Sa natad sa showbiz dinhi sa Sugbo, walay makaingon nga dako na ang kalampusang naangkon sa mga showbiz people dinhi, busa, inigka dako sa ulo sa usa ka showbiz personality dinhi, kuyaw kaayo nga madaot gayod ang iyang showbiz career. Dili malimtan sa mga taga showbiz dinhi sa Sugbo ang nahitabo sa kanhi "showbiz authority." Matud pa nga mihuot na ang iyang kalo kay midako na man ang ulo, ug wa nay makabadlong kaniya sa dihang miggamit na siya sa ginadili nga drugas.
Laing gihinganlan nga mipanaw na usab sa laing kalibutan mao ang usa ka komedyante sa teleseryeng binisaya, nga matud pa dili gayod maayog tinagdan sa mga fans ug misugod paggamit sa gidili nga drugas. Usa usab ka artista sa sikat kaayo nga teleseries nga nag-ulohan og "Si Goot da Wanderpol" ug "Wanderpol Cholokoys" kaniadto midako usab ang ulo Usa gani niini, namatay lang, kay gidudahang na-overdose sa gidili nga drugas, ug ang usa, nagtoo nga pasagdan lang siya sa iyang pagpanikas sa kauban niyang mga artista, ug sa iyang kahugawan, tungod kay feeling niya sikat na siya, wa nay mokuyog niya kon duna siyay kontrata. Labaw sa tanan, dili na siya kuhaon kon dunay mga kontrata ang uban.
Busa nanghinaot ko nga dili mosangpot sa ingon niini kining mga bag-ong mga artista karon nga giumol sa Cebu Catholic Television Network nga mao nalay nagpabiling network karon dinhi sa Sugbo nga nagpabuhi sa dugo sa mga artistang Sugboanon. Gani, may namatikdan na ko nga duna gyo'y usa nga feeling hawod na ug manaway na sa ubang mga artista ug ubang mga programa diin, wa siya'y apil. Nanghinaot lang ko nga insecurities lang ni ug dili tinuod nga feeling hawod na gayod siya, kay dili pa baya tibuok Pilipinas nakaila niya, di ba?
Usa sa akong gidayeg karong panahona, makapahinumdom nako nilang [Dr] Jeremy Robles ug Genghis Khan Ylaya, nga gwapo na ug arang arang pagkabutang [si Jeremy bugtong anak ni anhing Rudy Robles, Jr. ug Mrs. En Robles, nga duna pa gani mga properties sa gawas sa nasud samtang si Genghis, igsoon ni Inday Tikay, dunay iyang kaugalingong negosyo] Kini sila si Jeremy, Genghis ingon man si Andrei Badayos, wa pa gayod managko ang mga ulo. Si Andrei maoy chief altar boy sa mga misa sa spacious ug air conditioned nga chapel sa CCTN samtang mohatag usab siyag mga instructions sa mga seminarians sa higayon nga adunay Life In The Spirit Seminar. Usa siya sa adunay mahinungdanong papel sa " Langit ug Yuta" bag-ong TV series ni Direk Maning Borlaza, apan hangtod karon wa pa magpakita nga feeling hawod.