Pipila ka semana ang nilabay, akong natino nga ang Levimaboram tinuhog diay nga mga apelyido nilang Jan Michael Cedric "Janjan" Legaspi (bassist, taga Minglanilla), Christian "Pawiks" Villagonzalo (guitarist, taga barangay Hipodromo), Gaudencio "Max" Maquiling (drummer, taga Labangon), Alastair Lambo, Jr. (vocalist, taga Pardo), ug Ray Christian "Chamboy Von" Ramos (rhythm-ist, taga Punta Princesa) kansang kalambigitan sa Youth for Christ-South District nakapalig-on og samot sa ilang rapport nga dako kaayo og bili nga nahatag sa ilang mga gihimong pagsuway og sulod sa kalibutan sa local independent music.
Ang lima ka mga tabi-an nga mga tinun-an sa Don Bosco Technology Center, fourth-year high school section Magone, nakatagamtam na sa makatandug sa balatiang pagdawat sa ilang komposisyong "Love at First Sight", ang ilang unang kantang nakalusot sa gihimong screening sa Smash FM alang sa tulumanong "YourVoice, YourChoice Tingog Kabataan" matag Martes ug Huwebes, 9:30 - 11:30 sa buntag.
Ug bisan pa man ang tema sa kanta parehas kakaraan sa kawanangan ug kadagatan, nasentro gihapon ang ilang mga kanta sa maong dugukan tungod kay giila man nila nga "fifth element of existence" gayud ang gugma.
"Kabalo na ka basta batan-on, mga teenagers, mao man gyud nay theme na appealing, mga ibog-ibog, love at first sight," mao kini ang hinugpong nga panahom sa pundok.
Ang "Love at First Sight" madunggan nga manganaw-kanaw ginamit kining maong berso: usa ka adlaw, niadto ko sa balay sa akong amigo, nagsuroy-suroy kami, kay pista sa ilahang baryo, kita kog dalaga, puti sya og pa-a, wa ko mahadluk ila-ilahon siya.... Ing-ani jud di-ay/mahigugma sa usa ka bagay/ makalimtan ang tanan/makalimtan ang imong pangalan/this is what you called, love at first sight tonight.
Tungod sa inspirasyon sa Chemical Romance nga nakaimpluwensya sa grupo, ginamit ang "emo genre" nga karon mao na pud ang kinaham sa mga batan-on niining bag-ong henerasyon, ang bandang Levimaboram napuno sa emosyon nga mibirit sa mga linya sa "Love at First Sight". Ug ginamit pa ang laing mga musical influences - susama sa punk, alternative ug grunge styles - ang Levimaboram nagbatbat usab sa makalagot nga presensya sa mga "Hambugero" ning katilingban, ang makalingaw nga mga kalalakin-an nga mahilig mosul-ob og "bacon underwears" sa "Brip", ang isyu sa greenhouse effect/global warming sa "Aircondition", ug laing love song nga nigamit sa inspirasyon sa ulan sa "Taligsik sa Purgatoryo".
Nakatagamtam na usab ang Levimaboram og debut sa centerstage pinaagi sa usa ka pagdapit alang sa graduation ball niadtong Marso ning tuiga sa mga graduates sa University of San Carlos Main nga gihimo diha's Casino Español. Nasundan kini og gig sa Mactan Marina Mall niadtong April 21 alang sa "Whattah Hottah Summah" Episode 1 concert.
Ug masundan na usab kini ugma, Hulyo 15 diha's Minglanilla Sports Complex, mga alas ocho sa gabii, alang sa "The Best of Showband with the Bisrock Bands, Live Band Concert" kauban ang The Carnival Seven, Puppy-Eyed Kirtmen, Twinkle Dudo, Aggressive Audio, ug Republican. Ang kalingawan ugma pinaluyohan sa municipal government of Minglanilla, Tequila Joe's Restaurant and Bar, Asia Brewery, Inc.; Rock Fishing Village, Bee Pinoy TV14, M. Lhuillier Philippines, 97.9 Love Radio, Atlantic Hardware-Cebu, GMP, MJ, Wow Travel and More, Asian College of Technology (www.act-edu.ph), The FREEMAN ug BANAT News, ug Bombo Radyo Phils. Makauban usab nila ang mga showbands nga ODS, Extremes, Echo Frenly, Northbound nga kanhi Serendipity, ug Sweet Temptation.
Nakahuna-huna sila nga i-compile ang ilang mga komposisyon pinaagi sa Extended Play album apan gipadaplin lamang usa nila kining planoha tungod kay silang tanan mga graduating students man sa high school karong tuiga. Buot nilang hugot nga barugan nga mo-focus usa sa mga requirements alang sa pagpasar sa ilang mga subjects karon, kay ang album pwede ra nilang atimanon inig ka human sa gradwasyon.
Sa pagkakaron, nalipay na kaayo sila nga aduna'y naminaw sa ilang kanta nga gipatukar sa Smash FM ug nga aduna'y nisalig kanila.
Email-i ang Levimaboram sa vogu2ace@yahoo.com ug suroya ilang friendster site ginamit ang account: levimaboram@yahoo.com.