Isip mga bag-ong talento sa Dos, daghan ang mihagit kanila kon aduna ba gayud silay mapasigarbo nga mga talento nga mahimong hinungdan sa ilang hayag nga kaugmaon sa industriya ug kon malabwan ba nila ang mga masidlakon karon nga mga bitoon sa industriya nga mga produkto usab sa nahisgutang istasyon.
Niadtong June 18, nahimamat sa Cebu Entertainment Press ang mga housemates pinaagi sa usa ka press conference sa Café Havana diin gibutyag sa mga batan-on ang ilang gihimong pagpangandam sa pagkab-ot sa ilang kalamposan sa natad sa kalingawan. Matud ni Gerald nga giila isip "Amboy Hottie" gikan sa Gen San ug usa karon sa mga "crush ng bayan" nga gikinahanglan nila nga moagi og mga workshop ug training aron mapalambo ang ilang nagkadaiyang potensyal sa ingon dili sila batuon og mga pagsaway gikan sa mga himantayon.
Samtang si Bam miingon nga , "kailangan po naming sipagan para maging ready sa pag-compete sa industry at wala dapat piliing projects, kahit anong dumating gagawin namin yung aming best."
Hinoon, kadaghanan nila ang ganahan mopadayon sa ilang pagtungha ug usa na niini si Mikee nga naila sa iyang mga teyorya sa didto pa sila sa "Bahay ni Kuya." Matud niini, "kahit nag-aaral ako, ipagsasabay ko yung career ko kasi meron din namang nakagawa na nito dati."
Kon si Aldred usab ang pangutan-on matud pa niya nga importante gayud ang edukasyon apan sa kasamtangan nga mainiton pa sila nga gihangop sa publiko, iya unang pahimuslan ang higayon tungod kay pinaagi niini makatabang siya sa iyang pamilya nga sa una ra niya gipangandoy buhaton.
Ug bisa'g mosugod na sa dili madugay sunod nga edition sa Pinoy Big Brother wala pa higapon makalimtan ang kontrobersyal nga eksena sa teen edition nga nagtukmod sa mga moralista pagsang-at og reklamo ngadto na sa Movie Television Regulatory Commission Board. Ang maong eksena mao kadtong maka usa gipakita ang mga housemates nga nagtuki kalabot sa buhaton sa mga lalaki aron ikapahungaw ang kainit sa ilang lawas. Hinoon sila si Fred ug Mikee nga maoy anaa sa taliwala sa maong kontrobersya mipasabot nga normal lang ang maong butang hilabi na sa mga batan-on sama nila. Wala silay nakita nga daotan sa ilang gibutyag ngadto kang Big Brother kay isip "amahan nila sa balay," angayan lang sila mangayo og tambag sa naulahi. Midugang si Fred nga walay pagpaka-aron ingnon ang ilang gipakita sa sulod sa balay. "Kaya siguro kami yung napili na manatili sa bahay ni Kuya kasi po kami yung nag-rerepresent sa mga kabataang Pinoy."