Mga dagway nga nagmadaugon

Si inday maanyag. Si Dodong ambongan. Silang duha kaniadto mga ordinaryong mga nilalang nga gibalewala lang sa publiko. Apan human sila nalakip sa bag-o pa lang nahuman nga Pinoy Big Brother Teen Edition, sila kalit lang nga misulbong ug gikagubtan sa publiko.

Ang ilang mga bitoon karon misubang na apan dili lang kini tungod kay sila maayo og panagway apan labaw sa tanan tungod kay si Inday matinud-anon ug dili tigpaka-aron ingnon samtang si Dodong utukan ug dunay potensyal sa pagkanta.

Dili man sila ang nahimong big winner, apan sa ilang kaugalingon sila susama na nga nagmadaugon tungod kay napamatud-an nila nga duna usab silay katakus ug labaw sa tanan mas nailhan na nila karon ang ilang kaugalingon.

"Barrio Babe"

Dili na gayud karon masawayan pa ang "Barrio Babe" sa Bukidnon nga si Clare Cabiguin tungod kay daghan na ang iyang mga fans nga mainiton kaayo nga nagsuporta kaniya. Kaniadto, adunay mosaway sa dalaga nga bati siya og dagway ug wala'y 'K' (way angay ug way ikabuga) nga mosalmot sa mga indigay sa kaanyag tungod kay matud pa sa mga tawong hinawayon bati siya'g nawong.

Apan sa karon human napakita ni Clare ang iyang katakus didto sa sulod sa "Bahay ni Kuya" nausab ang pagtan-aw sa mga tawo nga kaniadto labihan nga nakasaway kaniya. Gani daghan na karon ang nakadayeg sa iyang katahum tungod kay morena kini nga maoy simbolo sa dagway sa usa ka Filipina.

Niadtong nibisita ang PBB Teen ex-housemates sa Sugbo, niadtong Domingo si Clare nga nahinabi sa Banat Hugyaw miingon nga malipayon siya sa suporta nga gihatag sa mga tawo ngadto kaniya. Dili pa man gani siya katuo nga daghan na siya og fans karon. Matud pa ni Clare, "after PBB, mas naging masaya ang buhay ko kasi dati parang wala masyado pumapansin sa akin pero ngayon maraming naiinspire sa akin at nagmamahal lalo na sa amin sa Bukidnon."

Sa iyang homecoming didto sa Bukidnon nakita ni Clare nga gimahal ug gisuportaan siya'g maayo sa iyang mga "kababayan." Mapasigarbohon kaayo sila kang Clare tungod kay nagpakita ang dalaga sa iyang tinood nga pamatasan sa PBB nga angayang sundogon sa mga kabatan-onan, ilabi na ang hiyas niini sa pagkamatinud-anon. Busa ang mensahe ni Clare alang niadtong mga nakamenos kaniya kaniadto: " ngayon napakita ko na sa kanila na mali yung mga sinasabi nila dati sa akin."

Garbo sa Pasay

Bisan pa og siya ang unang nigawas gikan sa "Bahay ni Kuya" sa Pinoy Big Brother Teen Edition wala kini igsapayan ug mahayi sa ambongan ug utokang si Aldred Gatchallian kinsa nag voluntary exit tungod kay gimingaw siya og maayo sa iyang pamilya. Daghang offers ang nadawat sa batan-on human siya migawas sa balay. Gani bag-ohay pa lang, nalakip si Aldred sa concert ni Sam Milby didto sa Jaro, Ilo-ilo nga giulohan og "Sam in a Million."

Si Aldred usa ka valedictorian ug dili lang iyang panagway ang iyang ikapasigarbo sa mga fans kon dili usab iyang katakos sa pagkanta ug talagsaong karisma nga karon mipukaw sa interes sa masa. Regular siya nga makit-an sa ASAP '06 diin apil siya sa gianggaan karon nga "singing heartthrob" sama usab nila ni Aaron Agassi ug Sam Concepcion. Kinahanglan pa man tuod nga masahon og maayo ang potensyal ni Aldred sa pagkanta apan dili malimod nga ang iyang kaambongan gasa nga mohugyaw sa mga babaye nga anak ni Eva.

Sa ka bag-o pa lang niya sa showbiz, garbo na ni Aldred nga nakauban na niya ang mga inilang ngalan sa industriya. Apan niingon si Aldred nga dili dali para niya isip bag-ong sulbong sa maong kalibutan ang makigsakbang sa mga gikagubtan usab karon sama ni Sam Milby. Hinoon nangandam ug iya nang gilig-on ang iyang kaugalingon kalabot sa bisan unsay mahitabo sa iyang gisudlan nga career. "Masarap ang feeling na nakakatrabaho ko yung mga sikat sa showbiz so parang sikat na din ako."

Dugang pa sa batan-on nga malipayon siya kay pinaagi sa iyang pagsulod sa showbiz makatabang na siya karon sa iyang pamilya nga dugay na niyang gipangandoy. "Habang merong offers sasamantalahin ko na at habang mainit pa yung pagtanggap ng mga fans sa amin."

Apan gihatagan gihapon og gibug-aton ang iyang pagtungha. Para niya importante ang edukasyon ug bisa'g nag-showbiz na siya karon, dili pa gihapon niya talikdan ang iyang pag-eskwela. "Ipagpapatuloy ko pa rin yung pag-aaral ko kasi mahalaga talaga para sa akin yun."