya anaa siya nahimutang sa numero uno nga estasyonan sa kahanginan. "Proud kaayo ko kay ang pagka dj man gud, mura sad na og basketball game, nga dili makumpleto ang imung pagka-player if dili nimo makuha ang MVP o dili mo ma-champion, mao nga kumpleto na ang akong pagka dj kay naa man ko na-belong sa number one nga station, ang Hot FM," pagtimbang-timbang pa niya.

Kugihan ug pasensyoso gayud si dj Rico Perico sa iyang trabaho mao'ng wala gyud siya maglisod sa pagkuha sa simpatiya sa mga mas labaw pa niya ug hilabi na gyud sa mga tigpaminaw. Maong gusto niyang ipaabot ngadto sa mga nagplano nga musulod sa maong kalibutan nga dili magpakawa sa paglaum.

"Bahala og dili dayon mo madawat sa una, ika-duha, o pipila ka mga higayon, kay bisan ako kadaghan naman sad ko nabastid sa mga estasyonan nga akong gipanguyaban kaniadto, dili lang gyud muhunong" mensahe pa niya.

Malipayon siya nga nakatampo sa iyang talento ug nakalingaw sa katawhan. Sa pagkakaron wala pa naga-id ang iyang dughan, mao'ng sa iyang paglupad nanghinaut siya nga kung kinsa man ang maka-bitik niini magmalipayon unta siya. Kung unsa kataas, kalayo ug hangtud kanus-a siya maglupad kana maoy wala pa niya masayri.