Kasadya uban ang Close-Up to fame 2 finalists

Mibisita dinhi sa Sugbo bag-ohay lang ang "famous eight" finalists sa reality commercial model search nga Close-Up to Fame 2 aron makighugyaw sa 10th Anniversary sa MOR 97.1 Lupig Sila. Ang mga nahisgutan mao sila si Vince, Micah, Kenny, Kat, Aimee, Ara ug ang Cebuana nga si Dimples. Human sa ilang production number diin ilang gisayaw ang theme song sa maong TV search, misalmot ang mga finalists sa mga duwa sama sa paper dance ug water melon eating contest nga gipahigayon atol sa variety show nga giuluhan og Kapamilya Fiesta.

Sa pakighinabi sa Banat Hugyaw sa mga finalist, nasayran nga ang duha sa mga hunk "fame seekers" nga sila si Vince ug Micah adunay paryente sulod sa kalibotan sa showbiz. Nibutyag ang "Crush ng Bayan" nga si Vince nga iyang tiyo ang malampusong aktor nga si Piolo Pascual sa iyang father side apan iyang gipahimug-atan nga wala siya nagsalig niini tungod kay buot niyang mosikat pinaagi sa iyang kaugalingong pagpaningkamot. Samtang ang "Curly Cutie" nga si Micah nga nahibalik sa contest isip wild card pag-umangkon usab sa beteranong aktor nga si Tirso Cruz III. Apan sama ni Vince iya usab nga gipalanog "being part of a showbiz family never worked for anyone's favor." Kini tungod kay matud pa niya silang tanan naningkamot gayud nga modaog pinaagi sa pagpakita sa ilang katakus.

Ang makadaog sa reality search mamahimo unyang sunod nga Close-Up endorser sama ni Sam Milby busa gipangandaman na gayud nila ang pagsulod sa natad sa kalingawan. Matud pa ni Kenny kinsa giilang "The Total Performer" tungod sa iyang kamaayo mokanta ug mosayaw, "showbizness is in my veins, it's good to hear people clap their hands for you, I just love it." Para sa mga wala nasayod, unang nigawas sa TV ang half-Pinoy nga si Kenny sa usa ka napkin commercial. Dungan niini sila si Vince ug Micah andam usab makigtigi sa kalibotan sa showbiz ug magmalamposon sama sa ilang mga tiyo nga nahimong dagkong ngalan sa industirya.

Sa luyong bahin, malipayon kaayo ang atong paisanang si Dimples sa dihang nahinabi kini sa Banat Hugyaw tungod kay nahatagan siya og higayon nga makabisita sa iyang hometown. Si Dimples o kon Diana Genne Durano Guevara nibutyag nga wala siya nagdahom nga makaapil sa "Close-Up to Fame 2" ug magdugay sa maong contest. Apan tungod sa pagdasig sa iyang pamilya ug tungod kay wala man usab siya'y gibuhat niadtong bakasyon gikalingawan nalang niya ang pag-apil sa maong contest. Si Dimples mitapos sa Immaculada Concepcion ug karon tinun-an sa kursong nursing sa University of Cebu. Matud pa niya mapildi man o modaog humanon gayud niya ang iyang pagtuon.

Sa tanang female finalist si Dimples ang palangga sa crowd bisag asa pa man sila mangadto apan nagpabilin gihapon nga mubo iyang 'text votes' hinungdan nga bisag unsa kanindot iyang performance para sa mga judges, nagpabilin siya sa ubos nga rank. (Si Dimples ug Micah natangtang na niadtong Sabado-editor). Ang text votes 50% sa criteria sa maong contest ug dako nga hinungdan para matak-tak ang usa ka "fame seeker" apan mapasalamaton gihapon si Dimples sa iyang mga "kababayan" nga mingsuporta kaniya ug nalipay sa iyang performance.

Karong adlawa mahibaw-an kon kinsa nila ni Reb, Vince, Micah, Kenny, Aimee, Ara, ug Kat ang magmalamposon nga "fame seeker" ug mamahimong sunod nga Close-Up endorser. Ang Close-Up to Fame 2 makit-an kada Sabado human sa Wowowee sa ABS-CBN ug host niini sila si Heart Evangelista ug Bianca Gonzales diin judges sila si Dina Bonnevie ug Direk Joey Reyes. Gitudlo usab isip "partners to fame" sila si Meryll Soriano, Archie Alemania, Rafael Rosel, ug Nikki Valdez.