Star Awards mabukon, malampuson

"Pabonggahan" ang nahitabo sa 22nd Star Awards sa Philippine Movie Press Club (PMPC) niadtong Biyernes sa gabii sa Hotel Westin Philippine Plaza, diin kon duna pay award alang sa labing hugyaw nga mga alahas sigurado na nga si Mother Lily Monteverde ang modaog niini.

Wala usab magpalupig ang inahan ug anak nga sila si Ruffa Gutierrez-Bektas ug Annabelle Rama.

Tataw usab kaayo nga gipangandaman ni Mother Lily ang iyang speech sa dihang iyang gidawat ang pasidungog isip best film alang sa 'Blue Moon" nga mao usay naghimo ni Joel Lamangan isip best director.

Samtang dugang taho sa PangMasa mao nga kaupat nag-ilis og gown si Ruffa diin kanunay niyang gibalik balik og pasalamat ang Cebuano designer nga si Jun Escario. Sa dihang gitawag siya isip female star of the night, wala siyay gisul-ob nga alahas tungod kay matud pa, gi-match na niya daan ang iyang mga alahas alang sa isul-ob niya nga gown.

Daghan ang giguwapahan kang Ana Roces nga matud pa misamot ang kaanyag human sila nagbuwag sa iyang bana nga si Greg Montenegro.

Si Randy Ortiz ang nagmugna sa green gown ni Claudine Barreto nga tuyong nagpahimo niini tungod kay matud pa niya dunay pwersa nga nagtukmod niya aron mulugwa atol sa awards night. Siya maoy napiling best actress alang sa pelikulang Dubai sa Star Cinema. Last year,siya usab ang best actress sa Luna Awards sa Film Academy of the Philippines ingon man sa FAMAS alang sa pelikulang 'Milan" ubos gihapon sa Star Cinema.

Si Aga Muhlach nga maoy nahimong best actor alang sa 'Dubai" nagduha-duha pagtambong sa awards night tungod kay matud pa makulbaan gihapon siya bisan pa man sa iyang pagka-beterano.

Una niini gikan pa nagpictorial si Aga ni Raymund Isaac alang sa bag-o unya niyang billboards for Bobson. Pareho ra ang lamesa nga gi-occupy nila ni Aga ug Claudine kinsa niadtong higayona giubanan ni Raymart Santiago.

Ikatulo na nga napiling best actor si Aga alang sa pelikulang Dubai- una mao ang hinatag sa Guillermo Memorial Award Foundation ug ang ikaduha mao ang gikan sa PASADA, kahugpungan sa mga tinun-an ug magtutudlo nga "makisine."

Silang duha ni John Lloyd Cruz ang best actor sa Guillermo Memorial apan niadtong Biyernes, si John Lloyd ang napiling best supporting actor alang lang gihapon sa Dubai.

Ang Star Awards maoy unang kalihukan nga gitambongan ni Rudy Fernandez human siya gipailawom sa major operation. Baskog na kaayo si Rudy diin kauban niya sa iyang lamesa niadtong gabhiona ang iyang mga higala nga sila si Philip Salvador ug Senator Jinggoy Estrada. Taud-taud silang tulo kauban si Ara Mina nga maoy napiling 'Darling of the Press", gitawag aron mohatag og award.

Wala makatambong si Armida Siguion-Reyna aron unta pagdawat sa iyang Ulirang Artista award tungod kay atua siya sa New York alang sa iyang tinuig nga bakasyon. Ang iyang daughter in-law nga si Bibeth Orteza ang midawat sa trophy.