Tambag para sa newcomers

Tungod kay daghan na kaayo karon ang mga talent search, dili na usab maihap ang daghan kaayong mga bag-o nga mitikang sa hagdanan ngadto paingon sa kabantog ug hugyaw nga panimpalad. Pipila sa mga talents search dinhi lang gani sa Sugbo mao ang "Little Big Star" sa ABS-CBN, ang regional search usab nila sa Star In A Million," ang regional search usab sa "Pinoy Pop Superstars" ug ang gitawag og Pinoy Pop Sensation sa programang " Oi " ug karong bag-o, gilusad na usab sa ABC-5 ang Philippine Idol.

Ang CCTN-Channel 47, aduna usay "Search for the Southern Star" nga gidumala ni Novo Bono diin, ang mga pildero pa lang gani, makaapil na sa nagkalain lain usab nga mga programa sa Channel 47 sama sa "Salamat sa Musika," sa "Sam Enchanted Evening" ug sa pipila ka mga TV series.

Apan pipila usab kanila, hinay hinay na usab nga natuboan og sungay. Dili na gustong badlongon ang ilang gipangsul-ob nga mga sapot, ug pipila kanila, magyawyaw na kon dili dayon mahimo ang payroll hinungdan sa pagka -delay sa sweldo usahay, (gilaliman sa trabaho sa ubang tawo ug sa pagpabuhagay sa puhonan sa CCTN, nga limitado usab ang mga commercials).

Tungod niining namatikdan sa pipila ka medyo taodtaod na sa natad sa showbiz sama kanila ni Armestice Abayan, Edgar Murillo, Liza Lariosa, Nilo Anhao, Matias Abaincia, Jr, Vergel Racho, Ruby Ramirez ug uban pa, sila dunay tambag sa mga newcomers. Kinahanglang dili ma-late, ug kon buyagon ang sinina nga gisul-ob [ayaw ni direk Al Evangelio ng ganyan], dili unta isipong daotan, ug magpasensiya gayod kon malangan ang sweldo usahay, ug labaw sa tanan, dili mag-arte arte ug mag-feeling hawod kon magustohan sa director, cameraman o sa leading man, labi nag minyo ang mga naasoy nga mga natungdan, kay kon babaye ka, mahulog ka man lang gayod ug kabit. Busa dili ka gayod angayang mag-inarte.

Kining tanan tambag gikan sa daghan nang naagian sa kinabuhi sama nilang Ruby Ramirez, Edgar Murillo ug uban pa, kay kini gani sila si Edgar ug Ruby nga mabuhi kon dili mag-artista, wa gani hang-up hangtod karon. Si Edgar, designer sa usa ka clothier ug ang asawa maayog trabaho.

Si Ruby Ramirez, nga sama ni Edgar anaa karon sa "Tres Metros" ug "Dear Tatay," kanhi collector sa The Freeman, karon usa dakong haligi sa Lancer Security Agency ug nagnegosyo pag mga apartment, pero hangtod karon, wa pa gayoy nakitang bisag gamay'ng migitib nga sungay sa ulo.