Veteran actor pilian og role

Sa birthday ni Sir Pete Pereyra, ugangan ni Edgar Escalante ug bana sa promo queen nga si Josie S. Pereyra, duha sa ilang mga anak ang nakatambong- si Chona, ang asawa ni ABS-CBN reporter Edgar Escalante ug ang nagpabiling guwapo ug batan-on nga iladong boxing promoter sad nga si Paul. Gawas kanila mitambong usab ang mga ka-batch ni Josie sa STC sama nilang Carmel Galona, Luda Seno ug uban pa. Nakita usab nako sila si Noel ug Mrs. Inocencio, (ang parents sa former Miss Cebu Tourism nga karon Mrs. Christine Aldeguer na kay naasawa man sa igsoon ni Jay Aldeguer). Of course, hasta si Mrs. Inocencio kon manulti, tataw kaayong may authority kalabot sa sports labi na sa boxing nga niadtong tungora wala say laing gihisgotan kon dili ang away nilang Oscar Larios ug Pacman.

Hinoon, misingit si Josie sa pagpahibaw nga moanhi si Claudine Barretto inig promote sa "Sukob" pero wa pa siya makaseguro kinsay kuyog kay di man gayod kono mokuyog si Kris Aquino nga kauban ni Claudine sa pelikula. Daghag kauban sila si Claudine ug Kris sa naasoy nga pelikula apan sila pa si Kris ug Claudine ang gipaila. Pwes kinsa nilang duha ni Kris ug Claudine maoy mag-una sa billing? Wa pay makatubag. Well, di ba miingon man si Boots Anson Roa, nga kanang problema sa billing problema na na sa producer ug dili angay'ng manginlabot ang mga artista? Ang producer konoy nasayod kinsay angayang mag-una sa billing.

Dinhi sa Cebu, matud pa dunay usa ka veteran actor nga dili gayod modawat og role sa amahan kay naanad na nga lead star gayod siya ug magbagolbol pa kon lain nga papel ang ihatag niya. Gani matud pa nagbagolbol sad siya nganong usa ka radio talent nagtingog sa duha ka lain laing estasyon apan may miingon nga, gikaluy-an na lang kono ang maong talent kay may sakit ang bana. Kinsa ni sila? Again, NO NAME NAMES DEPARTMENT! Bavuh!