Performance level ni Fario

Kining maong artikulo akong halad alang sa mga "fayter" kaayong mga sakop sa Alpha Kappa Bomba diin ang ilang haring gangis nga si Bernard Galvez Fario nailhan dili lamang sa mga kirig-kirig niini kon dili sa iya usab nga gitawag og "performance level" matag patong niya's entablado o plataporma alang sa pagbirit sa mga kinakusgang komposisyon sa bandang "Ossified!" - ang "Deep Pressed" ug "Mada'a Ra'g Smile" - diin siya ang vocalista.

Pipila ka buwan ang nilabay, nagtoo gyud ko'g dako nga Fario ang ngalan sa ilang banda tungod kay matag tukar nila sa Handuraw Events Café ang pangalang "Fario" man ang motumaw.

Sa dihang nasaksihan ko na ang mga kirig-kirig, kurog-kurog, ug karag-karag ni Fario kauban ang lain pang sakop sa AKB nga nailhang si Halord, nagisi ang akong baba ug napagaw ko'g kinatawa sa kumbuyang pasiaw nga daw fusion sa kasipat sa Pork Chop, Dos Pakatok, YooMaxx ug Champoy ang dating. Kini tungod kay tabangan nila og ilog ang mga instrumento sa mga nagpasundayag nga laing banda. Sama pananglit sa pag-ilog sa mikropono gikan kang Eugene Corpin, ang vocalista sa "Aggressive Audio" ug ang pag-apil og kuting-kuting sa gitara ni Sidney Alburo sa mao gihapong banda. Nahitabo kini atol sa pinakaunang "Bisrockers Nite" sa Handuraw nga akong nasalmotan.

Sa dihang gitagik ko na ang artikulo alang sa Banat News-Bisrock Entablado (Hugyaw section) ug The FREEMAN Entertainment, diha nako natino ang kaligdong ning maong batan-on nga natawo ngadto sa magtiayong lumad nga taga Guimaras, Iloilo nga silang Benjamin Fario ug Salvacion Galvez, niadtong Marso 9, 1987 diha sa Opao, dakbayan sa Mandaue, ikatulo sa unom ka magsoon.

Sakop sa Bible Baptist Church, si Bernard kon Fario naghangad sa mga mugna sa iyang mga musical influences susama sa Missing Filemon, Aggressive Audio, Dashboard Confessionals, The Used, ug Taking Back Sunday.

"Na-challenge ko og kat-on sa gitara kay everytime sabot mi mga silingan manaygon, magpa-presyo ang mga gitarista till nakat-on ko then ni-try ko start mag-compo," apas-sumpay ni Fario.

Matud pa ni Ms. Zarah Smith nga mao ang tag-iya sa Handuraw, dili niya kapugngan si Fario sa mga kini-at ki-at niini tungod kay makalingaw siya. Makaingon usab ako nga ang nakatawag gayud sa akong pagtagad sa ilang banda dili man dayon ang kanta sa "Ossified" kondili ang paagi sa pagpasundayag ni Fario.

Sa likod sa iyang mga layat-layat, kisi-kisi, hiyod-hiyod, ikid-ikid, kaliring-kaliring, saliring-saliring, kirig-kirig, ug balitok-balitok, tataw ang iyang kagustuhan nga makalingaw ug dili ang magsinamok. Ug kini ang akong gipakpakan kay kini ang klarong taras sa usa ka maglilingaw.

Apan bisan pa man og aduna gayu'y hugot nga moingon nga sipat si Fario, gihiklin niining tagsulat ang mga detalye sa iyang kinabuhi aron masabtan nga wala kini nakapanas sa iyang oryentasyon sa "Hagtik sa Titik" diha sa Lakandiwa, ang opisyal nga magasin sa mga tinun-an sa University of Cebu.

"Participant ko sa Literary Workshop sa Hagtik sa Carcar. Then fortunately, naganahan sila sa akong mga craft/poems. Na-a na ni ron sa among mga songs nga gi-play - Deep Pressed, Mada'a Ra'g Smile, Problem Solving, ug Bahawpenings.

Ki-at apan sensible mao kana ang nakapalahi kang Fario sa ubang mga batan-on; sipat apan nagbaha ang talento; katok apan naglunop ang pagbati alang sa Sugbuanong Binisaya nga buot niyang mapahimug-atan diha sa iyang mga komposisyon kansang mga mensahe sa pagpukaw og usa ka kawsa naglimin.

Tinun-an sa kursong Mechanical Engineering ug kansa ana-a na sa ikatulong tuig, nagkanayon si Fario nga grabe ang challenge sa pagbalanse sa pagtuon ug ang tawag sa pagbanda.

Nalipay na lang siya og dako nga ang iyang mga ginikanan misaksi gayud sa nakalabay nga Bisrockers Nite diha sa Mactan Sports Complex diin ang mga fayter nga mga Bisrockers sa Mactan Shrine Area nipakita na pud sa hugot nga suporta gawas sa paghangop usab sa mga Bisrockers sa bandang Ossified nga gitawag niya'g usa na ka achievement alang kanilang "struggling" sa kalibutan sa local indie music.

"Sa ako diay'ng nanay ug tatay. Salamat sa pag-anhi. Salamat sa suporta," ni Fario pa dayong tudlo ngadto sa nahimutangan sa iyang mga ginikanan.