Si Mark nga nahinabi sa Banat Hugyaw dinhi sa Sugbu duha na ka semana ang milabay, miangkon nga wala pa siya huwasi sa iyang gibating kaguol sa dihang giangkon ni Rachelle Ann sa national TV nga si Christian Bautista ang iyang gihigugma. Si Rachelle ang gipitik sa kasing-kasing ni Mark, apan matud pa niya, hinay-hinay na niyang gikalimtan ang mapait nga kamatuoran. Gani nagkasinabot na silang tulo ni Rachelle ug Christian kalabot sa maong isyu ug higala ra gihapon sila. Gani kuyog man gihapon sila sa Champions League sa ASAP 06 matag Domingo.
Ug samtang nagpa-alim pa siya sa samad sa iyang nagkagidlay nga pagbati miingon si Mark nga padayon gihapon siya nga magkinabuhi daw walay kapakyas nga natagamtam. 'Everything happens for a reason," pagtin-aw pa niya. Duha na ka Sabado ang milabay diin gipahigayon ang concert ni Mark sa SM Cinema 2. Ug matud pa niya nga malipayon siya sa kainit sa pagdawat kaniya sa mga Sugbuanon nga naila na sa pagka-pilian. Gani ikaduha na niyang solo concert, ang nauna didto gipahigayon sa Liloan, niadto lang buwan sa Mayo.
Sa laing bahin, malipayon ang 25-anyos nga ulitawo nga wala'y mga bad publicity batok kaniya. Gani mga positive write-ups man ang kanunay'ng masuwat, mga kabahin sa iyang pagkamapa-ubsanon. Gipalanog ni Mark nga wala'y rason nga bag-ohon niya ang iyang kinaiya. Mahadlok siya maghunahuna nga kung moabot ang adlaw nga mabalik siya sa iyang kaniadtong kinabuhi nawngon siya sa mga tawo sa iyang bati nga batasan. Si Mark produkto sa kabus nga pamilya sa Cagayan de Oro City. Gani napagya man kaniadto nga naglisud siya sa pamilete sa pag-adto niya sa Manila aron pagsalmot sa Search for a Star- ang indigay nga maoy naglawog niya ngadto sa baba sa kabantogan.
"Masuwerte gani ko nga blessed ko. So why would I change?" matud pa niya.Dungan niini iyang gipadayag nga bag-o lang siya nag-abli og restaurant didto sa Cagayan de Oro City diin iya kining ginganlan og "Baste," ang ngalan sa iyang karakter sa teleserye nila ni Sarah Geronimo sa ABS-CBN kaniadto.
Tulo ka tuig human siya nahimong first -runner up ni Sarah sa Search for a Star matud pa ni Mark nga daghan na siya'g nadawat nga mga blessing busa mapasalamaton kaayo siya dili lang ngadto sa iyang mga fans kondili labaw na ngadto sa Ginoo. "Sana hindi sila magsasawa sa akin. I'll try to do things better para mapasaya ko sila," pong pa ni Mark pahinungod ngadto sa mga nagtoo sa iyang katakos.
Sa umaabot nga mga adlaw, maglanog lanog na usab ang iyang third single-"End By Now" nga gikan sa iyang Dream On album. Nangandoy ang mang-aawit nga unta dawaton sa iyang mga fans ang maong kanta sama sa ilang gibubo ngadto sa nag-unang duha ka mga kanta -"I Need You" ug "You Win The Game."