Jericho-Heart balik Kapamilya?

Misamot ka hanap ang posibilidad nga motapon na ngadto sa Kapuso network sila si Jericho Rosales ug Heart Evangelista. Ang tinubdan sa PangMasa nga nakabasa sa balita nga nakig-meeting o dunay umaabot nga meeting ang duruha sa mga kadagkoan sa GMA Network miingon nga hayan dili na kini mahitabo pa.

Kini tungod kay matud pa duna nay "counter-offer" ang ABS-CBN sa duruha nga usa ka soap opera. Miingon ang tinubdan nga interesado pa gihapon ang ABS-CBN kang Jericho sanglit walo man kini ka tuig nga ubos sa ilang poder.

Gawas pa nakauyon usab ang Star Cinema kang Jericho human sa gipakita niini nga labok sa pelikulang "Nasaan Ka Man" last year ug sa bag-o pa lang gipasalida nga "Pacquiao, The Movie" nga co-production venture sa FLT Films International.

Miingon ang source nga istoryahan ang umaabot nga project nila ni Jericho ug Heart sa higayon nga mahibalik na silang duruha dinhi sa nasud human sa international premiere sa "Pacquiao, The Movie."

Kahinumduman nga mibiya na sa Star Magic ang duruha ug karon sila giduma na sa Manila Genesis Entertainment ni Angeli Pangilinan.

Cast sa "Atlantica" kumpleto na

Kinahanglan nga makamao molangoy ang mga artista nga maglangkob sa teleserye nga "Atlantica" nga pagabitoonan unya ni Dingdong Dantes alang sa GMA-7.

Karong adlawa gikatakda ang story conference alang sa maong serye diin matud pa kompleto na ang casting. Ang mga ngalan nila ni Iza Calzado ug Isabel Oli maoy nagbaniog isip leading ladies ni Dingdong.

Gikataho usab nga apil si Katrina Halili apan wala pa matino kon unsay iyang role, hinoon gipaabot nga kontrabida gihapon kini.

Daghan usab ang nagpaabot kon unsay mahitabo sa mga characters nila ni Isabel ug Katrina sanglit ang nahauna apil pa man sa "I Luv NY" samtang naulahi anaa usab sa "Majika."

Nasayran usab sa PangMasa nga hangtud pa sa Agosto ang "I Luv NY" samtang extended ang "Majika."