Ang labing dako nga panaw

Human sila nagkalayo og mokabat sa tulo ka tuig nahibalik na sila alang sa usag usa alang sa lain na usab nga panag-uban diha sa telebisyon nga gipaabot nga mohatod og nalahi nga talan-awon alang sa nangandoy nga matuyok ang tibook kalibutan. Sila si Paolo Bediones ug Miriam Quiambao, kansang panagpares unang namatud-an sa Extra Challenge kaniadto maghiusa na usab sa ilang mga katakus alang sa lain na usab nga pagpanimpad, pagpanimpad nga mas halapad ug mas dako tungod kay ang ilang nataran mao na ang tibuok kalibutan. Kining tanan pinaagi sa "Pinoy Meets World" ang labing ambiyoso nga programa sa Kapuso network nga magsugod na karon gabii isip hulip sa Kakabakaboo

Kon balikan ang mga katuigan, kinsay magtoo nga mabuhat nila ni Miriam ug Piolo ang mga kulbahinam nga eksena sa 'Extra Challenge" kaniadto sanglit ang mga pagsuway nga gilatid sa ilang agian haom lamang alang niadtong mga lig-on og bukog ug mga abtik nga mga personalidad. Walay nagdahom nga ang usa ka beauty queen ug usa ka commercial model duna diay igong katakus sa pagsulbad sa maong nga pagsuway nga gikaluhaan sa disgrasya? Apan nagmalampuson silang duruha tungod kay duna diay silay abilidad nga dili mabasta-basta.

Pwes kon nagtoo mo nga nakita na ninyo ang tanang tinaguan nga abilidad nila ni Miriam ug Paolo, nasayop mo. Kana tungod kay ning ilang pagbalik, mas bug-at nga mga pagsuway ug mas dako nga kalig-on sa kaugalingon ang gikinahanglan samtang magdagan-dagan sila palibot sa tibuok kalibutan aron pagtuon sa bag-ong mga kultura, pagkaplag sa mga talan-awon nga gipasigarbo sa matag mga nasud ug pag-lili sa matang sa panagkinabuhi sa matag Pinoy nga nanimpad sa nagkadaiyang dapit sa kalibutan.

Gawas pa niini, tun-an usab nila ni Miriam ug Paolo unsaon pagluto ang mga putahe sa nagkalain-laing nasud ug labaw sa tanan masukod ang ilang pasensya tungod kay sila mismo maoy mangompra alang sa ilang mga lutuonon. Pwes mobisita sila sa nagkadaiyang merkado sa mga langyaw nga dapit busa paabota nga maapil sila sa duot duot ug tukmod tukmod samtang manghangyo aron mapalit ang ilang gusto sa labing kubos nga presyo.

Ug makalimtan ba diay ang mga dulot sa bukog nga mga pagsuway? Pwes ang tubag mao nga dili gayud ug gani mas gipalisdan pa kini nga sagubangon nila ni Paolo ug Miriam. Magbaha usab ang mga lamiang pagkaon sanglit naila na kitang mga Pinoy nga mahiligon sa selebrasyon nga kanunay'ng gikaluhaan sa mga makapatulo sa laway nga mga putahe.

Apan dili lang usab kiat-kiat ang "Pinoy Meets World" tungod kay duna usay mga trabaho nga mapahimuslan sa mga Pinoy aron matuman ang ilang pangandoy nga makapanarbaho ngadto sa gawas sa nasud. Gawas niini duna usay mga tumatan-aw nga makadaog og round trip ticket alang sa destinasyon nga iyang gusto. Busa atangi ang "Pinoy Meets World."